Śvinaja nyrka funkcyjanavała ŭ ciele pacyjenta sa śmierciu mozha bolš za miesiac
Navukoŭcy nazyvajuć heta sapraŭdnaj «apošniaj viachoj» na šlachu da stvareńnia nieabmiežavanaj ustojlivaj krynicy orhanaŭ dla transpłantacyi.
Adviečnaja prablema achovy zdaroŭja, ź jakoj sutykajecca čałaviectva — niedachop orhanaŭ dla tych, chto maje ŭ ich patrebu. I navat kali pašancuje znajści donara dla transpłantacyi, bolšaść ludziej pavinny prymać imunasupresiŭnyja preparaty, kab praduchilić adryńvańnie, jakoje parušaje zdolnaść arhanizma abaraniacca ad infiekcyj i raku.
Adnym z rašeńniaŭ abmiežavanaha zapasu orhanaŭ źjaŭlajucca ksienatranspłantaty — tkanki abo orhany, pierasadžanyja ad inšych vidaŭ, naprykład, ad śvińni abo šympanze. Pakolki naša imunnaja sistema dakładna raspaznaje ksienatranspłantat jak niečałaviečy, heta nie robić lahčejšaj zadaču pa vyžyvańni transpłantavanaha orhana.
Navukoŭcy sprabujuć vyrašyć prablemu šlacham redahavańnia hienaŭ. Vydalajučy abo madyfikujučy hieny peŭnych białkoŭ, navukoŭcy madyfikujuć orhany žyvioł — ad sercaŭ da nyrak — kab zrabić ich bolš sumiaščalnymi dla vykarystańnia čałaviekam. Tak chirurhi ź Ńju-Jorkskaha ŭniviersiteta Langone Health uziali adnu takuju hienietyčna madyfikavanuju nyrku ŭ śvińni i pierasadzili jaje pacyjentu ź miortvym mozham, siamja jakoha pahadziłasia na praceduru. Śvinaja nyrka, jakaja ŭtrymlivała dadatkovuju tkanku z orhana pad nazvaj tymus, zdavałasia, pracavała hetak ža dobra, jak i nyrka čałavieka, i nie była adrynuta ciaham cełaha miesiaca paśla apieracyi.
Pracedura, praviedzienaja 14 lipienia, stała piataj ksienatranspłantacyjaj, praviedzienaj u Ńju-Jorkskim univiersitecie Langone za apošnija niekalki hadoŭ, raspaviadaje Inverse. U adnoj z papiarednich apieracyj hienietyčna madyfikavanaje serca śvińni było pierasadžana žyvomu čałavieku, jaki pamior praz dva miesiacy. Pryčynaj śmierci stała, adnak, nie adryńvańnie orhana, a mierkavana śviny virus u ksienatranspłantacie.
Jak i ŭ papiarednich sprobach, dla apošniaj transpłantacyi nyrka była atrymana ad śvińni, prodki jakoj byli hienietyčna źmienieny tak, kab nie mieć alfa-hał — malekuły cukru, jakuju ludzi stracili padčas evalucyi, ale jakaja zastałasia ŭ bolšaści mlekakormiačych, takich jak śvińni, karovy ci aleni. U ludziej vysoki ŭzrovień antyciełaŭ suprać alfa-hał, što vyklikaje zvyšvostraje adryńvańnie; tamu vydaleńnie hiena praduchilaje hetuju niepažadanuju reakcyju.
Dadatkova pierasadka tymusa (ci viłačkavaj załozy) ad śvińni dazvalaje novym kletkam, jakija raźvivajucca ŭ arhaniźmie recypijenta, raspaznavać antyhieny śvińni jak svaje ŭłasnyja. Heta patencyjna moža pryvieści da źnižeńnia imunnaha adkazu i źnižeńnia ryzyki adryńvańnia ksienatranspłantata.
Vyniki atrymalisia abnadziejvajučymi. Z dapamohaj hetaj piataj ksienatranspłantacyi chirurhi spadziavalisia adkazać na dva pytańni, na jakija nie było adkazu ŭ papiarednich sprobach: ci pratrymajecca śvinaja nyrka dastatkova doŭha biez adryńvańnia (pry papiarednich sprobach acenka pravodziłasia na praciahu tolki 54-72 hadzin paśla transpłantacyi) i ci moža śvinaja nyrka vykonvać tyja ž funkcyi, što i čałaviečaja.
Nyrka była pierasadžana 57-hadovamu mužčynu z dyjahnazam hlijabłastoma, u jakoha była paćvierdžana śmierć mozha. Jaho siamja vyrašyła achviaravać jaho cieła, bo jaho orhany nie padlahali donarstvu z-za raku. Abiedźvie nyrki niabožčyka byli vydalenyja i zamienienyja adnoj hienietyčna madyfikavanaj śvinoj nyrkaj, jakaja była pravierana na lubyja patencyjnyja ŭzbudžalniki, takija jak, naprykład, śviny cytamiehałavirus.
Novaja nyrka paśla apieracyi adrazu pačała vypracoŭvać maču. A padčas 32-dzionnaha nazirańnia, u toj čas jak pamierły znachodziŭsia na sistemie žyćciezabieśpiačeńnia, nie było prykmiet adryńvańnia orhana, i śvinaja nyrka praciahvała pracavać davoli dobra, adznačali navukoŭcy.
Zaraz daśledavańnie pakul praciahvajecca, pakolki daśledčyki płanujuć nazirać za nyrkaj jašče na praciahu nastupnych dvuch miesiacaŭ. Asabliva ich cikavić, ci sapraŭdy ŭklučeńnie kavałačka tymusa dapamahaje minimizavać imunny adkaz. Kali heta tak, heta moža pryvieści da padobnych stratehij dla inšych orhanaŭ, takich jak piečań i lohkija, jakija, jak viadoma, źjaŭlajucca bolš składanymi ź imunałahičnaha punktu hledžańnia, čym nyrki.
Navukoŭcy kažuć, što na dadzieny momant jość pierakanaŭčyja dokazy, jakija pavinny dadać upeŭnienaści pierad pačatkovaj fazaj kliničnych vyprabavańniaŭ na žyvych ludziach. Ale pośpiech u pamierłych recypijentaŭ nie aznačaje, što kliničnyja vyprabavańni na ludziach adbuducca ŭ bližejšy čas. Navukoŭcy spadziavajucca, što dalejšyja daśledavańni bolšaj kolkaści pamierłych recypijentaŭ i pośpiech z bolš praciahłymi pieryjadami nazirańnia stvorać asnovu dla praviadzieńnia daśledavańniaŭ siarod tysiač ludziej, jakija čakajuć orhanaŭ prosta zaraz.
Na zimu zapłanavanyja masavyja zatrymańni, składzienyja «pieršy i druhi śpisy»23
Kamientary