Sud ES admoviŭsia zdymać sankcyi z Synesis — kampanii, jakaja dała biełaruskim uładam dostup da raspaznavańnia tvaraŭ
Biełaruskaja IT-kampanija Synesis i jaje ŭładalnik Alaksandr Šatroŭ nie zmahli damahčysia źniaćcia sankcyj Jeŭrasajuza za ŭdzieł u represijach režymu Łukašenki suprać hramadzianskaj supolnaści. Sud ES adchiliŭ ich pazovy, piša Deutsche Welle.
Sud Jeŭrapiejskaha sajuza ŭ Luksiemburhu ŭ sieradu nie zadavoliŭ pazovaŭ biełaruskaj kampanii Synesis i jaje ŭładalnika Alaksandra Šatrova da Rady ES, padadzienyja ŭ suviazi z uviedzienymi ŭ dačynieńni da ich sankcyjami.
Šatroŭ i Synesis padali pazovy suprać Rady ES u 2022 hodzie. IT-kampanija Synesis sa śniežnia 2020 hoda znachodzicca pad sankcyjami Jeŭrasajuza jak raspracoŭščyk sistemy raspaznavańnia tvaraŭ Kipod.
U «Aficyjnym časopisie ES» paznačana, što «Synesis dała biełaruskim uładam płatformu videanazirańnia Kipod, jakaja dazvalaje ažyćciaŭlać pošuk i analiz videazapisaŭ, a taksama vykarystoŭvać prahramnaje zabieśpiačeńnie dla raspaznavańnia tvaraŭ, što robić kampaniju adkaznaj za represii hramadzianskaj supolnaści i demakratyčnaj apazicyi z boku dziaržaŭnaha aparatu Biełarusi».
Kampanija Synesis i režym Łukašenki
Synesis — heta adzin z rezidentaŭ Parka vysokich technałohij, stvoranaha zhodna z ukazam Alaksandra Łukašenki, i tamu karystajecca šmatlikimi lhotami. Takim čynam, kampanija atrymlivaje vyhadu praz svaju suviaź z režymam Łukašenki i jahonuju padtrymku, zaznačajuć u Brusieli.
Šatroŭ trapiŭ u čaćviorty sankcyjny śpis ES u červieni 2021 hoda. Jak skazana ŭ «Aficyjnym časopisie ES», «u jakaści byłoha kiraŭnika i asnoŭnaha akcyjaniera TAA Synesis Alaksandr Šatroŭ byŭ adkazny za pryniaćcie rašeńnia ab pieradačy biełaruskim uładam płatformy videanazirańnia Kipod, jakaja dazvalaje ažyćciaŭlać pošuk i analiz videazapisaŭ, a taksama vykarystoŭvać prahramu raspaznavańnia tvaraŭ».
Na dumku Rady ES, takim čynam jon unios svoj układ «u padaŭleńnie hramadzianskaj supolnaści i demakratyčnaj apazicyi dziaržaparatam Biełarusi».
Kamientary