Maładyja pradprymalniki bolš kreatyŭnyja? Fihnia. Daśledavańnie pakazvaje, što ludzi, starejšyja za 50 hadoŭ, — bolš radykalnyja navatary
Charłandu Sandersu było 62 hady, kali jon zasnavaŭ sietku restaranaŭ fast-fudu Kentucky Fried Chicken (KFC), a Bierni Markusu było 50 hadoŭ, kali jon adkryŭ pieršuju kramu Home Depot — ciapier najbujniejšuju ŭ ZŠA sietku roźničnaha handlu tavarami dla domu. Nakolki raspaŭsiudžany inavacyjny patencyjał u pradprymalnikaŭ u hadach? Novaje daśledavańnie daje niečakany adkaz.
Lipieńskaje daśledavańnie, apublikavanaje ŭ ScienceDirect, śviedčyć, što pažyłym pradprymalnikam jość što prapanavać śvietu. Akazvajecca, tyja ludzi, chto navažvajecca pačać biznes u stałym vieku (50 hadoŭ i bolš), z bolšaj imaviernaściu pryviaduć na rynak radykalnyja inavacyi, čym maładyja ŭładalniki biznesu.
Hruntujučysia na źviestkach pra 2900 zasnavalnikaŭ novych pradpryjemstvaŭ u Hiermanii ŭ 2008—2017 hadach, daśledčyki vyjavili, što kožnyja dadatkovyja dziesiać hadoŭ va ŭzroście zasnavalnika pavialičvajuć imaviernaść prezientavać navinku na rynku ažno da 30 adsotkaŭ.
Takim čynam, takija pradprymalniki, jakija aryjentavanyja na inavacyi i majuć dośvied kiravańnia, bolš čym u try razy čaściej ukaraniajuć tyja ci inšyja novaŭviadzieńni na rynku, čym u siarednim pa vybarcy. Z punktu hledžańnia prodažu, dziesiać dadatkovych hadoŭ va ŭzroście aznačajuć pavieličeńnie prodažu ad inavacyj prykładna na 35 000 jeŭra za hod, što prykładna na 26% bolš, čym u siarednim pa vybarcy. I bolš za toje, stanoŭčaja suviaź uzrostu zasnavalnika i inavacyj praciahvajecca da vychadu na piensiju.
Pry hetym adznačajecca, što choć maładyja zasnavalniki biznesu i ŭkaraniajuć bolšuju kolkaść inavacyj u cełym, ale heta inavacyi, jakija čaściej za ŭsio skancentravanyja na palapšeńni biznes-pracesaŭ kankretnaj kampanii. Jany mohuć uklučać stvareńnie novaha prahramnaha zabieśpiačeńnia dla skaračeńnia vydatkaŭ, vykarystańnie novych technałohij dla skaračeńnia času vytvorčaści abo ŭviadzieńnie novych funkcyj, kab zrabić pradukty ci pasłuhi bolš zručnymi dla karystalnikaŭ.
Asnoŭnuju pryčynu takich vynikaŭ daśledčyki bačać u tym, što pažyłyja zasnavalniki zvyčajna atrymlivajuć karyść ad papiaredniaha (kiraŭnickaha) dośviedu i asabistaha bahaćcia pry adkryćci ŭłasnych firmaŭ, tłumačyć The Conversation. Asoby, jakija pierachodziać ad pracy pa najmie da pradprymalnickaj dziejnaści paźniej u žyćci, taksama, chutčej za ŭsio, nojmuć bolš vysokaadukavanych i kvalifikavanych supracoŭnikaŭ.
Spałučeńnie ŭsich hetych faktaraŭ źmianiaje matyvacyju pradprymalnikaŭ i ich zdolnaść stvarać inavacyjny pradukt, a taksama robić pažyłych zasnavalnikaŭ paśpiachovymi ŭ raspracoŭcy novych praduktaŭ ci pasłuh, jakija źmianiajuć rynak.
Takim čynam, vysnovy analizu asprečvajuć daminujučy stereatyp ab tym, što pažyłyja zasnavalniki biznesu nie vielmi navatarskija. Daśledčyki kažuć, što važna adroźnivać inavacyi, jakija prosta novyja dla kankretnaj kampanii, i inavacyi, jakija novyja dla ŭsiaho rynku.
Kab dziaržavy mahli atrymać vyhadu ad zdolnaści pažyłych pradprymalnikaŭ raspracoŭvać sapraŭdy novyja inavacyi, treba razburyć mif pra toje, što pradprymalnictva tolki dla maładych. Na praktycy heta patrabuje piensijnych schiem, jakija zaachvočvajuć pracavać daŭžej u jakaści pradprymalnika. Hetak ža pavinna zaachvočvacca karjernaja mabilnaść, kab ludzi mahli praściej pierachodzić da pradprymalnictva ŭ dalejšym žyćci. Što ž tyčycca Biełarusi — tut pa-raniejšamu bieź źmien: kolkaść pradprymalnikaŭ — jak maładych, tak i nie vielmi — stabilna źnižajecca razam z padatkovymi vypłatami.
Kolkaść IP skaračajecca. Jak heta ŭpłyvaje na sabranyja padatki i čamu tendencyja praciahniecca
Biełaruskim IP ułady pastupova ŭskładniajuć žyćcio. A na jakich umovach pracujuć pradprymalniki ŭ Polščy i Litvie?
«Hety praces nie spyniajecca». Jak rełakiejt biełaruskaha biznesu ŭpłyvaje na Biełaruś i susiednija krainy
Minskamu biznesmienu Saŭryckamu i jahonaj siamji pahražaje pa 12 hadoŭ za «raspalvańnie varožaści»2
Kamientary