Viasielle i drama kachańnia hoda, samy hučny źliŭ i niečakanaje viartańnie — asnoŭnyja ludzi i padziei 2024 hoda
«Naša Niva» padvodzić vyniki. Chto nas ździviŭ, paradavaŭ i šakavaŭ u hetym hodzie?
Vajar hoda — Pavieł Šurmiej
Pavieł Šurmiej z pazyŭnym «Dziadźka» staŭ kamandziram Pałka Kalinoŭskaha. Na jaho plečy lahła niaprostaja zadača — refarmavać biełaruskaje padraździaleńnie paśla skandału z papiarednim kiraŭnictvam i palepšyć jaho imidž. Były viaślar-čempijon vajuje za Ukrainu z sakavika 2022 hoda. Jon byŭ u Irpieni, na poŭdni Ukrainy, pad Mikałajevam, na Chiersonščynie, u Sievieradaniecku, u Zaparožskaj vobłaści i Bachmucie.
Fota hoda — Maryja Kaleśnikava
Apošni raz Maryja Kaleśnikava bačylisia ź blizkimi ŭ śniežni 2022-ha — kali trapiła ŭ turemnuju balnicu z prabadnoj jazvaj. Pra toje, kab blizkim dazvolili naviedać jaje, padčas intervju z Łukašenkam zahavaryŭ karespandent Bi-bi-si Styŭ Rozienbierh. Nieŭzabavie baćku Maryi dali sustrecca z dačkoj. Fota ich sustrečy było zroblena ŭ turemnym špitali homielskaj kałonii.
Ich supravadžaŭ błohier-zvarščyk Raman Pratasievič. Baćka abmiarkoŭvaŭ taksama z Maryjaj mahčymaść zvarotu da Łukašenki ab pamiłavańni.
Tendencyja hoda — pamiłavańni palitviaźniaŭ
Ź lipienia pa pamiłavańni vyjšli 227 čałaviek. Usiaho było vosiem chvalaŭ. Siarod vyzvalenych — Ksienija Łuckina, Darja Łosik, Ryhor Kastusioŭ, Dźmitryj Łukša i mnohija inšyja. Mierkavana, tak Łukašenka choča pasprabavać naładzić adnosiny z Zachadam, ale krokavych pasłableńniaŭ teroru dla hetaha niedastatkova.
Niahledziačy na pamiłavańni, represii nie spyniajucca, a ad niekatorych viadomych palitviaźniaŭ — Siarhieja Cichanoŭskaha, Viktara Babaryki, Mikałaja Statkieviča — amal dva hady niama navin.
Viartańnie hoda — Natalla Piatkievič
Dla amierykanskaj i suśvietnaj palityki viartańnie hoda — heta, biassprečna, Donald Tramp. Ź im źviazvajuć adnačasova i vialikija strachi, i śmiełyja nadziei.
Dla biełaruskaha palityčnaha teatra hučnym viartańniem stała Natalla Piatkievič, jakaja apošnija 10 hadoŭ pražyła za miažoj. Kolišniuju pres-sakratarku Łukašenki i adkaznuju za ideałohiju ŭ jaho Administracyi paklikali nazad u Minsk z ZŠA, kab elehantna pravieści vybarčuju kampaniju — 2025.
Ciapier heta adna samych upłyvovych z čynoŭnic, zdolnaja pasunuć dźviuch druhich Natallaŭ — Kačanavu i Ejsmant.
Salidarnaść hoda — zatrymanyja za dapamohu palitviaźniam
Kab asłabić hramadzianskuju supolnaść, siłaviki stali palavać na tych, chto dapamahaje palitviaźniam. Za kraty trapili niekatoryja svajaki palitviaźniaŭ i prosta nieabyjakavyja ludzi, jakija dasyłali listy asudžanym za palityku ci kuplali pradukty dla ich siemjaŭ.
Ale i na hetym palavańnie nie skončyłasia. Ułady pryznali «ekstremisckim» navat servis «Piśmo.bieł», praź jaki dasyłalisia listy ŭ tym liku i palitviaźniam. Stvaralniki servisu aryštavanyja.
Śpiecapieracyja hoda — vyvaz Vieramiejčyka
Były kalinoviec i kolišni biełaruski aficer Vasil Vieramiejčyk byŭ aryštavany ŭ Vjetnamie 13 listapada 2024 hoda. Usie detali dakładna nieviadomy, ale na nastupny dzień paśla zatrymańnia vajara departavali ŭ Biełaruś. KDB pakazaŭ pastanovačnyja kadry, jak Vieramiejčyka ŭ naručnikach vyvodziać z samalota.
Kryndž hoda — fłešmob «Nado!»
Paśla taho jak Alaksandr Łukašenka zajaviŭ, što pojdzie na vybary, tolki kali narod skaža «Nado!», ideałahičny aparat kinuŭsia realizoŭvać novy fłešmob. Cełyja kalektyvy zahaniali ŭ kadr, kab tyja hučna kryknuli «Nado!». Nie ŭsie rabotniki navat razumieli, u čym jany zdymajucca. A prapahandysty Piatroŭski ź Dziermantam tak rasstaralisia, što zapisali zaklik i pa-polsku. Łukašenka čakana pierakonvaŭ, što Natalla Ejsmant da arhanizacyi fłešmobu nie datyčnaja.
Źliŭ hoda — baza zvarotaŭ u KDB
Kibierpartyzany atrymali dostup da 40 tysiač zvarotaŭ na sajcie KDB za 9 hadoŭ. Treba akreślić, što heta nie tolki danosy: absalutnuju bolšaść listoŭ dasłali spamiery. Taksama jość zvaroty pra pošuk represavanych svajakoŭ, z pytańniami pra pracu, ad stukačoŭ z Rasii. Kolkaść danosaŭ ad biełarusaŭ, najchutčej, nie pieravyšaje 1000-2000.
