Aleh Stachajevič ź Mikaševičaŭ adsiadzieŭ 46 sutak i znachodzicca pad kryminałkaj
Były aktyvist i kiraŭnik niezaležnaj supołki na pradpryjemstvie «Hranit» Aleh Stachajevič adsiadzieŭ u kamiery-adzinočcy 46 sutak na hołych narach biez paścielnych prynaležnaściaŭ i bieź pieradač. Pra heta paviedamiła «Bieraściejskaja viasna» na padstavie śviedčańniaŭ jahonaha siabra Leanida Dubanosava.
Pavodle Dubanosava, Aleha Stachajeviča trojčy pakarali administracyjnym aryštam za znojdzienyja ŭ telefonie łajki ŭ «Adnakłaśnikach». Usie łajki stajali pad publikacyjami samoha Leanida Dubanosava.
Pakarańnie raściahnuli ŭ časie. Pieršapačatkova Stachajeviču 15 sutak za łajki pa č. 2 art. 19.11 KaAP (raspaŭsiud ekstremisckich materyjałaŭ) admieraŭ łuniniecki sud. Paśla adbyćcia hetaha pakarańnia Stachajevič daviedaŭsia, što jaho znoŭ paviazuć u sud. Toj ža łuniniecki sud pakaraŭ jaho 10 sutkami za inšyja łajki pad infarmacyjaj Dubanosava ŭ «Adnakłaśnikach» pa toj ža č. 2 art. 19.11 KaAP. Paśla 10 sutak praces paŭtaryŭsia i Aleh Stachajevič byŭ pakarany treci raz, znoŭ 15 sutkami aryštu, i znoŭ za łajki pad pastami Dubanosava ŭ «Adnakłaśnikach» pa toj ža č. 2 art.19.11 KaAP. Za ŭtrymańnie na «sutkach» Stachajeviču pryjšłosia jašče i zapłacić 740 rubloŭ.
Ale i praz 40 sutak ničoha nie skončyłasia. Stachajeviča spačatku zatrymali na 3 sutak, jakija mohuć trymać da suda, a paśla jašče na troje sutak — užo ŭ miežach kryminalnyj spravy. Kryminalnaja sprava źviazana z artykułami «Paklop» dy «Abraza pradstaŭnika ŭłady» (artykuły 188 i 369 adpaviedna).
Na hety momant Aleh Stachajevič znachodzicca na voli, pad padpiskaj ab niavyjeździe ź Biełarusi.
Aleha Stachajeviča zatrymali ŭ listapadzie 2023 hoda. Apošnim časam jon žyŭ u Litvie, pryjazdžaŭ u Biełaruś udzielničać u spabornictvach pa biehu. Pierad zatrymańniem jon jakraz udzielničaŭ u adnym z takich zabiehaŭ — Bison XC na 5000 mietraŭ pad Siličami.
U pačatku 2010-ch mužčyna pracavaŭ na mikaševickim pradpryjemstvie «Hranit», dzie staŭ lidaram inicyjataraŭ niezaležnaha prafsajuzu, za što byŭ zvolnieny.
«Dobry lesarub, ale sa źviazanymi rukami». Dypłamaty padsumoŭvajuć vyniki pracy zvolnienaha ministra Alejnika2
Kamientary