«Abaviazacielstvy vykananyja, my spyniajem maŭčańnie». Stanisłaŭ Łupanosaŭ raskazaŭ pra aŭdyt «Bajpoła» i rezka raskrytykavaŭ byłych paplečnikaŭ
Kanflikt pamiž dźviuma častkami raniej adzinaj arhanizacyi byłych siłavikoŭ «Bajpoł» vychodzić na novy vitok. Stanisłaŭ Łupanosaŭ ź ciapierašniaha «Bajpoła» zapisaŭ videa, u jakim raskazaŭ pra padziei, što adbyvalisia ŭ «Bajpole» i vakoł jaho ŭ apošnija paŭhoda. Hetaje videa — rezka krytyčnaje ŭ dačynieńni da byłych adnadumcaŭ, jakija ciapier abjadnanyja ŭ arhanizacyi «Biełpoł».
U pačatku zvarotu Łupanosaŭ nahadaŭ, što paśla admovy prachodzić palihraf niekatoryja supracoŭniki byli zvolnienyja z «Bajpoła» «za hrubaje parušeńnie pracoŭnaj dyscypliny i ŭ suviazi z strataj davieru». Paśla taho, sustreŭšysia sa Śviatłanaj Cichanoŭskaj, kiraŭnictva i dziejnyja supracoŭniki «Bajpoła», jak śćviardžajecca, dali joj słova ŭstrymacca ad abvinavačvańniaŭ na adras byłych kaleh, i jaho nibyta trymali.
«Adnak ciapier, kali ŭsie abaviazacielstvy, jakija my ŭziali pierad Śviatłanaj Hieorhijeŭnaj i biełaruskim narodam, vykananyja, my spyniajem naša maŭčańnie», — abviaščaje Łupanosaŭ.
Paśla taho jon, zhadaŭšy, što supracoŭniki «Bajpoła» «prajšli palihraf, jaki pradstavili našyja partniory, u adnaho z najlepšych i najbolš aŭtarytetnych ruskamoŭnych palihrafołahaŭ, što isnujuć na siońniašni dzień», a ŭsie zapazyčanaści pierad byłymi supracoŭnikami zakrytyja, Łupanosaŭ davoli padrabiazna raskazaŭ pra praviedzieny niezaležny aŭdyt arhanizacyi, inicyjavany ŭ lipieni. Jon «zapatrabavaŭ źmieny ŭ statucie arhanizacyi, a taksama času na praciahłuju i detalovuju pravierku ŭsioj finansavaj dziejnaści arhanizacyi za ŭvieś pieryjad isnavańnia».
Pavodle słoŭ Łupanosava:
«Kampanija-aŭdytarka była ŭzhodnienaja abodvuma bakami ŭ prysutnaści Franaka Viačorki i Śviatłany Cichanoŭskaj. Aŭdytarskaja kampanija ŭvachodzić u trojku polskich aŭdytaraŭ, jakija majuć dostup da pravierki hrantaŭ amierykanskich donaraŭ.
Pa vynikach aŭdytu, kradziažoŭ i złoŭžyvańniaŭ nie vyjaŭlena. Vydatkavańnie srodkaŭ pravodziłasia ŭ adpaviednaści z zakanadaŭstvam i patrabavańniami hrantadaŭcaŭ. Ad hrantadaŭcaŭ atrymanyja listy z paćviardžeńniem taho, što hranty tracilisia ŭ adpaviednaści z patrabavańniami ŭkładzienych damovaŭ. Bolš za toje, paśla praviedzienych pravierak «Bajpoł» atrymaŭ finansavańnie, niahledziačy na chłuśniu i paklop, što raspaŭsiudžvalisia zvolnienymi supracoŭnikami, śpiecsłužbami režymu i inšymi asobami, što zjaŭlajecca harantyjaj finansavaj sumlennaści».
Razam z aŭdytam była praviedziena i invientaryzacyja ŭsioj majomaści fundacyi «Bajpoł», nabytaj u ramkach prahram padtrymki arhanizacyi za pieryjad jaje isnavańnia.
U suviazi z hetym Łupanosaŭ zajaviŭ, što
«z hetaha momantu dziejańniam usich asobaŭ, jakija raspaŭsiudžvajuć paklop i źniavahi, pravaachoŭnymi orhanami Polščy budzie dadziena pravavaja acenka. «Bajpoł» pakidaje za saboju prava na abaronu svajho honaru, hodnaści i dziełavoj reputacyi ŭsimi dazvolenymi zakanadaŭstvam Polščy sposabami. U tym liku šlacham zvarotu ŭ sud».
Asnoŭny źmiest rešty zvarotu — zakidy ŭ bok byłych paplečnikaŭ pa «Bajpołu», razbor uzajemnych kryŭdaŭ. Praŭda, Łupanosaŭ adznačaje, što
«ŭ nas nikoli nie było mety zmahacca ź ludźmi, jakija stajać pa naš bok barykad. Kali tolki jany nie zjaŭlajucca ahientami Łukašenki ci Rasii. Tamu my nie ličym nieabchodnym reahavać na vypady byłych supracoŭnikaŭ «Bajpoła» ŭ naš adras».
U toj ža čas, na jahonuju dumku, paśla sychodu z «Bajpoła»
«čamuści byłyja supracoŭniki arhanizacyi pryniali rašeńnie zmahacca nie sa złačynnym režymam Łukašenki, a z «Bajpołam», płanam «Pieramoha» i Alaksandram Azaravym. A heta nas, jak vopytnych apieratyŭnych supracoŭnikaŭ stała navodzić na peŭnyja dumki».
Łupanosaŭ adznačaje, što jany pačali zaŭvažać sistemu ŭ dziejańniach byłych supracoŭnikaŭ «Bajpoła». Tak, ź jutub-kanała, jaki pierajšoŭ pad kantrol «Biełpoła», byli, maŭlaŭ, vydalenyja ŭsie roliki, jakija datyčylisia płana «Pieramoha», i ŭsie instrukcyi, nieabchodnyja partyzanam i padpolščykam unutry krainy.
Jak śćviardžaje Łupanosaŭ, spačatku supracoŭniki «Bajpoł» padumali, što,
«mahčyma, heta zroblena z metaj prosta adharadzicca ad supracivu ŭnutry krainy, kab atrymać finansavańnie ŭ tych, chto baicca ci nie choča padtrymlivać baraćbu za niezaležnaść Biełarusi».
Adnak dalej jany nibyta zaŭvažyli metanakiravanyja dziejańni pa dyskredytacyi płana «Pieramoha» i samoj idei vyzvaleńnia Biełarusi ad złačynnaha režymu.
«I voś tut u nas pačali ŭźnikać surjoznyja pytańni», — zaznačaje Łupanosaŭ i adznačaje, što śledstva pa ŭdzielnikach śpiecapieracyi režymu pa dyskredytacyi «Bajpoła» i płana «Pieramoha» zavieršana. Jaho vyniki buduć abnarodavanyja najbližejšym časam.
Čytajcie jašče:
Chranałohija kanfliktu ŭ «Bajpole» — što za čym adbyłosia
Abjadnany pierachodny kabiniet abviaściŭ vyniki sustrečy Cichanoŭskaj z «Bajpołam»
Kamientary