Vyjšła videa, na jakim spałochany kiraŭnik nacysckaha atrada «Rusič» dryžyć u abdymkach kadyraŭcaŭ

Na videa kamandzir kadyraŭskaha «Achmata» Apci Ałaŭdzinaŭ siadzić pobač z sumna viadomym rasijskim nieanacystam i kiraŭnikom dyviersijna-šturmavoj raźviedvalnaj hrupy «Rusič» Alaksiejem Milčakovym i jahonym namieśnikam z pazyŭnym «Miadźviedź», jaki na praciahu ŭsiaho videa pryabdymaje Milčakova. 

Temaj videa, jak kaža sam Ałaŭdzinaŭ, staŭ fienomien «ruskaha nacyjanalizmu» i byłyja vykazvańni Milčakova. Pavodle słoŭ Ałaŭdzinava, videa zapisvałasia ŭžo paśla niejkaj «razmovy» ź Milčakovym, padčas jakoj «apošni pierakanaŭ Ałaŭdzinava, što nie ŭzvyšaje ruskuju nacyju nad inšymi».

Na praciahu ŭsiaho videa Ałaŭdzinaŭ nie nazyvaje Milčakova pa proźviščy ci imieni, užyvajučy tolki jahony pazyŭny «Sierb». Kamandzir «Achmata» taksama ŭ pačatku videa demanstratyŭna adznačaje, što byccam amal ničoha nie čuŭ pra isnavańnie takoj hrupy, jak «Rusič».

«Jon [Milčakoŭ] kaža, što jon ruski nacyjanalist. «Pačakaj, — kažu ja, — kali ty ruski nacyjanalist, jaki lubić svaju nacyju i choča, kab jana stanaviłasia lepšaj, kab my viarnulisia da našych spradviečnych vytokaŭ — dla mianie heta dobra. Pryhažun.

Ale kali ty ruski nacyjanalist, jaki śćviardžaje, što my samyja krutyja, a ŭsie astatnija — drennyja, tady my z taboj nie siabry». Paśla našaj ź im [Milčakovym] razmovy my syšlisia na tym, što ŭ nas jość ahulny vorah, ahulnyja mety, ahulnyja zadačy i ahulnaja kraina.

Damovilisia, što budziem rabić usio, kab nichto nie zmoh raspalvać ni mižnacyjanalnyja, ni mižkanfiesijnyja kanflikty, a budziem rabić usio na dabro. Kali jość ahulnyja zadačy i mety, nie pavinna ŭźnikać pytańnie, chto da kaho pryjšoŭ ci nie pryjšoŭ», — kaža padčas videa kamandzir kadyraŭskaha «Achmata» Apci Ałaŭdzinaŭ.

Paśla hetaha jon pieradaŭ słova Milčakovu, jaki adrazu zajaviŭ, što «nikoha nie spužaŭsia». Pry hetym było zaŭvažna, što na praciahu ŭsiaho videa Milčakoŭ vyhladaje mocna napružanym i navat spałochanym, staranna sprabujučy rabić svoj vyhlad i hołas upeŭnienym i nie dryhotkim.

«Chaj nichto nie dumaje, što tut niechta kaho spužaŭsia ci pad niekaha prymusova loh — takoha tut niama i nie budzie. Ja zaŭsiody kažu ščyra: bajusia nie ludziej, bajusia stracić Rasiju i taho, što my možam prajhrać», — źbiantežana zajaviŭ kiraŭnik DŠRH «Rusič» Alaksiej Milčakoŭ na fonie płakata z vyjavaj Achmata Kadyrava — baćki kiraŭnika Čačni Ramzana Kadyrava.

«My pieramožam, bo my internacyjanalnyja», — padsumavaŭ jahony namieśnik z pazyŭnym «Miadźviedź».

Pavialičyć

Reakcyi na videa ź Milčakovym nie prymusili siabie doŭha čakać. Jaho stali aktyŭna abmiarkoŭvać Z-kanały i vajenkary, vykazvajučy rasčaravańnie pavodzinami kiraŭnika «Rusiča», jaki ŭ šmatlikich intervju nieadnarazova rezka krytykavaŭ Ramzana Kadyrava i jahonyja padraździaleńni, nazyvaŭšy i «nienadziejnymi sajuźnikami, niavartymi ruskich vajaroŭ», i zdradnikami Rasii.

