U Homieli asudzili ŭradženca Kamčatki, jakoha za ŭdzieł u bajavych dziejańniach va Ukrainie pamiłavaŭ Pucin
U studzieni hetaha hoda ŭ budynak DAI Homielskaha abłvykankama ŭvajšoŭ hramadzianin Rasii i pacikaviŭsia, dzie jon moža zabrać svajo paśviedčańnie kiroŭcy. Potym pačalisia pryhody.
Mužčyna rastłumačyŭ, što ŭ 2006 hodzie žyŭ u Homieli, vučyŭsia ŭ aŭtaškole, zdaŭ ekzamieny, a voś dakumient atrymać nie zmoh. Naviedvalnika pravieryli pa milicejskich bazach i tut ža zatrymali.
Za što, «Mocnyja Naviny» daviedalisia z vyraku suda Čyhunačnaha rajona Homiela, niadaŭna apublikavanaha ŭ Banku sudovych rašeńniaŭ. Raźbiralnictva išło pa artykule ab parušeńni termina zabarony ŭjezdu ŭ Biełaruś. Sankcyja — štraf, abo aryšt, abo pazbaŭleńnie voli na termin da 1 hoda.
Jak vynikaje z tekstu prysudu, u zatrymanaha ŭ budynku DAI ŭradženca Kamčatki akazałasia bahataja kryminalnaja bijahrafija.
U 2018 hodzie ŭ Minsku rasijanin atrymaŭ dźvie zapar sudzimaści za niezakonny abarot narkotykaŭ u składzie złačynnaj hrupy. Kančatkova jamu pryznačyli pakarańnie ŭ vyhladzie pazbaŭleńnia voli na termin 16 hadoŭ z adbyvańniem u papraŭčaj kałonii va ŭmovach uzmocnienaha režymu, z kanfiskacyjaj usioj majomaści. Druhaja sudovaja instancyja paźniej źniziła termin na paŭhoda. Heta značyć, na volu asudžany pavinien byŭ vyjści paśla 2030 hoda. A voś u Homiel jon pryjechaŭ užo z pahašanymi sudzimaściami, heta značyć akazaŭsia čysty pierad zakonam. Ale nie biełaruskim.
Akazałasia, što adbyvać termin u Biełarusi rasiejec nie zachacieŭ, vyjaviŭ žadańnie «siadzieć» na radzimie i jaho chadajnictva zadavolili. Uviesnu 2021 hoda z kałonii ŭ Viciebskaj vobłaści, dzie jon adbyvaŭ pakarańnie, jaho etapavali na Kamčatku, ale pierad hetym była vyniesienaja pastanova ab vysyłcy hramadzianina RF u prymusovym paradku z zabaronaj ujezdu ŭ Biełaruś terminam na 10 hadoŭ. Mužčynu papiaredzili ab kryminalnaj adkaznaści, kali jon ujedzie ŭ Biełaruś raniej za 1 krasavika 2031 hoda. Čamu jon vyrašyŭ, što ŭžo možna?
«Znachodziačysia ŭ papraŭčaj kałonii, pa prapanovie Ministerstva abarony Rasiejskaj Fiederacyi jon padpisaŭ kantrakt na paŭhoda, paśla čaho byŭ nakiravany ŭ zonu praviadzieńnia «SVA» [tak prapahanda nazyvaje vajnu va Ukrainie — NN]. Za heta Ukazam prezidenta Rasijskaj Fiederacyi ź jaho była źniata sudzimaść. Paśla atrymańnia ranieńnia i nastupnaha lačeńnia, jon demabilizavaŭsia i nakiravaŭsia ŭ h. Homiel na aŭtobusie Maskva — Homiel, kab zabrać z DAI svajo paśviedčańnie kiroŭcy», — adznačajecca ŭ prysudzie i ŭdakładniajecca, što fihuranta Uładzimir Pucin pamiłavaŭ 14 traŭnia 2023 hoda «sa zdymańniem sudzimaściaŭ, u tym liku niepahašanych na datu prymianieńnia ŭkaza».
Abvinavačany svaju vinu poŭnaściu pryznaŭ i rastłumačyŭ, što ŭ Biełaruś viarnuŭsia, bo paličyŭ, što ŭsie abmiežavańni ź jaho źniaty. Za zaŭčasny ŭjezd u Biełaruś rajsud pakaraŭ rasiejca aryštam terminam na 3 miesiacy.
Stała viadoma, chto žanich byłoj deputatki Maryi Vasilevič26
Kamientary