Nijaki hvałt niedapuščalny. Zajava «Našaj Nivy» pa situacyi z Hannaj Klimovič i Źmitrom Pankaŭcom
Śpiecyjalistka pa kamunikacyjach Hanna Klimovič raspaviała ŭ sacyjalnych sietkach pra chatni hvałt, ź jakim jana sutyknułasia ŭ adnosinach z žurnalistam Źmitrom Pankaŭcom. U adkaz Źmicier apublikavaŭ svajo bačańnie padziej.
I Źmicier, i Hanna siońnia nie pracujuć u «Našaj Nivie», ale jany pracavali ŭ našym kalektyvie raniej, i adna z apisanych scen hvałtu — kanflikt, jaki pryvioŭ da špitalizacyi Hanny, — adbyłasia mienavita ŭ toj pieryjad.
U krasaviku 2018 hoda Źmicier Pankaviec byŭ namieśnikam hałoŭnaha redaktara, a Hanna Klimovič niezadoŭha da taho zvolniłasia z adździełu markietynhu.
Ci viedali my pra hvałt?
Tak, viedali. Nie ŭsie akaličnaści, ale viedali. Hanna napisała ŭ sacyjalnych sietkach pra hety fakt. My byli šakavanyja situacyjaj, bo nikoli nie sutykalisia z padobnymi precedentami. Źmicier zajaviŭ kiraŭnictvu Redakcyi, što źbirajecca zvolnicca, bo razumieje svaju vinu ŭ incydencie i ŭśviedamlaje ŭsiu surjoznaść situacyi. Jon źbiraŭsia prykłaści ŭsie namahańni, kab Hanna pryniała jahonyja prabačeńni.
Čamu Źmicier praciahnuŭ pracu ŭ «Našaj Nivie»?
U svaim ciapierašnim dopisie Źmicier śćviardžaje, što zrabiŭ z toj historyi vysnovy na ŭsio žyćcio. Ci tak heta adbyłosia nasamreč, my nie viedajem. Ale tady my pavieryli svajmu supracoŭniku.
Mnohija našaniŭcy padtrymlivali siabroŭskija adnosiny i sa Źmitrom, i z Hannaj. My mierkavali, što adnosiny ŭ Hanny i Źmitra naładzilisia, jany znoŭ žyli razam jak siamja. Publičnyja pretenzii źnikli.
My taksama mierkavali — a mahčyma, prosta spadziavalisia, — što toj vypadak byŭ nasamreč adzinkavy. Pra inšyja padobnyja situacyi my nie viedali. Umiešvacca ŭ pryvatnaje žyćcio supracoŭnikaŭ było mahčyma tolki ŭ toj stupieni, u jakoj jany sami dazvalali nam, kali dzialilisia prablemami i pieražyvańniami.
Z 2021 hoda Źmicier Pankaviec nie pracuje ŭ «Našaj Nivie».
Dyk što, hvałt dapuščalny i možna prosta pieraharnuć staronku?
Adnaznačna nie. My asudžajem seksualny, fizičny, psichałahičny i luby inšy hvałt. U cyvilizavanym hramadstvie jamu niama miesca i niama apraŭdańnia.
Źmicier i Hanna siońnia nie pracujuć u «Našaj Nivie», ale nam nie ŭsio adno. I ciapier, kali my viedajem, jak dalej raźvivalisia hetyja adnosiny, historyja, jakaja adbyłasia ŭ 2018 hodzie, usprymajecca zusim inakš. Na žal, tady my hetaha nie pradbačyli. Naša reakcyja była b inšaj.
My zyčym Hańnie siłaŭ pieraadoleć hety traŭmatyčny dośvied. Hvałt u adnosinach niemahčyma ničym apraŭdać.
My ž zrobim vysnovy z hetaha i padobnych vypadkaŭ, kab praduchilić samu mahčymaść źjaŭleńnia takich situacyj u budučyni.
#chopićhvałcić
Kamientary