U Francyi prapanavali ŭvieści «suchi studzień». Makron nie padtrymaŭ i jaho zachiejcili
Raniej prezident Francyi kazaŭ, što pje ałkahol dva razy na dzień: za abiedam i za viačeraj.
Prezidenta Francyi Emanuela Makrona abvinavacili ŭ tym, što jon sastupiŭ vinnamu łobi, nie padtrymaŭšy ideju biezałkaholnaha «suchoha studzienia», jakaja prabrałasia ŭ Francyju ŭ 2020 hodzie, piša Bi-bi-si.
Piaćdziesiat śpiecyjalistaŭ pa zaležnaściach napisali na hetym tydni adkryty list, u jakim narakajuć, što dziaržava nie padtrymała kampaniju pa admovie ad užyvańnia ałkaholu na praciahu miesiaca paśla śviataŭ.
«Naša ŭpeŭnienaść u tym, što ŭrad zmoža pravodzić paśladoŭnuju i rašučuju palityku baraćby z ałkahalizmam, surjozna padarvanaja», — napisali daktary.
U liście, jaki apublikavała hazieta Le Monde, daktary zajavili, što «suchi studzień» (jaki pryjšoŭ u krainu ź Vialikabrytanii) nabyŭ papularnaść u francuzaŭ, ale nie dziakujučy, a chutčej nasupierak namahańniam urada.
Niekalki ministraŭ sapraŭdy dystancyjavalisia ad kampanii, zajaviŭšy, što addajuć pieravahu zaachvočvać umieranaść, a nie poŭnuju admovu ad ałkaholu.
Mark Fiesno, ministr sielskaj haspadarki, zajaviŭ, što spažyvańnie ałkaholu ŭ Francyi źniziłasia na 70% za apošnija paŭstahodździa i na 7-10% u minułym hodzie. Pavodle jaho słoŭ, u takich umovach nazojlivaja kampanija pa admovie ad ałkaholu prosta nie patrebna.
«Ja nie dumaju, što francuzaŭ treba vučyć žyć. Ludziam nadakučyła, što im pakazvajuć, što jeści, što pić, jak padarožničać. Jość ład žyćcia, jaki taksama zasłuhoŭvaje pavahi», — skazaŭ jon.
«Ja b vielmi naściarožyŭsia, kali b pačuŭ, što ŭrad na praciahu miesiaca pakazvaje ludziam, jak im žyć», — skazaŭ były ministr achovy zdaroŭja Areljen Ruso, jakoha niezadoŭha da adstaŭki ŭ śniežni spytali, ci dałučycca jon da «suchoha studzienia».
Krytyki paličyli hetyja zajavy prykmietaj taho, što ŭrad, prytrymlivajučysia prykładu prezidenta krainy, paličyŭ za lepšaje dobryja adnosiny z vytvorcami vina kłopacie pra zdaroŭje hramadzian.
«My vydatna viedajem, što pry hetym ŭradzie, i pierš za ŭsio pry hetym prezidencie, suviazi z ałkaholnym łobi asabliva mocnyja», — skazaŭ navukoviec Žan-Pjer Kuteron.
Prychilniki «suchoha studzienia» śćviardžajuć, što Francyja pa-raniejšamu zajmaje čaćviortaje miesca ŭ Jeŭropie pa spažyvańni ałkaholu i što ałkahol štohod zabivaje bolš za 40 tysiač francuzaŭ.
Pa danych statystyčnaha biuro Jeŭrasajuza, u 2020 hodzie ŭ ES na 100 tysiač žycharoŭ prypadała 3,6 śmierciaŭ, źviazanych z užyvańniem ałkaholu. Pa danych SAAZ, u 2020 hodzie pa kolkaści źviazanych z ałkaholem śmierciaŭ na 100 tysiač žycharoŭ Francyja zajmała 30-je miesca ŭ śviecie (3,29), Vialikabrytanija — 69-je (1,76).
Jany ličać, što kali b kampaniju padtrymaŭ urad (maralna i materyjalna), to jana achapiła b kudy bolš ludziej, čym 16 tysiač — mienavita stolki dałučylisia da «suchoha studzienia» ŭ 2023 hodzie.
Krytyki taksama abvinavačvajuć Makrona ŭ asabista pieraškodzie kampanii, spasyłajučysia na toje, što ŭ minułym jon publična ŭchvalaŭ užyvańnie ałkaholu.
U 2022 hodzie Makron byŭ abrany piersonaj hoda pa viersii časopisa Review of French Wines. Tady ž jon zajaviŭ, što pje vino dvojčy ŭ dzień, za abiedam i za viačeraj.
Da taho ž u červieni minułaha hoda fatohrafy zastukali ŭ raspranalni rehbijnaj kamandy Stade Toulousain na stadyjonie Stade de France, dzie jon u adzin prysiest vypiŭ butelku piva Corona.
Vinnaja industryja štohod prynosić Francyi 9 młrd jeŭra tolki ad prodažaŭ za miažu, i rašeńnie vystupić u abaronu francuzskich vinarobaŭ, biezumoŭna, možna ličyć racyjanalnym.
Adnak krytyki Makrona śćviardžajuć, što, napakaz užyvajučy ałkahol, prezident zbolšaha robić heta i dla taho, kab zdavacca «svaim chłopcam».
Łukašenka pra adklučeńnie internetu ŭ 2020-m: Kali heta paŭtorycca, adklučym zusim23
Kamientary