U Litvie źbirajucca pastrožyć praviły pracaŭładkavańnia dla zamiežnikaŭ
U sieradu ministarka ŭnutranych spraŭ Litvy Ahnie Biłatajcie paviedamiła na pres-kanfierencyi, što ŭ ramkach uzmacnieńnia strohaści mihracyjnaj palityki prapanujecca ŭnieści źmieny ŭ praviły pracaŭładkavańnia zamiežnikaŭ. Zhodna z abnoŭlenym paradkam, zamiežniki biez dazvołu na žycharstva nie zmohuć pracavać, taksama prapanujecca abmiežavać kolkaść pracadaŭcaŭ, u jakich možna pracavać adnačasova, piša LRT.
Pavodle słoŭ ministarki, zaraz kolkaść nielehalnych mihrantaŭ minimalnaja, ale ŭ susiednich krainach patoki značnyja, asabliva na polskaj miažy. Jana padkreśliła, što pry vyrašeńni pytańniaŭ mihracyi nielha vypuskać z-pad uvahi prablemy nacyjanalnaj biaśpieki.
Sioleta, pavodle acenak, u Litvie pražyvaje 227 000 zamiežnikaŭ — 8,1% usiaho nasielnictva Litvy. Raście i kolkaść zamiežnikaŭ, jakija pryjazdžajuć na pracu, i zaraz składaje 114 000 čałaviek.
«U minułym hodzie było pryniata 16 000 rašeńniaŭ ab zabaronie na ŭjezd zamiežnych hramadzian u Litvu ŭ suviazi z pahrozaj nacyjanalnaj biaśpiecy. Sioleta za niekalki miesiacaŭ my pryniali 244 takija pastanovy», — skazała Biłatajcie.
«Nam patrebnyja dadatkovyja zaścierahalniki dla praduchileńnia patencyjnych złoŭžyvańniaŭ», — dadała jana.
Pavodle jaje słoŭ, z hetaha hoda źmianiŭsia paradak vydačy dazvołaŭ na časovaje pražyvańnie i stali bolš strohimi pracedury. U studzieni i lutym hetaha hoda byŭ pravierany 641 zamiežnik i vyjaŭlena 17 kryminalnych złačynstvaŭ. Biłatajcie zapeŭniła, što takija pravierki buduć praciahvacca.
Letaś bolš za 6 000 zamiežnikaŭ atrymali admovu ŭ atrymańni i padaŭžeńni dazvołu na časovaje pražyvańnie za parušeńnie mihracyjnych praviłaŭ. Za pieršyja dva miesiacy hetaha hoda dazvoł na žycharstva byŭ anulavany ŭ 1 800 čałaviek.
Jana taksama adznačyła, što papraŭki zaklikany zrabić bolš strohimi patrabavańni da kampanij, jakija zaprašajuć zamiežnikaŭ na pracu ŭ Litvu.
«Umovy pryjomu na pracu zamiežnikaŭ buduć bolš strohimi. Uvodzicca abaviazacielstva pracaŭładkoŭvać zamiežnika na poŭny pracoŭny dzień, prapanujecca viarnuć patrabavańnie ab pradastaŭleńni pracadaŭcam kvalifikacyi i dośviedu zamiežnika. Prapanujecca abmiežavać kolkaść pracadaŭcaŭ, u jakich moža pracavać inšaziemiec, maksimum tryma pracadaŭcami, pakolki zaraz my nazirajem situacyi, kali zamiežnik pracuje ŭ 10 pracadaŭcaŭ adnačasova. Heta vyklikaje niekatoryja pytańni», — patłumačyła Biłatajcie.
U Litvie prapanujecca dazvolić pracavać tolki zamiežnikam, jakija majuć dazvoł na žycharstva, admovicca ad mahčymaści pracavać pa prybyćci ŭ krainu ŭ biaźvizavym režymie abo pa šenhienskaj vizie.
«My bačym vypadki złoŭžyvańniaŭ, kali prybyvaje zamiežnik i pracuje ŭ dziesiaci abo bolš pracadaŭcaŭ. My razumiejem, što heta nierealna, tamu prapanujem abmiežavać ich kolkaść», — skazała ministr.
Zaraz, pa słovach Biłatajcie, nazirajecca prykmietnaje złoŭžyvańnie mihracyjnymi pracedurami.
«My bačym, što pracedury arhanizujucca fiktyŭna. Vielmi važna adznačyć, što z dapamohaj hetych papravak my sprabujem stvaryć harantyi, kab praduchilić złoŭžyvańni. <…> My razumiejem, što isnuje patreba ŭ rabočaj sile, pra heta kažuć i našy pradpryjemstvy, ale mnie zdajecca, što vielmi važna, kab u našaj krainie isnavali praviły i pracedury, kab u nas sapraŭdy byŭ aśpiekt nacyjanalnaj biaśpieki», — skazała ministr unutranych spraŭ.
«Pracadaŭca pavinien harantavać, što inšaziemiec budzie pracavać na praciahu peŭnaha terminu, na jaki jon zaprošany. <…> [Zamiežnik] pavinien budzie adpracavać uvieś pracoŭny čas, jak zapłanavana, a nie niekalki hadzin abo adnu hadzinu, jak my ciapier fiksujem takija vypadki», — skazała Biłatajtcie.
Akaŭnt Kabančuka ŭzłamali — ale ci biełaruskija śpiecsłužby?11
Kamientary