Skandał na abłasnoj alimpijadzie pa niamieckaj movie. U adździele adukacyi adkazali chiejtaram

Za niekalki dzion videa, u jakim Kanstancyja raskazvaje pra svaju pieramohu, nabrała ŭžo bolš za 108 tysiač prahladaŭ. U jaho bolš za 2300 łajkaŭ i 180 kamientaroŭ.

Ale niekatoryja karystalniki aburajucca, što ŭ roliku nie paznačana važnaja detal: dziaŭčyna naradziłasia i vyrasła ŭ Niamieččynie, a ŭ Kobryn pryjechała mienš za dva hady tamu. Niechta, uličvajučy hety fakt, paličyŭ pracu jaje nastaŭnika Natalli Čarkasiuk niaznačnaj dla pieramohi.

— Na žal, u našym hramadstvie jašče sustrakajucca ludzi, jakim składana pryniać toj fakt, što luby pośpiech — heta pierš za ŭsio vynik samaaddanaj pracy, metanakiravanaści, samadyscypliny i prahi paznańnia kankretnaha čałavieka, — vykazaŭsia z hetaj nahody Alaksandr Šamiaciuk, načalnik adździeła adukacyi Kobrynskaha rajvykankama. — Značna praściej rastłumačyć usio źbieham abstavin, šancavańniem, machlarstvam, retrahradnym Mierkuryjem.

Čynoŭnik rastłumačyŭ, što ŭ adpaviednaści z paradkam praviadzieńnia respublikanskaj alimpijady pa niamieckaj movie ŭdzielničać u navučalnych spabornictvach nie mohuć vučni, dla jakich zamiežnaja mova źjaŭlajecca rodnaj.

— Dla Kanstancyi rodnaja mova — ruskaja. U čym lohka pierakanacca, parazmaŭlaŭšy ź joj. Jana žyvie i vychoŭvajecca ŭ ruskamoŭnaj siamji. Źjaŭlajecca hramadziankaj Respubliki Biełaruś, — padkreślivaje Alaksandr Šamiaciuk.

— Biezumoŭna, pravioŭšy šmat hadoŭ u Hiermanii, jana nabyła dobry ŭzrovień hutarkovaha niamieckaha, čystaje vymaŭleńnie i šyroki słoŭnikavy zapas. Heta stała dobraj asnovaj dla padrychtoŭki da alimpijady, ale respublikanskaja alimpijada — heta nie konkurs pierakładčykaŭ abo spabornictva na čyściniu vymaŭleńnia.

Šamiaciuk udakładniaje, što alimpijada — heta ŭ pieršuju čarhu intelektualnaje spabornictva, dzie mała viedać, ale treba pracavać sa słovam, z tekstam, analizavać. Usie hetyja navyki «ź nieba nie padajuć». Jon upeŭnieny, što pośpiech Kanstancyi zakanamierny, dziakujučy jaje metanakiravanaści, starannaści, talentu i lubovi da pradmieta.

— I ŭžo tym bolš nielha prymianšać zasłuhi piedahoha. Navat dyjamient, kab stać dyjamientam, maje patrebu ŭ ahrancy <…>, — vobrazna apisvaje pracu nastaŭnicy dyrektar i praciahvaje. — Darečy, mahčyma, heta ździvić internet-chiejteraŭ, ale Kanstancyja nabrała na alimpijadzie 135,5 bała sa 150 mahčymych. I navat u trecim tury (maŭleńnie) maksimum 50 bałaŭ joj nie skarylisia, što śviedčyć ab vysokim uzroŭni zadańniaŭ i daskanałym ich padbory mienavita z metaj stvareńnia roŭnych umoŭ dla ŭsich. Dapuščanyja pamyłki ŭžo staranna praanalizavany razam ź piedahoham.

Alaksandr Šamiaciuk taksama adznačyŭ, što Kanstancyja nie adzinaja vučanica Kobryna, jakaja zavajavała dypłom na alimpijadzie pa niamieckaj movie. U skarboncy zbornaj jašče dźvie ŭznaharody — heta dypłomy III stupieni 11-kłaśnicy Julii Dziemianciuk i 9-kłaśnika Dźmitryja Bielskaha.

• 5
• 6
• 12
• 38
• 1
• 0
• 0
• 0