Deputaty padčas prezidenckich vybaraŭ «buduć zmahacca na ideałahičnym froncie»
«Jak skazaŭ Łukašenka, čas vybraŭ nas. My idziom pa tonkim lodzie», — kaža Maryna Lančeŭskaja.
U pieryjad elektaralnaj kampanii pa vybarach prezidenta ŭ 2025 hodzie deputaty buduć rabić svaju pracu, kab nie dapuścić destabilizacyi abstanoŭki ŭ krainie. Pra heta zajaviła staršynia Pastajannaj kamisii Pałaty pradstaŭnikoŭ pa zakanadaŭstvie, člen prezidyuma BSŽ Maryna Lančeŭskaja, piša BiełTA.
«Napieradzie ŭ nas 2025 hod, vybary prezidenta. I my razumiejem, što na nas buduć cisnuć, nas buduć razhojdvać», — skazała Maryna Lančeŭskaja.
Jana adznačyła, što rola deputataŭ zaklučajecca nie tolki ŭ pryniaćci pravilnych i piśmiennych zakonaŭ, ale ŭ ideałahičnaj pracy.
«My, deputaty, stanovimsia i ideołahami ŭ tym liku. U čym heta vyjaŭlajecca? Prosta ŭ znosinach ź ludźmi, daniasieńni da ich infarmacyi. I heta treba rabić biez čytańnia marali, a prostaj ruskaj movaj», — pierakananaja deputat.
Na dumku Maryny Lančeŭskaj, deputatam varta prajaŭlać aktyŭnaść i nie adsiedžvacca.
«Jak skazaŭ Łukašenka, čas vybraŭ nas. My idziom pa tonkim lodzie. Kab nie spatyknucca i nie pravalicca, my pavinny być razam, rabić usio piśmienna, aściarožna, pastupalna. Rašeńni treba prymać apieratyŭna i prafiesijna. I ja ŭpeŭnienaja, što maje kalehi, jak i ja, patryjoty. My projdziem hetuju elektaralnuju kampaniju (prezidenckija vybary ŭ Biełarusi), budziem pobač z Łukašenkam. I ja ŭpeŭnienaja, što naša hramadstva nie atrymajecca razhajdać», — dadała jana.
Maryna Lančeŭskaja jašče raz zapeŭniła, što deputaty buduć rabić svaju pracu, kab nie dapuścić destabilizacyi abstanoŭki ŭ krainie.
Ciapier čytajuć
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami21
Kamientary
Achacha! 🤣🤣🤣