Pamior były saviecki lotčyk Viktar Bialenka, jaki ŭ 1976-m pierahnaŭ na Zachad samalot-pierachopinik
U SSSR Bialenku zavočna prysudzili da śmiarotnaha pakarańnia.
U ZŠA na 77-m hodzie žyćcia pamior były saviecki lotčyk Viktar Bialenka.
6 vieraśnia 1976 hoda Viktar Bialenka vylecieŭ z aeradroma Sakałoŭka ŭ Prymorji na samalocie-pierachopniku MiH-25p. Paśla adstavańnia ad viadučaha pary jon źniziŭsia da vyšyni prykładna 30 mietraŭ, što dazvoliła jamu paźbiehnuć vyjaŭleńnia jak savieckimi, tak i japonskimi radarami.
Pahłybiŭšysia ŭ pavietranuju prastoru Japonii, Bialenka padniaŭsia na vyšyniu kala 6000 m i byŭ zasiečany japonskimi srodkami SPA; źviazacca ź Bialenkam japoncam nie ŭdałosia, bo racyja MiH-25 była nastrojena na inšuju častatu. Na pierachop nieviadomaha parušalnika byli padniatyja źniščalniki, adnak da momantu ich źjaŭleńnia Bialenka znoŭ źniziŭsia i źnik z radaraŭ.
Bialenka płanavaŭ ździejśnić pasadku na avijabazie Citose, ale praź niedachop paliva byŭ vymušany sieści na najbližejšym aeradromie, jakim akazaŭsia cyvilny aeradrom Chakadate na vostravie Chakajda.
Z-za niedastatkovaj daŭžyni pałasy MiH-25 vykaciŭsia za miežy pałasy i nabliziŭsia da miažy terytoryi aeraporta. Vybraŭšysia z kabiny, Bialenka zrabiŭ dva papieradžalnyja streły ź pistaleta — aŭtamabilisty na aŭtastradzie fatahrafavali toje, što adbyvajecca.
Paśla japonskimi ŭładami było zroblena aficyjnaje apaviaščeńnie, što Bialenka paprasiŭ palityčnaha prytułku. 9 vieraśnia jon byŭ vyviezieny ŭ ZŠA.
Samalot byŭ razabrany, padvierhnuty detalovamu vyvučeńniu japonskimi i amierykanskimi śpiecyjalistami i viernuty ŭ SSSR 15 listapada 1976 hoda (Bialenka pratestavaŭ suprać viartańnia samalota, rajačy amierykancam pakinuć jaho dla vyvučeńnia jašče na paru hadoŭ).
U 1980 hodzie Bialenka atrymaŭ amierykanskaje hramadzianstva i ŭziaŭ sabie proźvišča Šmit. Jon pracavaŭ kansultantam u aerakaśmičnych kampanijach i dziaržaŭnych ustanovach, zajmaŭsia biznesam.
U SSSR Bialenku zavočna prysudzili da śmiarotnaha pakarańnia.
Kamientary