«A što nie tak?» Pad Łunincam ludzi zaharajuć kala miemaryjała zabitym ziemlakam
U Łuninieckim rajonie adpačyvalniki nie adzin hod źbirajucca kala pomnika zabitym nacystami viaskoŭcam. Ale niadaŭna publikavanaje ŭ sacyjalnych sietkach videa z tym, jak toje vyhladaje, vyklikała šmat kamientaroŭ.
Na videa z tyktoku bačna, što vialikaja hrupa ludziej adpačyvaje kala pomnika ziemlakam, zabitym u Druhuju suśvietnuju vajnu nacystami. Niekatoryja z adpačyvalnikaŭ zaharajuć za ličanyja mietry ad miemaryjała ź viankami.
«Ludzi! Što z vami adbyvajecca?» — emacyjna padpisała videa aŭtarka.
Pa ŭsim vidać, što hetaja miaścina daŭno stała ŭlublonym miescam adpačynku. Navat razhornutyja namioty stajać niepadalok ad pomnika.
Voziera Biełaje, na bierazie jakoha pomnik, znachodzicca za 17 kiłamietraŭ ad Łuninca.
Rabotnik kamunalnaj słužby rajona raskazaŭ «Našaj Nivie», što pomnik pastavili ŭ 1994 hodzie na terytoryi plažnaj zony. Tady nie zadumvalisia, što pobač ź im mohuć zaharać ludzi.
«Hetak adpačyvajuć nie adzin hod i strachu ŭ hetym nie bačać», — kamientuje situacyju kamunalnik.
Pomnik traplaje ŭ miežy plaža. Ad jaho da voziera prykładna 60 mietraŭ.
Miascovamu žycharu, jaki pazvaniŭ u Łuniniecki rajvykankam, čynoŭniki raskazali, što raz na tydzień plažy manitoryć admysłovaja kamisija, jakaja pilnuje, kab adpačyvalniki nie pili ałkahol dy nie raspalvali vohniščaŭ.
Pra videa, jakoje razyšłosia pa sacsietkach, tam nie viedali, paabiacali źviarnuć uvahu.
Videa z adpačyvalnikami la pomnika sabrała bolš za 130 kamientaroŭ. Mnohija nie bačać prablemy ŭ tym, što ludzi zaharajuć i raźbivajuć namioty pobač. Tłumačać: pomnik nie apahańvajecca, a mohiłki nas paŭsiul atačajuć.
Tyja, chto aburajecca, akazalisia ŭ mienšaści.
Pomnik staić na miescy brackaj mahiły partyzan. Na im spałučanyja katalicki kryž i čyrvonaja zorka.
Viosku Biełaje Voziera z 54 žycharami nacysty spalili ŭ 1944 hodzie. Pasielišča było katalickim. Pa vajnie acalełyja viaskoŭcy chacieli jaho adbudavać, ale saviety pačali kalektyvizacyju i ludzi źjechali ŭ Polšču.
Paźniej na miescy vioski byŭ palihon dla savieckaj vajennaj avijacyi. A ŭ 1964-ym u vakolicaŭ źniščanaha pasielišča ŭźviali pijanierski łahier «Spadarožnik». A voś na miescy samoj vioski i staić pomnik, la jakoha zaharajuć adpačyvalniki.
«Naša Niva» — bastyjon biełaruščyny
PADTRYMAĆHladzicie taksama:
Jakoje voziera ŭ Biełarusi najbolš prydatnaje dla dajvinhu?
Parom praz Mora HieradotaAd Łuninca da Pietrykava: repartaž ź niejmaviernaha Paleśsia
Strašnaja pojedź: kožny hod Łuniniec atakujuć vusieni amierykanskaha biełaha matyla
Kamientary