Blizki da Łukašenki biznesmien zakuplaje detali dla rasijskich tankaŭ u Tajvania i Japonii. Chto jon?
Japonskaja miedyjakarparacyja Nikkei Asia pry dapamozie abjadnańnia byłych biełaruskich siłavikoŭ «Biełpoł» vykryła schiemu pastavak zamiežnych detalaŭ dla rasijskich tankaŭ, jakaja adbyvajecca praz Kitaj pry ŭdziele «blizkaha da Łukašenki biznesmiena». Spytali ŭ «Biełpoł», chto heta.
«Blizki da Alaksandra Łukašenki čałaviek u 2022 hodzie zasnavaŭ u Kitai kampaniju Shenzhen 5G High-Tech Innovation, jakaja pačała zakuplać detali dla ruchavikoŭ, datčykaŭ i inšaha abstalavańnia, nieabchodnaha dla stvareńnia tankaŭ i inšaj zbroi. Potym hetyja detali išli ŭ Biełaruś, a adtul — u Rasiju», — piša vydańnie Nikkei Asia sa spasyłkaj na danyja «Biełpoła».
Pavodle vykrytaj schiemy, režym Łukašenki praz kitajskuju «prakładku» Shenzhen 5G zakuplaŭ abstalavańnie ŭ bujnych japonskich kampanij Metrol i Oriental Motor, jakoje potym pierapradavałasia biełaruskim «Salea» i «Łabaratoryja adytyŭnych technałohij».
«Paśla hetaha zamiežnaje abstalavańnie traplała na rasijski tankavy zavod «Urałvahonzavod» dla vytvorčaści T-72, T-90 i inšych asnoŭnych rasijskich tankaŭ», — paviedamiŭ Nikkei Asia pradstaŭnik «Biełpoła» Uładzimir Žyhar.
Akramia taho «Łabaratoryja adytyŭnych technałohij» i padsankcyjnaja kampanija «Pielenh» sprabavali zamović abstalavańnie ŭ tajvańskaha hihanta Attoptic, ale z-za sankcyj ZŠA płaciažy stała błakavalisia. U vyniku sankcyi ŭsio ž udałosia abyści praz Hruziju.
U adkaz na raśledavańnie Nikkei Asia japonskija kampanii Metrol i Oriental Motor zajavili, što nie mieli pramych kantaktaŭ z rasijskimi ci biełaruskimi kampanijami, a taksama adznačyli, što nikoli nie supracoŭničali z Shenzhen 5G.
A tajvański Attoptic ŭvohule admoviŭsia kamientavać situacyju. Hetak ža zrabili biełaruskija «Salea» i «Łabaratoryja adytyŭnych technałohij».
Pry hetym zastałosia adno pytańnie — chto ž hety «blizki da Łukašenki čałaviek», bo vydańnie Nikkei Asia tak i nie nazvała imia biznesmiena.
«Naša Niva» daviedałasia ad «Biełpoła», što vyšejzhadanym łukašenkaŭskim biznesmienam źjaŭlajecca Alaksandr Šakucin, staršynia rady dyrektaraŭ «Amkadora» i ŭładalnik «Salea», jaki ŭžo znachodzicca pad sankcyjami ES i ZŠA za padtrymku režyma Łukašenki.
Ale Šakucin byŭ nie adzin. Inšy datyčny da schiemy pastavak tankavych detalaŭ — biełaruski biznesmien i kiraŭnik kitajskaj «prakładki» Shenzhen 5G Aleh Jurčyk.
«Šakucin zakuplaje praz Shenzhen 5G padsankcyjonku (stanki i inšaje abstalavańnie), a Jurčyk — zasnavalnik hetaj prakładki, jaki naŭprost padparadkoŭvajecca Dziaržaŭnamu vajenna-pramysłovamu kamitetu Biełarusi», — raspavioŭ «Našaj Nivie» Uładzimir Žyhar.
Nahadajem, što niadaŭna Tajvań pavialičyŭ štrafy za niezakonny ekspart u Biełaruś bolš čym u 15 razoŭ. Ci źviazana heta ź dziejnaściu Šakucina, Jurčyka i inšych — pytańnie rytaryčnaje.
«Naša Niva» — bastyjon biełaruščyny
PADTRYMAĆStała viadoma, chto žanich byłoj deputatki Maryi Vasilevič26
Kamientary