Sachaščyk patłumačyŭ, navošta pisaŭ svoj sakretny list pra ataki bieśpiłotnikaŭ pa Biełarusi

Pavodle taho lista, jaki trapiŭ da žurnalistaŭ telekanała «Biełsat», nibyta biełarusy ź Litvy i Polščy, jakija źviazanyja z «Paspalitym rušańniem» i «Lićvinami» (dobraachvotnickaje abjadnańnie biełarusaŭ u Litvie), rychtavali ŭdarny bieśpiłotnik dla taho, kab atakavać abjekty enierhietyčnaj infrastruktury ŭ Biełarusi. Valeryj Sachaščyk, kali žurnalisty «Biełsata» jaho zapytalisia, ci nie fejk heta, paćvierdziŭ, što list sapraŭdny, ale vielmi prasiŭ jaho nie publikavać, a ad inšych kamientaroŭ tady admoviŭsia.

Pavodle ciapierašniaj zajavy Sachaščyka, pahroza pravakacyi, pra jakuju pisałasia ŭ liście, sapraŭdy isnavała. Adpaviednuju ž infarmacyju jon nibyta atrymaŭ «z aficyjnych krynic u kampietentnych viedamstvach šerahu zachodnich krain».

Metaj ža lista było apaviaščeńnie pra mahčymyja nastupstvy «ŭsich, chto moh być niejak źviazany z hetaj situacyjaj».

«My nie abvinavačvali i nie škodzili imidžu adrasataŭ, a naadvarot, zrabili ŭsio, što ŭ našych siłach, kab praduchilić vielmi niehatyŭnyja dla ich nastupstvy z boku zachodnich krain-partnioraŭ, pryčym vyklučna ŭ kanfidencyjnym paradku», — padkreślivaje Sachaščyk.

Pavodle jaho, «havorka išła pra prafiłaktyčnaje pravavoje infarmavańnie, abaronu žyćciaŭ biełarusaŭ i praduchileńnie vajennaj eskałacyi, jakaja vyklučna ŭ intaresach Rasii».

Pry hetym Sachaščyk abiacaje, što «my i ŭ dalejšym praciahniem vykonvać svaje abaviazki pa praduchileńni lubych pravakacyj, zdolnych nanieści škodu biełarusam i hulać na ruku režymam Łukašenki i Pucina».

Što da škody ahulnaj spravie, to jana naniesienaja była, ale «nie našym dakumientam, a asobami, jakija arhanizavali jaje ŭciečku ŭ ŚMI i KDB, a taksama dapuścili publikacyju dakumienta».

Śpiecsłužby ž Łukašenki, pa słovach Sachaščyka, «u svaju čarhu, pa daŭniaj tradycyi nie prydumali ničoha lepš, čym maksimalna razdźmuć uzrovień pahrozy i prypisać sabie niejkija «vostryja čekisckija mierapryjemstvy» dla ptušački i premii».

Na zakančeńnie Sachaščyk zaklikaje niezaležnyja biełaruskija ŚMI «nie publikavać dakumienty z hryfam sakretnaści i nie pravakavać tym samym kanfliktnuju situacyju ŭnutry demakratyčnych sił». 

• 32
• 0
• 9
• 30
• 6
• 4
• 5
• 0