Štučny intelekt pieramoh troch čempijonaŭ pa honkach na bieśpiłotnikach u ich ułasnaj hulni

Pamiatajecie, kali Deep Blue ad IBM upieršyniu vyjhraŭ u Hary Kasparava ŭ šachmaty ŭ 1996 hodzie? Abo jak u 2016 hodzie AlphaGo ad Google razhramiŭ čempijona Li Siedoła ŭ ho — značna składaniejšaja łahičnaja hulnia, jakaja patrabuje ad hulca hłybokaha stratehičnaha myśleńnia? Hetyja spabornictvy, dzie mašyny pieravažali nad ludźmi, źjaŭlajucca važnymi viechami ŭ historyi ŠI. Ciapier hrupa daśledčykaŭ z University of Zurich i Intel raspracavali aŭtanomnuju sistemu, zdolnuju pieramahčy čempijonaŭ u fizičnym vidzie sportu: honkach bieśpiłotnikaŭ.

Sistema ŠI pad nazvaj Swift vyjhrała niekalki honak suprać troch čempijonaŭ suśvietnaha kłasa ŭ honkach bieśpiłotnikaŭ z kiravańniem ad pieršaj asoby, dzie piłoty kirujuć kvadrakoptarami na chutkaściach bolš za 100 km/h z dapamohaj nadzietaj harnitury, złučanaj z bartavoj kamieraj.

Fizičnyja vidy sportu bolš składanyja dla ŠI, tamu što jany mienš pradkazalnyja, čym nastolnyja abo videahulni. Pakolki zvyčajna va ŭdzielnikaŭ niama daskanałych viedaŭ ab madelach bieśpiłotnikaŭ i navakolnaha asiarodździa, štučnamu intelektu treba navučacca, uzajemadziejničajučy niepasredna ź fizičnym śvietam, tłumačyć University of Zurich.

Da niadaŭniaha času aŭtanomnym bieśpiłotnikam patrabavałasia ŭdvaja bolš času, čym tym, jakija piłatujucca ludźmi, kab pralacieć pa treku, kali jany nie spadziavalisia na źniešniuju sistemu adsočvańnia miescaznachodžańnia dla dakładnaha kantrolu svaich trajektoryj. Swift, adnak, reahuje na danyja, sabranyja bartavoj kamieraj, u režymie realnaha času. Heta addalena padobna na toje, jak piłatujuć aparaty žyvyja honščyki. 

Intehravany iniercyjny vymiaralny błok vymiaraje paskareńnie i chutkaść, u toj čas jak štučnaja niejronavaja sietka vykarystoŭvaje danyja z kamiery, kab łakalizavać bieśpiłotnik u prastory i vyjavić varoty ŭzdoŭž treka. Hetaja infarmacyja pastupaje ŭ błok kiravańnia, taksama zasnavany na hłybokaj niejronnaj sietcy, jakaja abiraje najlepšaje dziejańnie zhodna z pastaŭlenaj zadačaj.

Swift navučaŭsia spačatku ŭ simulavanym asiarodździ, dzie jon vučyŭsia lotać mietadam sprob i pamyłak, vykarystoŭvajučy typ mašynnaha navučańnia, jaki nazyvajecca navučańniem z padmacavańniem. Vykarystańnie simulacyi dapamahło paźbiehnuć źniščeńnia niekalkich bieśpiłotnikaŭ na rańnich etapach navučańnia, kali sistema časta daje zboi.

Paśla miesiaca simulacyi palotu — što adpaviadaje mienš čym hadzinie na nastolnym PK — Swift byŭ hatovy kinuć vyklik svaim kankurentam-ludziam. Honki prachodzili na śpiecyjalna pabudavanym treku ŭ anhary aeraporta Dziubiendorf niedaloka ad Ciurycha. Trasa achoplivała płošču 25 na 25 mietraŭ ź siamiu kvadratnymi varotami, jakija treba było prajści ŭ pravilnym paradku, kab prajści koła, uklučajučy składanyja manieŭry.

U vyniku Swift zrabiŭ samaje chutkaje koła z adryvam u paŭsiekundy ad lepšaha koła piłota-čałavieka. Tym nie mienš, ludzi-piłoty ŭsio ž lepš prystasoŭvajucca da źmienlivych umoŭ. Prynamsi pakul. Tak piłoty-ludzi akazalisia bolš adaptyŭnymi, čym aŭtanomny bieśpiłotnik, jaki vychodziŭ z ładu, kali ŭmovy adroźnivalisia ad tych, dla jakich jaho rychtavali, naprykład, kali ŭ pamiaškańni było zanadta šmat śviatła.

Stvaralniki adznačajuć, što dasiahnutyja dobryja vyniki aŭtanomnaha palotu važnyja nie tolki ŭ honkach bieśpiłotnikaŭ. Pakolki drony majuć abmiežavanuju jomistaść batarei, im patrabujecca bolšaja častka enierhii, kab zastavacca ŭ pavietry.

Takim čynam, bolšaja chutkaść i aryjentavańnie pavialičvaje ich karysnaść pry vykanańni roznych zadač. Naprykład, u takich prahramach, jak manitorynh lasoŭ abo daśledavańnie kosmasu, važny chutki palot, kab pakryć vialikija prastory za abmiežavany čas. U kinaindustryi chutkija aŭtanomnyja drony mohuć vykarystoŭvacca dla zdymak ekšn-scen, nie kažučy ŭžo pra vialikaje značeńnie dla vyratavalnych bieśpiłotnych latalnych aparataŭ, jakija, naprykład, adpraŭlajucca ŭ budynak, što haryć.

• 0
• 2
• 0
• 1
• 1
• 1
• 1