Va Ukrainie na 13 hadoŭ źniavoleńnia asudzili ŭradženku Biełarusi. Jana padtrymała anieksiju Kryma Rasijaj
Uradženka Bresckaj vobłaści pracavała ŭ krymskim sudzie.
Adzin z rajonnych sudoŭ Kijeva asudziŭ na 13 hadoŭ źniavoleńnia hramadzianku Ukrainy, jakaja naradziłasia ŭ Biarozie, pavodle fakta dziaržaŭnaj zdrady, piša Radyjo Svaboda.
Kryminalnuju spravu suprać uradženki Biełarusi zaviali ŭ 2016 hodzie, a vyrak vynieśli tolki ciapier.
Pavodle materyjałaŭ kryminalnaj spravy, jana dobraachvotna atrymała hramadzianstva Rasii i pracavała sudździoj arbitražnaha suda na akupavanaj terytoryi Kryma.
Hetyja dziejańni sud kvalifikavaŭ jak «dapamohu dziaržaŭnym orhanam Rasii ŭ praviadzieńni padryŭnoj dziejnaści suprać Ukrainy i praciahu akupacyi častki ŭkrainskaj terytoryi».
Sud pryznačyŭ joj pakarańnie ŭ vyhladzie 13 hadoŭ pazbaŭleńnia voli i kanfiskacyi ŭsioj majomaści.
Letaś 21 śniežnia stała viadoma, što Słužba biaśpieki Ukrainy abviaściła ŭ vyšuk etničnuju biełarusku, hramadzianku Ukrainy Halinu Kaciuščanku, jakaja ačoliła stvoranuju rasijskaj akupacyjnaj uładaj tak zvanuju «Centralnuju vybarčuju kamisiju» Zaparožskaj vobłaści i praviała niezakonny refierendum ab dałučeńni da Rasii zachoplenych rasijskaj armijaj ukrainskich terytoryj rehijona.
Raniej va Ukrainie zaviali jašče niekalki kryminalnych spraŭ suprać etničnych biełarusaŭ abo ŭradžencaŭ Biełarusi pavodle fakta dziaržaŭnaj zdrady abo padtrymańnia i dapamohi krainie-ahresarcy.
Kamientary