Vusy, jakija skaryli Polšču. Ci vyjhraje biełarus Pan Savyan dla palakaŭ «Jeŭrabačańnie»?
Hety chłopiec staŭ paznavalny dziakujučy virusnym rolikam u tyktoku, a ciapier moža pajechać na hałoŭny muzyčny konkurs Jeŭropy.
Niahledziačy na toje, što siarod pretendentaŭ na pucioŭku na «Jeŭrabačańnie» ad Polščy ŭ hetym hodzie takija viadomyja ŭ krainie vykanaŭcy, jak Justyna Stečkoŭska i Edyta Hurniak, internet-karystalniki vykazvajuć svaju prychilnaść Dźmitryju Saŭjanu sa sceničnym psieŭdanimam Pan Savyan ź pieśniaj W Kolorku Amaretto («U kolery amareta»). Pra śpievaka piša Gazeta Wyborcza.
Čym tłumačycca pośpiech pieśni
Pa słovach Dźmitryja Saŭjana, svajoj pieśniaj jamu atrymałasia vyklikać u polskich słuchačach nastalhiju pa 1990-ch hadach, pieradaŭšy atmaśfieru toj epochi ź jaje pieśniami pra kachańnie i styl videaklipaŭ dyska-poła.
U kamientarach palaki časta pišuć, što niama takoha słova, jak «kolorek». Ale vykanaŭca śćviardžaje, što pačuŭ jaho vypadkova ŭ razmovie dvuch žančyn u mahazinie. Adna druhoj raskazvała, što kupiła sabie błuzku «kolorku amaretto». Pa słovach vykanaŭcy, jaho adrazu aharnuła chvala nastalhija i jon vyrašyŭ stvaryć tancavalny chit dla niekalkich pakaleńniaŭ.
Na siońnia klip u styli 1990-ch — załatoha vieku dyska-poła — na jutubie nabraŭ kala miljona prahladaŭ. Śpiavak u im paradziruje tvorčaść artystaŭ dyska-poła. I robić heta tak dakładna, što nie mahčyma nie ŭśmichnucca padčas prahladu klipa.
Sam vykanaŭca adznačaje, što ŭ Biełarusi niama ekvivalentu dyska-poła. Na jaho pohlad, hety styl — trochi pieražytak savieckaj estradnaj muzyki. Pa słovach Saŭjana, pośpiech dyska-poła ŭ Polščy možna patłumačyć tym, što vykanaŭcy śpiavajuć ab prostych, blizkich ludziam rečach. Pry hetym u pieśniach bazavaja aranžyroŭka. Hałoŭnaje toje, što słuchačy mohuć atajasamić siabie z artystami, stajać za imi ŭ čarzie ŭ mahazinie i navat nie viedać ab hetym.
Chto taki Pan Savyan
Dźmitryju Saŭjanu 38 hadoŭ. Jon ź Biełarusi i da pryjezdu ŭ Polšču žyŭ u Kijevie. Ukrainskuju stalicu Saŭjan pakinuŭ paśla rasijskaha ŭvarvańnia. Na čverć jon zjaŭlajecca palakam (adna ź jaho babul była polkaj).
Paśla pryjezdu ŭ Polšču Dźmitryj vystupaŭ u Varšavie sa svajoj stendap-prahramaj. Ciapier na heta niama času. Poŭny pracoŭny dzień jon addaje piesiennaj tvorčaści. Klipy jon stvaraje sam, vykarystoŭvajučy smartfon. U vykanaŭcy šmat płanaŭ, u piatnicu, 9 lutaha, jon vypuścić čarhovy sinhł: «Miasto miłości» («Horad kachańnia»).
Mnohija bačyli Saŭjana ź jaho žartaŭlivymi virusnymi pieśniami na polskaj u tyktoku.
Pra svaje vusy Pan Savyan havoryć, što jany zjaŭlajucca simvałam mužnaści paśla tryccaci.
«Moj tata taksama nosić takija. Ja dumaju, što ŭ peŭnym uzroście mužčyny adroščvajuć ich, kab nie było sumnievaŭ u tym, što ź imi treba ličycca. Maje vusy sa śpiecyjalizavanaj kramy dla akcioraŭ. Ź imi mianie čaściej paznajuć na vulicy, ale i bieź ich takoje taksama byvaje», — adznačaje vykanaŭca.
Mahčymaść udziełu ŭ «Jeŭrabačańni»
Svaje šancy na pajezdku ŭ šviedski Malmio Dźmitryj Saŭjan aceńvaje z aściarožnaściu.
«Było b vydatna, kab heta atrymałasia. «Jeŭrabačańnie» dla mianie amal siamiejnaje śviata, konkurs, jaki možna pahladzieć razam ź siabrami. I ja taki biudžetny varyjant «Jeŭrabačańnia», — z humaram raspavioŭ vykanaŭca.
Na hety momant Saŭjan čakaje atrymańnia polskaha hramadzianstva. Jaho najaŭnaść zjaŭlajecca abaviazkovym patrabavańniem dla pradstaŭleńnia krainy na konkursie. Dakumienty jon padaŭ u listapadzie. Rašeńnie pavinna być u krasaviku.
Ale Polskaje telebačańnie (TVP) maje prava vydać «uajłd-kard», dziakujučy jakoj možna zapluščyć vočy na pytańnie hramadzianstva ŭdzielnika papiaredniaha adboru. Voś tolki pytańnie, ci zrobić TVP staŭku na Pana Savyana.
Čytajcie jašče:
Biełarus padaŭ zajaŭku na polski adbor na «Jeŭrabačańnie». Što za jon?
Paŭtary tysiačy muzykantaŭ Finlandyi patrabujuć vyklučyć Izrail ź Jeŭrabačańnia
Ad Ukrainy na «Jeŭrabačańnie» pajedzie duet Alyona Alyona i Jerry Heil
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść5
Kamientary