U dačynieńni da 29-hadovaha hamialčanina, jaki paviedamiŭ pra miniravańnie ciahnika «Minsk — Homiel», raspačata sprava na padstavie č. 1 art. 340 Kryminalnaha kodeksa (zaviedama niepraŭdzivaje paviedamleńnie ab niebiaśpiecy).
Jak paviedamili ŭ Homielskim adździele ŭnutranych spraŭ na transparcie, «uzryŭnik» zaraz znachodzicca ŭ izalatary časovaha ŭtrymańnia.
Pavodle słoŭ načalnika AUST Ihara Nabatava, pavodle ŭdakładnienych źviestak, 348 pasažyraŭ i 17 rabotnikaŭ čyhunki byli evakujavany ź ciahnika «Minsk — Homiel» z-za pahroz adnaho z pasažyraŭ uzarvać sastaŭ. Zdareńnie adbyłosia pamiž Žłobinam i Čyrvonym Bieraham 20 studzienia prykładna ŭ 18.00. Małady čałaviek padyšoŭ da pravadnika pieršaha vahona i zajaviŭ, što ciahnik zaminiravany. Pravadnik prainfarmavaŭ ab hetym načalnika sastava, a toj — u milicyju i MNS.
Na miesca zdareńnia vyjechali supracoŭniki MNS, milicyi, KDB i hrupa raźminiravańnia. Pasažyry i rabotniki ciahnika byli evakujavanyja, zatym dastaŭleny na aŭtobusach u Žłobin. Z rajcentra pasažyraŭ na dyziel-ciahniku adpravili ŭ Homiel. Hrupa raźminiravańnia nie znajšła ŭ ciahniku vybuchovaj pryłady.
«Uzryŭnik» sprabavaŭ uciačy, ale byŭ zatrymany. Zatrymka ciahnika skłała pryblizna try hadziny.
Z-za NZ byli zatrymany vosiem ciahnikoŭ — piać pasažyrskich i try pryharadnyja.
Rabotniki ciahnika paviedamili, što pasažyr znachodziŭsia ŭ stanie ałkaholnaha apjanieńnia i pavodziŭ siabie nieadekvatna — debašyryŭ, łajaŭsia, tamu jašče ŭ Babrujsku pravadniki ciahnika vyklikali milicyju, kab ucichamiryć chulihana. Ale da hetaha času jon sam supakoiŭsia,
i ŭ milicyju jaho nie zabrali.
Kali ciahnik adjechaŭ ad Babrujska, małady čałaviek staŭ znoŭ vykazvać ahresiŭnaść. Pavodle słoŭ pravadnikoŭ, jon kryčaŭ, što źjaŭlajecca rabotnikam vajenizavanaj achovy BČ, zajaŭlaŭ, što ciahnik zaminiravany. U AUST paviedamili, što pakul ustanaŭlivajecca, ci sapraŭdy «ŭzryŭnik» źjaŭlajecca supracoŭnikam vajenizavanaj achovy.
Kamientary