Naprykład, tavaryš Milčakova i były čalec DŠRH «Rusič» vajenkar «TopaZ» spytaŭ, «kolki kaštuje honar», i padkreśliŭ, što videa vydatna demanstruje pryčynu jaho sychodu z šerahaŭ «Rusiča».

Pavialičyć

Praź niekalki hadzin paśla publikacyi videa Ałaŭdzinava Milčakoŭ vypuściŭ u telehram-kanale DŠRH «Rusič» videazvarot, u jakim pasprabavaŭ apraŭdacca za sustreču z kamandziram «Achmata».

«Spadarstva, ja liču, što mahu samastojna vyrašyć, z kim razmaŭlać, a z kim nie. Ja nikoli nie adstupaŭ ad svaich pazicyj, nikoli nie admaŭlaŭ taho, kim źjaŭlajusia, tamu heta maja asabistaja sprava — kamu, što i jak pieradavać, z kim mieć znosiny, a z kim nie. Asabliva kali havorka pra praciahnutuju ruku siabroŭstva — navošta mnie ad jaje admaŭlacca? Uzamien na što? Na vaša pačućcio ŭłasnaj hodnaści? Dy nu jaho da čorta. Kali kahości heta razdražniaje — mnie ŭsio roŭna, ščyra kažučy, absalutna ŭsio roŭna. Jość ludzi, za jakich ja niasu adkaznaść, kab u ich usio było dobra jak u mirnym, tak i ŭ bajavym žyćci. Słava Rusi», — zajaviŭ u svajo apraŭdańnie nieanacyst Alaksiej Milčakoŭ.

Charakterna, što jašče niekalki dzion tamu na kanale DŠRH «Rusič», adminam jakoha źjaŭlajecca Milčakoŭ, źjaviŭsia dopis ab hadavinie pačatku kryvavaha šturmu rasijskimi vojskami horada Hrozny padčas Pieršaj čačenskaj vajny, z-za jakoha pad bombami i snaradami zahinuli bolš za 27 tysiač mirnych žycharoŭ. Hetaja publikacyja nacysckaha «Rusiča» supravadžałasia podpisam «pamiatajem i hanarymsia», što mahło stać padstavaj dla zapisu videa Ałaŭdzinavym.

Pavialičyć

Adznačym, što Alaksiej Milčakoŭ adkryta nazyvaje siabie nacystam, publična prasoŭvaje ideju «pieravahi ruskaj nacyi» i chvalić palityku Adolfa Hitlera. Hety čałaviek staŭ viadomym jašče ŭ 2012 hodzie, kali pad ściaham Treciaha Rejchu adrazaŭ sabakam hałovy, fiksujučy ŭvieś praces na fota.

Milčakoŭ aktyŭna ŭdzielničaŭ u vajnie na Danbasie z 2014 hoda na baku prarasijskich sieparatystaŭ z tak zvanych «DNR/ŁNR», dzie katavaŭ i zabivaŭ ukrainskich vajennapałonnych i mirnych žycharoŭ. Paśla poŭnamaštabnaha rasijskaha ŭvarvańnia va Ukrainu DŠRH «Rusič» pad kiraŭnictvam Milčakova ździajśniała i praciahvaje ździajśniać vajennyja złačynstvy. 

U vieraśni 2022 hoda Milčakoŭ apublikavaŭ u svaim kanale «instrukcyju pa ŭtylizacyi vajennapałonnych USU», u jakoj rekamiendavałasia kalektyŭna zabivać ukrainskich vajennapałonnych, a taksama źmiaščalisia pramyja ŭkazańni pa prymianieńni katavańniaŭ: adsiakać palcy i vušy. U dakumiencie taksama byli parady, jak šantažavać svajakoŭ zabitych vajennapałonnych, prapanoŭvajučy im vykupać za hrošy kaardynaty miesca pachavańnia zabitych.

Aproč hetaha, Milčakoŭ i jahonaja DŠRH «Rusič» u 2016 hodzie byli zaŭvažany ŭ treniroŭcy biełaruskich školnikaŭ u rasijskich letnich łahierach.

• 1
• 1
• 59
• 2
• 0
• 1
• 1
• 0