Dzie pracujuć i jak vyhladajuć žonki top-čynoŭnikaŭ? Pieršaja častka
Biełaruskija čynoŭniki i sami pa sabie pałachlivyja i niepubličnyja. A z ulikam taho, što ich načalnik nikoli nie źjaŭlajecca na publicy sa svajoj žonkaj, to i biurakraty svaich abrańnic chavajuć, u aficyjnym kadry ich poŭnyja siemji nie ŭbačyš. Z dapamohaj bazaŭ «Biełpoła» «Naša Niva» pakazvaje, jak vyhladajuć abrańnicy tych, chto vyznačaje žyćcio krainy.
Iryna Paršuta (Hałoŭčanka)
Iryna Paršuta, maładaja žonka premjer-ministra Biełarusi Ramana Hałoŭčanki, stanam na 2021 hod pracavała ŭ dačce aŭstryjskaj telekamunikacyjnaj kampanii Kapsch TrafficCom, jakaja prapanuje IT-rašeńni dla pieravozak.
Alena Sierhiejenka
Žonka kiraŭnika Administracyi Łukašenki, hałoŭnaha pa kadrach u Łukašenki — Ihara Sierhiejenki.
Z 2014 hoda Alena Vilenaŭna na piensii, a da taho pracavała renthienłabarantam u ankałahičnym dyspansiery.
Kaciaryna Andrejčanka
Žonka doŭhažychara łukašenkaŭskaj sistemy, staršyni Pałaty pradstaŭnikoŭ Uładzimira Andrejčanki taksama piensijanierka. A raniej pracavała ŭ Viciebskim abłvykankamie pad kiraŭnictvam muža. Jon pierajechaŭ u Minsk u 2008-m, a Kaciaryna pracavała ŭ abłasnym centry jašče da 2012 hoda.
Antanina Kubrakova
Žonka ciapierašniaha kiraŭnika łukašenkaŭskaha ministerstva ŭnutranych spraŭ Ivana Kubrakova dahetul farmalna jahonaja padnačalenaja. U zapisie ab pracy paznačana, što jana — pamočnica doktara-epidemijołaha ŭ Respublikanskim centry hihijeny i epidemijałohii Departamienta finansaŭ i tyłu MUS.
Śviatłana Cierciel
A heta žonka staršyni KDB Ivana Cierciela. Śviatłana pracuje ŭ arhanizacyi, jakaja akazvaje mytnyja pasłuhi — «Źniešieŭraservis». Da taho pracavała ŭ «Biełmytservisie».
Zabaŭna, što ŭ 2021-m u toj samy «Źniešieŭraservis» z maski-šou i vobšukami pryjšli pradstaŭniki kankurujučaj arhanizacyi — DFR. Ci paciarpieła sama Śviatłana padčas abłavaŭ u ofisach, nieviadoma.
Taćciana Karajeva
Žonka sumnaviadomaha eks-ministra ŭnutranych spraŭ Juryja Karajeva, jaki ciapier pracuje pamočnikam Łukašenki pa Hrodzienščynie.
U čym jana śpiecyjalistka, dakładna zrazumieć z vypisak niemahčyma. Isnuje zapis, što da 2013 jana pracavała ŭ dziaržaŭnym abjadnańni «Haražy, aŭtastajanki i parkoŭki». Potym, nibyta hałoŭnym śpiecyjalistam Upraŭleńnia infarmacyjnych technałohij u dekaratyŭnaj Fiederacyi prafsajuzaŭ Biełarusi.
Alena Sukalinskaja (Karanik)
Brunetka z doŭhimi padviasnymi zavušnicami — Alena Sukalinskaja, žonka hubiernatara Hrodnienskaj vobłaści Uładzimira Karanika, u minułym — ministra achovy zdaroŭja, pry aktyŭnym biaździejańni jakoha kavid vykasiŭ dziasiatki tysiač biełarusaŭ.
Sama Sukalinskaja — pavažany doktar, kandydat navuk, zahadčyca łabaratoryi supraćpuchlinnaj lekavaj terapii ŭ RNPC ankałohii i miedycynskaj radyjałohii imia Alaksandrava.
Łarysa Kałaŭr
Błandzinka z błakitnymi vačyma — žonka šmathadovaha staršyni Nacbanka Paŭła Kałaŭra.
Jak i muž, Łarysa — niadrobnaja fihura ŭ bankaŭskim siektary. Z 2015 hoda jana pracuje vykanaŭčaj dyrektarkaj dziaržaŭnaha banka «Dabrabyt», raniej jon nazyvaŭsia «Maskva-Minsk». Z mužam u jaje, u teoryi, pavinny być prafiesijnyja pierasiačeńni, bo bankaŭskija čynoŭniki jaje ŭzroŭniu jak minimum pavinny prachodzić atestacyju Nacbanka.
Halina Hryb
Błandzinka z chvalistymi vałasami i z zavušnicami — žonka načalnika minskaj milicyi Michaiła Hryba, Halina Hryb. Pavodle infarmacyi z vypisak, miescam pracy było ŭkazana zahadkavaje TAA «Bi-Alp», jakoje nie huhlicca.
Ale voś što huhlicca, dyk heta toje, što na poŭnuju ciozku Haliny z ekzatyčnym imiem pa baćku — Raaldaŭna — užo 9 hod adkryta IP, asnoŭny vid dziejnaści jakoha — aptovy handal tekstylnymi tavarami.
Taksama Halina Raaldaŭna pieryjadyčna šukaje sabie roznarabočych, u pryvatnaści, dla pracy ŭ ciaplicy.
Iryna Naskievič
Ledzi z karotkaj stryžkaj i ź cialniaškavym kaŭnieram — Iryna Naskievič, žonka byłoha staršyni Śledčaha kamiteta Ivana Naskieviča, jaki ŭ svoj čas adznačyŭsia ŭviadzieńniem praktyki kryminalnaj adkaznaści za ŭdzieł u mitynhach.
Iryna Naskievič — pravizar-receptar u «Biełfarmacyi».
Apošniaje, što było čuvać pra jaje muža — jon biespracoŭny.
Maryna Sivak
Žonka vice-premjera Anatola Sivaka, Maryna Sivak, pracuje na Biełaruskaj čyhuncy i maje składanuju techničnuju śpiecyjalizacyju.
Maryna Valerjeŭna — viadučy inžynier techničnaha adździeła słužby arhanizacyi i płanavańnia kapitalnaha budaŭnictva. Maje prafiesijnyja ŭznaharody.
Jaje muž raniej uznačalvaŭ i Biełčyhunku, i Ministerstva transpartu.
Iryna Snapkova
Žonka pieršaha franta Saŭmina, namieśnika premjer-ministra Mikałaja Snapkova.
U bazie majecca zapis, što pracavała ŭ NAN Biełarusi navukovym supracoŭnikam.
«Naša Niva» — bastyjon biełaruščyny
PADTRYMAĆ
Kamientary