Kiraŭnik Akademii navuk zajaviŭ, što Łukašenka moh by pretendavać na Nobieleŭskuju premiju

Staršynia Prezidyuma Nacyjanalnaj akademii navuk Biełarusi Uładzimir Husakoŭ ličyć, što ŭ krainie jość patencyjnyja pretendenty na Nobieleŭskuju premiju. Adnak, na jahonuju dumku, krytery prysudžeńnia ŭznaharody ciapier zališnie palityzavanyja, tamu realnyja šancy na jaje atrymańnie biełarusami nievialikija, piša Tochka.by.

«U nas navat byli sproby prabicca, nie budu kazać kaho, ale heta niemahčyma, bo Nobieleŭski kamitet u Šviecyi zasiadaje, i jon nastolki palityzavany, i tam čarhovaść na niekalki hadoŭ napierad — kaho jany ŭžo abiaruć. Užo čarha jość, nas pakul u hetaj čarzie niama», — padzialiŭsia svaim mierkavańniem kiraŭnik NAN.

Husakoŭ taksama ličyć, što ŭ Biełarusi jość «pa statusie, pa značnaści, pa raspracoŭkach, pa maštabnaści, pa achopie pracy, absalutna prydatnyja pad Nobieleŭskuju premiju» navukoŭcy i daśledčyki.

Na dumku kiraŭnika NAN, na samuju prestyžnuju mižnarodnuju premiju moh by pretendavać i Alaksandr Łukašenka.

«Moža, u naminacyi «premija miru». Ale vy viedajecie, ciapier Nobieleŭskaja premija vielmi palityzavanaja i navat pryvatyzavanaja amierykancami. Vy pahladzicie: asnoŭnyja łaŭreaty — heta amierykancy albo z amierykanskim udziełam», — panarakaŭ kiraŭnik Nacyjanalnaj akademii navuk.

Ź jahonych słoŭ, pradstaŭnikoŭ inšych krain zasnavalniki premii apošnim časam ihnarujuć: Rasiju, Kitaj, «nie kažučy pra maleńkuju Biełaruś». 

Tut varta adznačyć, što ŭ 2015-m Nobieleŭskuju premiju pa litaratury atrymała biełaruskaja piśmieńnica Śviatłana Aleksijevič, a ŭ 2022-m premija mira była prysudžana kiraŭniku pravaabarončaha centra «Viasna» Alesiu Bialackamu, jaki na momant abviaščeńnia byŭ za kratami 16 miesiacaŭ, a ŭ sakaviku 2023 hoda asudžany na 10 hadoŭ kałonii.

Aleś Bialacki padzialiŭ uznaharodu z rasijskaj pravaabarončaj arhanizacyjaj «Miemaryjał» i ŭkrainskaj pravaabarončaj arhanizacyjaj «Centr hramadzianskich svabod». Za jaho atrymała premiju ŭ Osła jaho žonka Natalla Pinčuk.

Kiraŭnik NAN Biełarusi taksama pryznaŭsia, što inicyjavaŭ vydańnie zboru tvoraŭ Łukašenki.

Pavodle jaho słoŭ, u jaho b mahli ŭvajści nie tolki artykuły, ale taksama intervju i vystupleńni na bujnych mižnarodnych mierapryjemstvach.

«Ja pra heta taksama dumaŭ i kazaŭ, unosiŭ prapanovy, što nam treba było b, napeŭna, stvaryć kamisiju abo saviet redakcyjny i skamplektavać ceły šerah vydańniaŭ abranych abo zbornikaŭ prac našaha prezidenta. Ale pakul zhody takoj my nie atrymali. Choć usie vystupy kiraŭnika dziaržavy publikujucca», — padzialiŭsia Husakoŭ na pres-kanfierencyi.

Pavodle jaho, pakul usie publičnyja vystupy Alaksandra Łukašenki źbirajucca prezidenckaj biblijatekaj.

• 1
• 0
• 31
• 18
• 0
• 3
• 2
• 0