Lehijon «Svaboda Rasii» zajaviŭ, što ŭziaŭ pad kantrol pasiołak Ciotkina ŭ Kurskaj vobłaści. Što viadoma pra ataku na Rasiju

Rankam u sacsietkach źjavilisia paviedamleńni ad rasiejskich «vajenkaraŭ» pra sproby ŭzbrojenych hrup z braniatechnikaj prarvacca pry padtrymcy artyleryi ŭhłyb rasijskaj terytoryi, u pryvatnaści, u Biełharodskaj vobłaści. 

Zatym u sacsietkach źjavilisia zajavy bajcoŭ lehijona «Svaboda Rasii», Sibirskaha bataljona, a paźniej i Ruskaha dobraachvotnickaha korpusa.

Jašče na niekalkich videa pakazany, imavierna, pierachod rasijska-ŭkrainskaj miažy, zachod DRH u rasijskaje siało, strałkovy boj i źniščeńnie rasijskaha bronietransparciora.

Pradstaŭnik hałoŭnaha ŭpraŭleńnia raźviedki Minabarony Ukrainy Andrej Jusaŭ nazvaŭ bajavyja dziejańni na terytoryi Rasii «vierahodnaj śpiecapieracyjaj rasijskich dobraachvotnickich bataljonaŭ».

«Lehijon «Svaboda Rasii», RDK i Sibirski bataljon na terytoryi Rasii dziejničajuć jak samastojnyja padraździaleńni, pakolki składajucca z hramadzian Rasii. Jany ŭrešcie rešt znachodziacca ŭ siabie doma. Vierahodna, ciapier adbyvajecca sumiesnaja apieracyja hetych padraździaleńniaŭ na terytoryi tak zvanaj RF», — zajaviŭ Jusaŭ.

Minabarony Rasii paćvierdziła sprobu praryvu USU adrazu na čatyroch napramkach — z boku Charkaŭskaj vobłaści, biełharadskich viosak Niechaciejeŭka i Spadarušyna, a taksama kurskaha Ciotkina. Adnak usie ataki byli adbityja, zajavili rasijskija vajskoŭcy. 

FSB Rasii pryviało ŭražalnyja danyja ab stratach ukrainskich farmiravańniaŭ: «Źniščana zvyš 100 čałaviek žyvoj siły supiernika, šeść tankaŭ, SAU Caesar, 20 bajavych braniravanych mašyn, aporny punkt». 

Fota ci videa ni Minabarony Rasii, ni FSB nie pakazvała.

Kala 14:30 lehijon «Svaboda Rasii» zajaviŭ, što ŭziaŭ pad kantrol pasiołak Ciotkina ŭ Kurskaj vobłaści — nibyta rasijskija vojski pakinuli pazicyi i ŭciakli. 

Pa viersii Minabarony RF i FSB, usie ataki i sproby praniknuć na terytoryju Rasii byli adbityja.

U toj ža čas rankam adbyłasia mahutnaja ataka dronaŭ na rasijskija rehijony. U noč na 12 sakavika jak minimum vosiem rasijskich rehijonaŭ byli atakavany ŭkrainskimi bieśpiłotnikami. Ab atakach paviedamili ŭłady Biełharadskaj, Varoniežskaj, Kurskaj, Maskoŭskaj, Arłoŭskaj, Tulskaj, a taksama Leninhradskaj i Branskaj abłaściej.

Dron urezaŭsia ŭ budynak meryi Biełharada. Pry atacy paciarpieli dva čałavieki.

Bieśpiłotnikam vyviedzieny sa stroju Nižaharodski NPZ.

Nižaharodski NPZ u Kstoŭskaj pramzonie — čaćviorty pa abjomie pierapracoŭki ŭ Rasii. Na jaho prypadaje kala 11% usiaho bienzinu ŭ krainie.

Usie hetyja padziei adbyvajucca napiaredadni prezidenckich vybaraŭ u Rasii, što projduć na hetym tydni. 

• 0
• 45
• 0
• 8
• 1
• 1
• 3