Fura staić, a čałavieka niama: u Rasii źnik 25-hadovy dalnabojščyk z Mahilova
U noč na 3 studzienia ŭ Irkuckaj vobłaści Rasii na trasie «Sibir» palicejskija zaŭvažyli furu «Mercedes». Zacikaviła ich toje, što kabina była adčynienaja, a kiroŭcy nie było. Biasśledna źnik dalnabojščyk z Mahilova — 25-hadovy Dźmitryj Bachankoŭ. Ciapier jaho šukajuć i palicejskija, i vałanciory ŭ Rasii i Biełarusi.
Rasijskaja palicyja paviedamlaje: na videazapisach vidać, što apošni raz fura prajazdžała 1 studzienia niedaloka ad vioski Uchtuj Ziminskaha rajona.
Na instahram-staroncy «Dalnabojščyki Biełarusi» paviedamlajecca, što fura nie była ŭzłamanaja, usie dakumienty na hruz zastalisia lažać na miescy, ale niama mabilnaha telefona i pašparta kiroŭcy.
U tyktoku taksama raspaŭsiudžvajucca videa, pryśviečanyja pošukam Dźmitryja. Błohierka pad nikam varvarabi2 paviedamlaje, što małady čałaviek pracavaŭ u firmie Cargo Line Smolensk. Jana raskazvaje, što jašče 31 śniežnia chłopiec vychodziŭ na suviaź z rodnymi i raskazvaŭ, što vyjezd u jaho zapłanavany na viečar 1 studzienia, a 4 studzienia jon pavinien razhružacca ŭ Manholii.
— Ałkaholnymi napojami nie zachaplaŭsia, tearetyčna moh prosta adznačyć Novy hod i lehčy spać, bo čas jamu dazvalaŭ — ale heta nieviadoma, — kaža dziaŭčyna.
Jana dadaje, što Dźmitryj paviedamlaŭ rodnym, što za 27 hadzin prajechaŭ 1800 kiłamietraŭ i paspaŭ tolki 2 hadziny. Pa słovach dalnabojščyka, da Irkucka jamu zastavałasia 279 kiłamietraŭ, jon dasyłaŭ videa sa stajanki, dzie spyniaŭsia − tam jość kafe. Śledčy kamitet Rasii ŭžo apytvaŭ ludziej tam, ale pakul nijakaj novaj infarmacyi nie atrymaŭ. Ad hetaj stajanki da miesca, dzie ŭ vyniku znajšli furu, 70 kiłamietraŭ.
— Dźmitryj byŭ zadavoleny, što rejs doŭhi — da hetaha jon uvieś čas jeździŭ na karotkija adlehłaści. Kazaŭ, što ŭ Irkuck vielmi pryhožaja daroha. Da hetaha šmat jeździŭ pa Rasii. Heta jahony pieršy doŭhi rejs, ale na firmie Cargo Line Smolensk jon pracuje kala hoda.
Błohierka ŭdakładniaje: Dźmitryj nie žanaty, dziaŭčyny ŭ jaho taksama niama, ni z kim napiaredadni źniknieńnia jon nie kanfliktavaŭ.
Adnačasova ź videa pra źniknieńnie Dźmitryja Bachankova ŭ tyktoku pačaŭ virusicca rolik, dzie inšy dalnabojščyk u Rasii raspaviadaje, što na stajancy staić pustaja fura, a jaje kiroŭca-biełarus zahinuŭ. Šmat chto pačynaje dumać, što havorka idzie pra Dźmitryja. Ale ž toj historyi bolš za hod: u śniežni 2022 hoda źnik Jaŭhien Dvarakoŭ, taksama dalnabojščyk z Mahilova — praź miesiac jaho znajšli zahinułym.
Łukašenku stała drenna na samicie ŠAS u Kazachstanie — Dožd́7
Kamientary