Inšyja hučnyja źlivy Kibierpartyzanaŭ hetaha hoda — baza pamierłych biełarusaŭ i pierapiska rektara BDU Andreja Karala.
Ekstremiscki vierš hoda — «Chto ty hetki»
U pačatku hoda ekstremisckaj pradukcyjaj pryznali videaklip i tekst pieśni «Nie być skotam» hurta «Lapis Trubiacki». Hety tekst całkam skampilavany z radkoŭ vierša Janki Kupały «Chto ty hetki?», napisanaha budučym kłasikam u čas nacyjanalnaha abudžeńnia, kali biełarusy stajali na razdarožžy historyi i šukali adkazu, chto jany jość i jakoje ich miesca ŭ hetym śviecie.
Subkultura hoda — kvadrobiery
Hetaja padletkavaja subkultura (sens u tym, što dzieci pieramiaščajucca na karačkach, imitujučy ruchi žyvioł) nie daje spakoju čynoŭnikam. Dziaržprapahanda staviła modnuju subkulturu ŭ adzin šerah z satanizmam. A milicyja zajaŭlała, što kali pavodziny kvadrobieraŭ parušajuć hramadski paradak (naprykład, skačuć na minakoŭ), ich mohuć pryciahnuć da administracyjnaj adkaznaści za drobnaje chulihanstva.
Drama kachańnia hoda — hibiel Kanstancina Kalcova
Były chakieist zbornaj Biełarusi Kanstancin Kalcoŭ zahinuŭ va ŭzroście 42 hadoŭ. Trahiedyja adbyłasia ŭ hateli ŭ Majami, Kalcoŭ vykinuŭsia z bałkona hatela. Niezadoŭha da hetaha spartoviec rasstaŭsia z tenisistkaj Arynaj Sabalenka. «Choć my bolš nie byli razam, majo serca raźbitaje», — napisała paźniej Sabalenka.
Kalcova pachavali ŭ Minsku. Sabalenka ž znajšła novaje kachańnie — biznesmiena i aŭtahonščyka Hieorhiasa Franhulisa, jaki dziela biełaruskaj tenisistki kinuŭ siamju. Jak u svoj čas i sam Kalcoŭ.
Biurakratyja hoda — vybary ŭ Kaardynacyjnuju radu
Heta hulnia ŭ palityku nie vyklikała cikavaści ŭ nasielnictva. U hałasavańni pryniali ŭdzieł 6 tysiač čałaviek. Heta tłumačycca i zastrašvańniem z boku siłavikoŭ, i tym, što dla mnohich niezrazumieła, jakuju ž funkcyju ŭ ciapierašnim raskładzie palityčnych sił moža vykonvać Kaardynacyjnaja rada.
«Biełarusy pakazali čyrvonuju kartku hulni ŭ biurakratyju», — razvažaŭ žurnalist Dźmitryj Hurnievič.
Hurt hoda — «Piatla prychilnaści»
Ich novy albom «Supierpazicyja» vyjšaŭ na biełaruskaj movie. Niekali lidar hurta Illa Čarapko pryznavaŭsia, što jamu brakuje śmiełaści, kab pačać pisać pa-biełarusku. Źmianilisia abstaviny, źmianiŭsia Illa, źmianiłasia «Piatla».
U niekatorych rasijskich fanataŭ ad hetaha padhareła, ale biełaruskija amatary «Piatli» acanili premjeru.
«Albom ab pačućciach naziralnika za katom Šrodynhiera. U roli kata — naša z vami ŭsichnaja budučynia. Ab rospačy, praz pryzmu jakoj usio ŭžo vyhladaje miortvym, i nadziei, jakaja dazvalaje bačyć jaho žyvym. Pra nievynosnaść pieražyvańnia supierpazicyi abjekta naš novy pop-albom», — tak charaktaryzuje jaho sam hurt.
Na pieśniu «Štości dobraje» muzyki taksama zapisali klip.
Viasielle hoda — Marharyta Laŭčuk
Opiernaja dziva vyjšła zamuž za ŭkrainskaha vajskoŭca Rusłana Karnijku. Jon słužyć u supraćpavietranaj abaronie, źbiŭ kala dziasiatka dronaŭ na podstupach da Charkava. Sama śpiavačka jeździła na front vystupać pierad vajskoŭcami razam z ukrainskim Kulturnym desantam. Tady i paznajomiłasia z Rusłanam.
Ciapier Marharyta žyvie ŭ Charkavie. Niadaŭna para stała baćkami — u ich naradziŭsia syn.
Dvajniki viadomych biełarusaŭ. I nie kažycie, što nie zadumvalisia pra ich padabienstva12
Dvajniki viadomych biełarusaŭ. I nie kažycie, što nie zadumvalisia pra ich padabienstva
«Lilit, vy śviatło jaho žyćcia». Ranicaj 1 studzienia minčuk zrabiŭ prapanovu svajoj dziaŭčynie ŭ samalocie «Biełavija» na vyšyni 10 tysiač mietraŭ3030
Kamientary
Vielmi nie chapaje zhadki, što častka pakazała čyrvonuju kartku taksama cenzury (niedapuščeńniu častki biełaruskich kandydataŭ) i ideałahizacyju ŭ formie ŭpichańnia hiendarnych kvot dla žančyn.
Kak po mnie.to voin hoda byvšij komandir artilerii PKK.
K sožaleniju.on nie sohłasiłsia s "pieriemienami" v Połku i ušioł v ZSU