45 palitźniavolenych i 130 siemjaŭ palitviaźniaŭ užo atrymali dapamohu sa srodkaŭ, sabranych na marafonie salidarnaści 

Usiaho padčas marafonu na padtrymku palitviaźniaŭ było sabrana 545 740 jeŭra — biez uliku kryptavaluty, suma jakoj składaje jašče kala 12 tysiač jeŭra. Usiaho było zroblena 14 655 achviaravańniaŭ ad 11 428 donaraŭ, ź ich 220 — ad uładalnikaŭ kryptakašalkoŭ.

Pradstaŭnica pa sacyjalnaj palitycy Kabinieta padkreśliła, što da 80% hetaj sumy pryznačajecca dla padtrymki tych, chto ciapier znachodzicca ŭ Biełarusi.

Achviaravańni prychodzili z 86 krain, praktyčna z usich kantynientaŭ. Ale arhanizatary marafonu vyrašyli nie ahučvać poŭnaha śpisa hetych krain, bo ŭ šerahu ź ich ciapier panujuć niedemakratyčnyja režymy i sponsary mohuć trapić pad pieraśled uładaŭ u svaich krainach.

Lidarami pa kolkaści achviaravańniaŭ byli Polšča (6383), Litva (1463), ZŠA (1333), Hiermanija (1008). Samyja vialikija hrašovyja sumy pryjšli z Polščy (200 563 jeŭra), ZŠA (89 740 jeŭra), Litvy (55 130 jeŭra), Hiermanii (39 131 jeŭra), Vialikabrytanii (25 790 jeŭra). I mienavita ź Vialikabrytanii byŭ dasłany samy vialiki hrašovy pieravod na sumu 10 tysiač jeŭra.

Srodki achviaradaŭcaŭ arhanizatary marafonu raźmiarkoŭvajucca praź niekalki fondaŭ i inicyjatyvaŭ, jakija zajmajucca dapamohaj palitviaźniam. Takim čynam, Biełaruskaj Radzie kultury na siońnia nakiravana 9500 jeŭra; Anarchičnamu čornamu kryžu ŭ Biełarusi — 13 500 jeŭra; fondu dapamohi biełarusam u Litvie «Razam» —13 500 jeŭra; dabračynnaj arhanizacyi Littouwin LIONS CLUB — 13 500 jeŭra; pravaabarončaj inicyjatyvie dapamohi palitźniavolenym Dissidentby — 14 000 jeŭra; dabračynnamu fondu «Kraina dla žyćcia» — 18 000 jeŭra; inicyjatyvie BY_help 36 900 jeŭra, Fondu biełaruskaj salidarnaści BYSOL — 100 000. Ahulnaja suma raźmierkavanych srodkaŭ na 5 kastryčnika składaje 218 900 jeŭra.

Za raźmierkavańniem srodkaŭ sočyć naziralnaja rada, u skład jakoj uvachodziać pradstaŭnica pa sacyjalnaj palitycy Abjadnanaha pierachodnaha kabinieta Volha Harbunova i pradstaŭniki 8 niezaležnych ŚMI. 

Ad pačatku płanavałasia, što ŭsie srodki buduć raźmierkavany i vypłačany ciaham troch miesiacaŭ, ale praces zaciahnuŭsia, bo, tłumačyć Harbunova, jon vymahaje cełaha šerahu biurakratyčnych praceduraŭ u adpaviednaści z zakanadaŭstvam krain Jeŭrasajuza.

Volha Harbunova miarkuje, što da kanca hetaha hoda raźmierkavańnie sabranych u miežach marafonu srodkaŭ budzie zavieršana.

Pradstaŭnica pa sacyjalnaj palitycy raspaviała, što paśla źjaŭleńnia infarmacyi pra raspačatuju HUBAZiKam kryminalnuju spravu suprać arhanizataraŭ marafonu achviaradaŭcy pačali pytacca, ci nie pahražaje im pieraśled z boku biełaruskich uładaŭ:

«Padazravanymi ŭ hetaj spravie źjaŭlajucca kala 60 čałaviek. Miarkujučy z kolkaści, heta žurnalisty, ludzi mastactva, palitviaźni — udzielniki žyvoha efiru. Raniej sud Centralnaha rajona Minska pryznaŭ ekstremisckimi materyjałami videakantent pad nazvaj «Nam nie ŭsio adno».

Što da achviaradaŭcaŭ, to my, jak arhanizatary, harantujem poŭnuju kanfidencyjnaść — my nie zachoŭvajem asabistych danych i nie płanavali ich apubličvać. Taksama my ŭpeŭnieny ŭ abaronienaści płaciežnaj sistemy Stripe, praź jakuju prachodzili srodki. Ale musim papiaredzić, što siłavyja struktury mohuć pajści na pravakacyi, zapałochvać ludziej, kažučy, nibyta im «usio viadoma».

Što da niepasrednych atrymalnikaŭ, praciahvaje Volha, to tut biaśpieku moža harantavać tolki pryncyp dvuchbakovaj adkaznaści — z boku fondaŭ, jakija pieradajuć srodki, i z boku tych, da kaho jany traplajuć.

Pieršy zbor srodkaŭ praz anłajn-marafon Volha Harbunova ličyć paśpiachovym. Jana miarkuje, što mierapryjemstva ŭ takim farmacie možna paŭtaryć, uličyŭšy dośvied pracy ź vialikimi sumami ŭ adpaviednaści ź mižnarodnym zakanadaŭstvam. Ale zapłanavać takuju imprezu jana ličyć metazhodnym užo paśla taho, kali budzie zrazumieła, jak ruchajecca sprava, raspačataja pavodle č. 2 art. 361-2 Kryminalnaha kodeksa za finansavańnie ekstremisckaj dziejnaści (sankcyja artykuła praduhledžvaje da 8 hadoŭ pazbaŭleńnia voli).

• 8
• 0
• 3
• 1
• 0
• 1
• 0
• 0