Partret nieviadomaha mužčyny daloka nie pieršy tvor biełaruskaha mastaka, jaki vystaŭlaŭsia za apošnija dziesiacihodździ na prodaž. Sumy za jahonyja pałotny časam dasiahajuć šaściznačnych ličbaŭ. «Naša Niva» pahladzieła, što jašče z Chruckaha i za kolki prapanoŭvali na aŭkcyjonach za apošni čas.
Ivan Famič Chrucki (1810 — 1885) źjaŭlajecca vydatnym akademičnym žyvapiscam XIX stahodździa, majstram naciurmortu i partretnych pałotnaŭ. Chrucki naradziŭsia ŭ miastečku Uła Lepielskaha pavieta Viciebskaj hubierni ŭ siamji hreka-katalickaha śviatara. Jahonaja piersona adna ź niešmatlikich u mastackim śviecie taho času, jakaja siońnia identyfikujecca jak častka biełaruskaj kultury zbolšaha navat u rasijskim mastactvaznaŭstvie.
Pavodle ekśpiertnaha zaklučeńnia, vydadzienaha va Usierasijskim mastackim navukova-restaŭracyjnym centry imia akademika I.E.Hrabara, na partrecie pamieram 75,5 × 62,8 sm alejnymi farbami namalavany mužčyna, mierkavana kupieckaha sasłoŭja, u kaściumie, jaki adpaviadaje modzie 1830-ch hadoŭ. U 1836 hodzie Chrucki atrymaŭ zvańnie niakłasnaha mastaka Akademii mastactvaŭ, u tym liku za vykananyja z natury partrety, a taksama pradstaviŭ niekalki partretaŭ na akademičnych vystaŭkach 1836-1837 hadoŭ.
Paraŭnańnie raboty z muziejnymi tvorami Chruckaha kanca 1830 — pačatku 1840-ch hadoŭ pakazała padabienstva ŭ stylistyčnych asablivaściach, indyvidualnaj maniery i prapracoŭcy asobnych detalaŭ. Na advarotnym baku karciny majecca nadpis «1836. h. P. chud'. Ivan' Chruckij», jaki taksama paćviardžaje aŭtarstva Ivana Chruckaha.
Biahučaja staŭka na karcinu składaje 5,5 młn rasijskich rubloŭ (kala 61 tysiačy dalaraŭ), ale jana moža značna ŭzraści. Prynamsi partrety i piejzažy pendźla Chruckaha, jakija ŭ raniejšyja hady vystaŭlalisia na aŭkcyjony, u vyniku pradavalisia za bolšyja ŭ razy sumy.
U červieni 2017 hoda za 110,5 tysiačy funtaŭ sterlinhaŭ (kala 140 tysiač dalaraŭ) na aŭkcyjonie MacDougall's było pradadziena pałatno, stvoranaje ŭ 1857 hodzie, na jakim namalavana staraja biełaruskaja pamieščyca Pacirałoŭskaja. Partret pachodziŭ z kalekcyi rymskaha advakata Alfreda Łacaryni. Pieršapačatkova karcina aceńvałasia ŭsiaho ŭ 30-50 tysiač funtaŭ sterlinhaŭ, to-bok u prykładna anałahičnuju sumu, jakuju siońnia prapanoŭvajuć za mužčynski partret mastaka.
Na tym ža aŭkcyjonie ŭ 2021 hodzie za 222,75 tysiačy funtaŭ sterlinhaŭ kupili «Naciurmort z sadavinoj i sotami», napisany Chruckim u 1840 hodzie.
Adny z najbolš darahich rabot Chruckaha byli pradadzieny ŭ 2007 hodzie.
Pieršaja ź ich, «Naciurmort sa śviečkaj i opiernym binoklem», źjaŭlajecca adnym ź niekalkich aŭtarskich paŭtareńniaŭ karciny 1839 hoda, anałahičnyja karciny zachoŭvajucca ŭ Nacyjanalnym mastackim muziei Biełarusi i Nacyjanalnym muziei ŭ Varšavie. Pieršapačatkova karcinu aceńvali ŭ 200-300 tysiač funtaŭ sterlinhaŭ, ale ŭ vyniku pradali za 197,6 tysiačy funtaŭ sterlinhaŭ.
Druhim tvoram Chruckaha, pradadzienym u toj hod z aŭkcyjona MacDougall's, byŭ partret maładoj žančyny z košykam vinahradu. Madellu dla hetaj raboty 1838 hoda pasłužyła taja ž dziaŭčyna, jakaja šmat razoŭ źjaŭlałasia na inšych pałotnach majstra, u tym liku na znakamitym «Partrecie nieviadomaj z kvietkami i sadavinoj» ź minskaj kalekcyi.
Taksama ŭ 2007 hodzie na łondanskim Sotheby's prapanoŭvali «Partret maładoj žančyny z kvietkami i sadavinoj», blizkaje paŭtareńnie partreta, jaki možna pabačyć u biełaruskich kalekcyjach, jaki aceńvaŭsia ŭ 150-300 tysiač funtaŭ sterlinhaŭ.
Ale amatary pryhožaha mastactva mohuć adšukać pracy biełaruskaha majstra i pa całkam prymalnych cenach — usiaho za 1600 dalaraŭ byŭ nabyty naciurmort z hranatami i vinahradam, jaki prypisvajecca Chruckamu, a za 3800 jeŭra piejzaž z mastkom nad burlivaj rakoj.
Zapatrabavanaść tvorčaści Ivana Chruckaha na zachodnim mastackim rynku śviedčyć pra vysoki mastacki ŭzrovień biełaruskaha žyvapisca. 24 karciny, jakija zachoŭvajucca ŭ Nacyjanalnym mastackim muziei ŭ Minsku, a taksama šerah pałotnaŭ u Viciebsku i Połacku źjaŭlajucca važnaj častkaj biełaruskaj mastackaj spadčyny.
«Naša Niva» — bastyjon biełaruščyny
PADTRYMAĆEskizy ałtarnych rośpisaŭ minskaha Čyrvonaha kaścioła vykupili biełarusy zamiežža
Łuŭr zapłaciŭ dziasiatki miljonaŭ jeŭra za karcinu, jakuju źbiralisia vykinuć u śmietnicu
Zahadkavaja historyja adnoj skulptury. Jak Łukašenka padaryŭ toje, čym nie vałodaŭ
U Rasii pradali na aŭkcyjonie staražytnuju hramatu ab nadańni hierba biełaruskaj Dziśnie
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant26
Kamientary