Novaja Ziełandyja admienić pažyćciovuju zabaronu na kureńnie dla maładych ludziej. Usia prablema z napaŭnieńniem biudžetu
Zakon, pryniaty papiarednim uradam Džasindy Ardern, praduhledžvaŭ pažyćciovuju zabaronu na prodaž cyharet i tytuniovaj pradukcyi z 2024 hoda ŭsim, chto naradziŭsia paśla 2008 hoda.
Urad Novaj Ziełandyi maje namier admianić samuju maštabnuju ŭ śviecie kampaniju pa zabaronie kureńnia, kab papoŭnić dziaržaŭnuju kaznu, piša Bi-bi-si.
U ramkach kampanii pa admienie kureńnia ŭ krainie ŭvodzilisia abmiežavańni na prodaž tytuniovych vyrabaŭ u roźnicu i źnižeńnie ŭzroŭniu ŭtrymańnia nikacinu ŭ cyharetach. Daśledavańni vyjavili, što takija miery mohuć vyratavać kala piaci tysiač čałaviek u hod.
«My chočam zrabić tak, što maładyja ludzi naohuł nie pačynali kuryć», — kazała tady ministr achovy zdaroŭja Aješa Vierał.
Na minułym tydni Nacyjanalnaja partyja Novaj Ziełandyi pahadziłasia sfarmavać kaalicyjny ŭrad ź dźviuma pravymi partyjami.
Siarod inšaha novy kaalicyjny ŭrad abiacaje źnizić padachodny padatak z nasielnictva i skaracić dziaržaŭnuju biurakratyju.
U minułuju subotu ministarka finansaŭ krainy Nikoła Uilis anansavała admienu reformy pa baraćbie z kureńniem, patłumačyŭšy heta nieabchodnaściu papoŭnić biudžet krainy.
«My pavinny pamiatać, što źmieny ŭ zakanadaŭstvie pa baraćbie z kureńniem akazali značny ŭpłyŭ na dziaržaŭnuju kaznu, pazbaviŭšy jaje amal 1 młrd dalaraŭ», — skazała Uilis u intervju novaziełandskaj telekampanii TV3.
U Novaj Ziełandyi kureńnie słužyć adnym z asnoŭnych faktaraŭ śmierciaŭ, jakija možna papiaredzić. Papiaredni ŭrad pastaviŭ metu źnizić kolkaść kurcoŭ u krainie da 5% da 2025 hoda i ŭ vyniku całkam admovicca ad kureńnia.
Tamu ekśpierty ŭ halinie achovy zdaroŭja padvierhnuli zajavu novaha ŭrada ab admienie kampanii pa abmiežavańni kureńnia žorstkaj krytycy.
«Prapanova, kab źnižeńnie padatkaŭ apłačvałasia ludźmi, jakija praciahvajuć palić, prosta šakiruje», — zajaviŭ Pacific Media Network prafiesar i staršynia novaziełandskaha kamiteta Action for Smokefree 2025 Robiert Bihłchoŭł.
«Bolšaść miedycynskich arhanizacyj Novaj Ziełandyi ŭzrušanyja dziejańniami ŭrada i zaklikajuć jaho pierahledzieć svajo rašeńnie», — zajaviŭ u intervju Bi-bi-si prafiesar i ekśpiert pa hramadskaj achovie zdaroŭja z Univiersiteta Ataha Ryčard Edvards.
Admienu zakona pavinien padtrymać parłamient Novaj Ziełandyi, dzie ŭrad maje bolšaść miescaŭ.
Minułaja zabarona na kureńnie vyklikała pratest z boku niekatoraj častki biznesu Novaj Ziełandyi. Uładalniki hazietnych šapikaŭ i kram krytykavali stratu dachodaŭ ad prodažu cyharet — navat z ulikam dziaržaŭnych subsidyj.
Niekatoryja zakanadaŭcy, uklučajučy novaha premjer-ministra Krysa Łaksana, taksama śćviardžali, što zabarona pryviadzie da źjaŭleńnia čornaha rynku tytuniu.
U davieranaj asoby Łukašenki zabrali biznes pad Hrodnam: «Na paroh vyjšaŭ niejki mužyk i zajaviŭ, što ŭpieršyniu mianie bačyć»2
Kamientary