Dva eks-siadzielcy zarubilisia za litoŭskija ślozy: hihancki handlovy centr u Kamiennaj Horcy na aŭkcyjonie vykupiŭ miljanier Sinicki
Niekali litoŭcy ŭzialisia budavać vialiki handlovy centr Mega Park na Kamiennaj Horcy ŭ Minsku. Ale da kanca daciahnuć tak i nie zmahli, chacia źniešnie budynak vyhladaje skončanym. Horad zabraŭ abjekt sabie i doŭha sprabavaŭ pradać, pakul narešcie nie atrymałasia. Za daŭhabud bilisia rahami kampanii dvuch paščypanych eks-siadzielcaŭ: «SihmaPlus» Vitala Sinickaha i «Biełciažmaš» Ihara Aniščanki.
Hihancki handlovik Mega Park na 58 tysiač kvadratnych mietraŭ litoŭcy pačali budavać u 2012, ale tak i nie zdali, tamu što nie zmahli dafinansavać vyrašeńnie niečakana ŭźnikłych kanstruktarskich prablem.
Choć zvonku budynak i vyhladaje skončanym, unutry tam jość niuansy. Abjekt, pa słovach našych surazmoŭcaŭ, nie ŭviedzieny ŭ ekspłuatacyju praz prablemy z fundamientam. Pa sutnaści, jon avaryjny i patrabuje šmatmiljonnych inviestycyj. Heta pryčyna taho, što jaho nijak nie mahli skinuć.
Paśla taho, jak ułaśniki plunuli na centr (a tut zhulali rolu i niemahčymaść dafinansavać budaŭnictva ŭ momancie, i palityčnaja situacyja, i bankaŭskija sankcyi), zakapaŭšy ŭ Minsku dziasiatki miljonaŭ jeŭra, budynak pierajšoŭ horadu.
Haradskija ŭłady pačali sprabavać pradać centr u kastryčniku 2023 hoda, pačaŭšy z cany ŭ 121 miljon rubloŭ ($37,8 miljona), ale tady durnych nie znajšłosia.
Potym byli jašče sproby, usie z dyskontami, ale biespaśpiachovyja.
Da studzienia 2024 cana ŭpała ŭ piać razoŭ. Učorašnija tarhi startavali z cany 24,7 miljona biełaruskich rubloŭ.
Pa infarmacyi «Našaj Nivy», udzielnikaŭ było dvoje — «Sihmaplus» biznesmiena Vitala Sinickaha i «Biełciažmaš» Ihara Aniščanki.
Abodva — znakamityja ŭ Biełarusi dyviełapiery. I abodvuch abjadnoŭvaje toje, što łukašenkaŭcy ich aryštoŭvali, pryznačajučy sumu vykupu za vychad.
Ź Sinickim uvohule adbyłasia zabaŭnaja historyja, jakaja stała lehiendaj u asiarodkach minskaha biznesu.
Sinicki, nazirajučy pieraśled inšych za hetak zvanaje «drableńnie biznesu», u 2021-m vyrašyŭ padstrachavacca i napisaŭ zajavu ŭ padatkovuju sam na siabie — z prośbaj pravieści pravierku, ci ŭsio jon robić karektna. U vyniku jaho samoha aryštavali.
Čytajcie taksama:
Vyjšaŭ na volu biznesmien Vital Sinicki, jaki sam na siabie napisaŭ zajavu ŭ padatkovuju i zapłaciŭ $10 miljonaŭ kampiensacyi
Adzin z čytačoŭ «Našaj Nivy» siadzieŭ u kamiery razam ź Sinickim (ale trapiŭ za kraty paźniej za jaho) i raskazvaŭ nam, što biznesmien rychtavaŭsia da terminu i pieražyvaŭ, što historyju jahonaj absurdnaj pasadki nichto nie daviedajecca. Ale jaho supakoili, nad čym śmiajałasia ŭsia kamiera SIZA. U źniavoleńni Sinicki baviŭ čas biaskoncymi nastolnymi hulniami, prosta ceły dzień pa kole hulaŭ u šachmaty, šaški, damino.
Vyjšaŭ Sinicki, pa infarmacyi «Našaj Nivy», za vykup pamieram 10 miljonaŭ dołaraŭ.
Jahony kankurent na aŭkcyjonie Ihar Aniščanka svajho času chadziŭ z rukami za śpinaj pa tych ža kalidorach, što i Sinicki.
U Aniščanki ŭ svoj čas zdymaŭ pamiaškańnie štab Viktara Babaryki, paźniej u pamiaškańniach «Biełciažmaša» znachodziłasia Kaardynacyjnaja Rada. Da Aniščankaŭ (tam try braty) pryjšli ŭ vieraśni 2020-ha. Im taksama daviałosia płacić vykupy za vychad.
Takim čynam, dva biełaruskija eks-siadzielcy na aŭkcyjonie zarubilisia za litoŭskija ślozy.
Za kolki vykupili Mega Park? Pa infarmacyi «Našaj Nivy», u aŭkcyjonie pieramahła kampanija «Sihmaplus», a vynikovaja cana — 29,3 miljona biełaruskich rubloŭ ($9,3 miljona).
Surazmoŭcy «Našaj Nivy» z bankaŭskich kołaŭ ličać, što dla Sinickaha heta ŭ vialikaj stupieni avantura, a svaich žyvych hrošaj u jaho niama — tolki salidnyja zakłady, tamu ŭ historyi pavinien prysutničać vialiki kredytor. Naprykład, adzin z bankaŭ.
Kamientary
A miž inšym čałavieka, niezaležna ad poła, jaki žyvie na čužyja hrošy nazyvajuć prastytutam albo ŭtrymancam. Miaža pamiž hetymi dvuma stanami pryvidnaja.