Spyniena samaja maštabnaja kampanija Kitaja pa dezynfarmacyi ŭ sacyjalnych sietkach

Jak paviedamlaje Le Monde, 29 žniŭnia Meta abviaściła, što spyniła dziejnaść sietki, jakaja raspaŭsiudžvała dezynfarmacyju z krytykaj Złučanych Štataŭ i krain Zachadu, a taksama prapahandavała dasiahnieńni Kitaja.

«Razhledzieŭšy ich dziejnaść u internecie, my aceńvajem, što heta samaja bujnaja i plonnaja kampanija pa akazańni ŭpłyvu ź viadomych na siońnia ŭ śviecie», —

cytuje vydańnie słovy Bena Nima (Ben Nimmo), adnaho ź mieniedžaraŭ hrupy, jaki adkazvaje za baraćbu z apieracyjami pa dezynfarmacyi.

Častka hetaj kampanii była zaŭvažanaja admysłoŭcami jašče naprykancy 2019 hoda. Tady jana atrymała nazvu Spamouflage z-za schilnaści da masavaha raspaŭsiudžvańnia paviedamleńniaŭ i spasyłak.

Hrupy biaśpieki Meta vyjavili ŭ Facebook 7704 ulikovych zapisaŭ, 954 staronki i 15 hrup, źviazanych z hetaj kampanijaj, a taksama 15 ulikovych zapisaŭ u Instagram. Śpiecyjalisty adznačajuć, što heta vielmi vialikija ličby. Zvyčajna jany vyjaŭlajuć sietki, jakija redka pieravyšajuć tysiaču akaŭntaŭ.

Jak vynikaje z zajavy Meta, asnoŭnaja meta Spamouflage zaklučałasia ŭ raspaŭsiudžvańni «stanoŭčych kamientaroŭ ab Kitai i pravincyi Sińczian (dzie pieraśledujecca ujhurskaja mienšaść), a taksama niehatyŭnych paviedamleńniaŭ, nakiravanych na Złučanyja Štaty, zachodnija ŭrady, a taksama žurnalistaŭ i daśledčykaŭ, jakija krytykujuć kitajski ŭrad».

Meta prypisvaje hetaj kampanii suviaź z «asobami, źviazanymi z kitajskimi pravaachoŭnymi orhanami». Ale pry hetym nie paviedamlaje jakich-niebudź padrabiaznaściaŭ.

Kolkaść nie pierajšła ŭ jakaść

Śpiecyjalisty adznačajuć, što Spamouflage vałodała šyrokimi jak materyjalnymi, tak i čałaviečymi resursami i pracavała ź niekalkimi «padraździaleńniami», kožnaje ź jakich kantralavała hrupu fejkavych akaŭntaŭ i publikavała paviedamleńni ŭ hadziny, jakija adpaviadajuć hadzinam pracy ŭ roznych hadzinnych pajasach Kitaja.

Pa acenkach Meta, hetaja kampanija była vielmi praduktyŭnaja i, vidać, addavała pieravahu kolkaści, a nie jakaści. Pra heta śviedčyć fakt ab tym, što pry najaŭnaści kala 560 tysiač padpisčykaŭ paviedamleńni źbirali vielmi mała kamientaroŭ, łajkaŭ ci repostaŭ.

Admysłoŭcy Meta źviartajuć uvahu na toje, što šmatlikija akaŭnty, vykarystanyja Spamouflage, miarkujučy pa ŭsim, byli nabytyja ŭ reseleraŭ u inšych krainach, uklučajučy Vjetnam i Banhładeš. Pry hetym apieratary kampanii časta pačynali vykarystoŭvać hetyja staronki biez adaptacyi.

Jany pryvodziać prykład, jak na staroncy, na jakoj publikavałasia rekłama nižniaj bializny na kitajskaj movie, raptam źjavilisia paviedamleńni na anhlijskaj movie ab biesparadkach u Kazachstanie.

Imitacyja ruskich technik

Śpiecyjalisty Meta adznačajuć, što Spamouflage taksama sprabavała amal va ŭsim imitavać taktyku, jakaja vykarystoŭvałasia padčas rasijskaj dezynfarmacyjnaj apieracyi «Druhasnaja infiekcyja» (2014-2020 hady). Hetaja apieracyja ličycca adnoj z samych staranna pradumanych u śviecie ŭ apošniaje dziesiacihodździe.

Jak i rasijskaja «Druhasnaja infiekcyja», apieracyja Spamouflage nie tolki była nacelenaja na bujnyja sacyjalnyja sietki, ale i abapirałasia na publikacyju šmatlikich paviedamleńniaŭ na 50 płatformach, uklučajučy forumy ź nievialikim trafikam, častka ź jakich užo vykarystoŭvałasia «Druhasnaj infiekcyjaj».

Kitajskija apieratary Spamouflage vykarystoŭvali dośvied rasijskaj apieracyi pa stvareńni ŭ vialikich maštabach falšyvych dakumientaŭ i ich publikacyi ŭ internecie na «adnarazovych» akaŭntach, a zatym ich retranślacyju ŭ sietkach. Ale kitajcy akazalisia mienš aściarožnyja.

Śpiecyjalisty Meta śćviardžajuć, što vyjavili šmatlikija vypadki hrubych pamyłak u stvaranych fejkavych dakumientach. Jany taksama adznačajuć, što kitajcy nieadnarazova dapuskali pamyłku paŭtornaha vykarystańnia «adnarazovych» akaŭntaŭ, što palehčyła ich identyfikacyju.

Śpiecyjalisty Meta ŭpeŭnienyja, što, niahledziačy na toje, što kitajskaja Spamouflage da drabniutkich detalaŭ kapijavała mietady rasijskaj «Druhasnaj infiekcyi», hetyja dźvie apieracyi ničoha nie źviazvaje.

Čytajcie jašče:

Apieracyja «Dvajnik»: jak dziejničaje rasijskaja prapahanda

«Rasizm, idyjatyzm i hiebielščyna». Vučony raźbiraje chłuśniu rasijskaj prapahandy pra bijałahičnuju zbroju

Kitaj siadzić na załatoj žyle hienietyčnych danych i nie choča dzialicca

• 18
• 5
• 2
• 0
• 5