Jak ahienty traplajuć za miažu i ci sprabavali śpiecsłužbisty zapisacca ŭ šerahi «Kibierpartyzan»

Sproby ahientaŭ uvajści ŭ atačeńnie «Kibierpartyzan»

Šamietaviec adznačaje, što ŭ atačeńnie «Kibierpartyzan» sprabavali patrapić ahienty, jakija vydavali siabie za ajcišnikaŭ. Takich ludziej atrymałasia identyfikavać. Ale ciažka vyznačyć ich prynaležnaść da kankretnaj krainy. Pa słovach Julii, heta chutčej za ŭsio byli biełarusy.

Na jaje dumku, siońnia ŭ rasiejcaŭ niama resursaŭ i času, bo im treba abaraniać svaje sistemy ad atak ukrainskich hrupaŭ, zachodnich śpiecsłužbaŭ.

Pradstaŭnica «Kibierpartyzan» raspaviała, što z ahientami nie zaŭsiody razryvali kantakty.

«Kali ahient choča, naprykład, pratestavać «Partyzanski telehram», to niachaj pracuje i robić niešta dobraje», —

vykazvaje svajo bačańnie žančyna. I adznačaje, što ahienty nikoli nie mahli atrymać dostup da «adčuvalnaj» infarmacyi, ź jakoj pracuje vielmi abmiežavanaje koła aktyvistaŭ: «Heta nie dziesiać i nie piać čałaviek. Usie razumiejuć ryzyki i ŭzroŭni dostupu».

Jakich ahientaŭ Łukašenka pasyłaje za miažu

Na pohlad Šamietaviec, siarod ahientaŭ, jakich Łukašenka pasyłaje za miažu, absalutna roznyja ludzi. Niekatoryja zavierbavanyja, niekatoryja prajšli śpiecyjalnaje navučańnie.

«Jeść vielmi cikavyja vypadki (chacia heta praktyka nie tolki biełaruskich śpiecsłužb) viarboŭki złačyncaŭ prosta z turmy. Heta kryminalniki, ludzi, jakija nie z palityčnych matyvaŭ apynulisia ŭ turmie. Jany im robiać dakumienty ab ich pieraśledzie z palityčnych matyvaŭ i adpraŭlajuć u Jeŭropu», —

raspaviadaje Julijana i dadaje, što siarod «Kibierpartyzan» jość čałaviek, jaki adkazny za pravierku takich ludziej. Mienavita jon vykryvaje kryminalnikaŭ, jakich, pa słovach žančyny, dastatkova mnoha.

Jak havoryć Šamietaviec, takija ludzi atrymlivajuć i status uciekača i niejkija hrošy. Heta zdarajecca z-za taho, što ŭ jeŭrapiejskich struktur niama resursaŭ dla pravierki. Tamu praca «Kibierpartyzan» i ŭ tym, kab danosić da ich takuju infarmacyju, davać śpisy.

«Vykryłasia sistema ahientaŭ, jakaja dahetul była. Plus ludzi sami pierajšli da nas z boku režymu i mahli šmat što paćvierdzić», — havoryć Šamietaviec.

Na pytańnie, navošta režymu dasyłać svaich ahientaŭ, pradstaŭnica «Kibierpartyzan» adkazała, što hałoŭnaja meta ŭ takich ludziej — raźjadnańnie, zbor infarmacyi, asabliva ab dapamozie Ukrainie:

«Heta pytańnie rehijanalnaj biaśpieki. Režym zacikaŭleny ŭ pracy na razjadnańnie, suprać biełaruskich palityčnych siłaŭ, jakija znachodziacca za miažoju. Ciapier nas našmat bolš. Heta nie apazicyja minułaha času. Jość novyja rečy, novyja miedyja, prahramy. I, zrazumieła, im karysna pracavać suprać ich».

Hladzicie całkam:

• 10
• 0
• 0
• 0
• 0
• 0
• 1
• 0