Adnapartyjec Bierłuskoni raskazaŭ, jak Pucin pačastavaŭ taho śviežavyrazanym sercam kazuli
Eks-sienatar ad partyi Bierłuskoni «Napierad, Italija!» Fabrycya Čykita sa spasyłkaj na apoviedy samoha Bierłuskoni śćviardžaje, što Pucin padčas adnaho z palavańniaŭ asabista raskryžavaŭ kazulu i adrazu pačastavaŭ palityka jaje syrym sercam. Hety ŭčynak Pucina, pa słovach Čykita, «da młosnaści šakavaŭ» tahačasnaha italjanskaha premjera.
«Pamierły eks-premjer Italii Silvia Bierłuskoni jašče ŭ 2013 hodzie byŭ pačastavany z ruk Pucina syrym sercam kazuli, jakuju rasijski prezident asabista raskryžavaŭ adrazu paśla jaje zabojstva na palavańni», — piša bujnoje italjanskaje vydańnie Corriere della Sera sa spasyłkaj na ŭspaminy byłoha adnapartyjca Bierłuskoni Fabrycya Čykita.
Čykita śćviardžaje, što Bierłuskoni sam raspavioŭ jamu hetuju historyju jašče pry žyćci i što zdaryłasia jana ŭ časie adnoj z sustreč Pucina i Bierłuskoni ŭ Rasii bolš za 10 hadoŭ tamu.
Pavodle słoŭ eks-sienatara, Bierłuskoni tady pahadziŭsia pajści na palavańnie z Pucinym, choć sam «nikoli nie dakranaŭsia da strelby». Dalejšy apovied byłoha italjanskaha premjera, sa słovaŭ Čykita, vyhladaŭ tak.
«Kali my pryjšli ŭ les, Pucin daŭ mnie strelbu i praź niekatory čas zaŭvažyŭ dźviuch kazul. Jon pakazaŭ mnie na adnu ź ich sa słovami: «Heta tvaja. Stralaj». Ja tady skazaŭ, što lepš zastrelusia sam. Pačuŭšy moj adkaz, jon streliŭ u abiedźviuch i zabiŭ ich.
Paśla hetaha Pucin spuściŭsia da adnoj z zabitych žyviołaŭ i asabista raskryžavaŭ jaje, dastaŭšy serca i zatym daŭšy jaho syry kavałak mnie na draŭlanym padnosie sa słovami: «Heta budzie vydatnaja ježa», — pierakazvaje Fabrycya Čykita słovy eks-premjera Italii.
Pieršaj reakcyjaj Bierłuskoni na ŭčynak Pucina było toje, što palityk «schavaŭsia za drevam, i jaho zvanitavała», śćviardžaje Fabrycya Čykita.
Apisvajučy adnosiny Pucina i Bierłuskoni, eks-sienatar adznačyŭ: «Jany zachaplalisia adzin adnym, i ich adnosiny byli absalutna roŭnymi. Pucin ličyŭ Bierłuskoni hienijalnym čałaviekam, a toj ličyŭ Pucina prahmatykam, ź jakim možna šmat čaho abmiarkoŭvać i rabić razam: ad biznesu da žančyn».
Nahadajem, što były premjer-ministr Italii Silvia Bierłuskoni pamior letaś va ŭzroście 86 hadoŭ. Palityk byŭ viadomy ciesnym siabroŭstvam z Uładzimiram Pucinym i navat adznačyŭsia niekalkimi sprečnymi zajavami pra Ukrainu.
Kamientary