Pačynajecca sud nad bratam zasnavalnika EPAM. Jamu pahražaje da 15 hadoŭ
Siamiona Dobkina i jaho namieśnika Juryja Žułajeva abvinavačvajuć u atrymańni chabaru ŭ asabliva bujnym pamiery.
Na łavie padsudnych apynulisia Siamion Dobkin, brat zasnavalnika EPAM Arkadzia Dobkina, i jahony 42-hadovy namieśnik Juryj Žułajeŭ. Jany pracavali ŭ kampanii HKSB, jakaja źjaŭlajecca najbujniejšaj ciepłatechničnaj kampanijaj na terytoryi Biełarusi.
Kampanija vypuskaje vodanahravalnyja i paravyja katły na vadkim i ćviordym palivie, harełki, utylizatary, błočna-modulnyja kacielni i inšaje inžyniernaje abstalavańnie dla žyllova-kamunalnych haspadarak, a taksama budaŭničych arhanizacyj i inšych subjektaŭ sacyjalnaha pryznačeńnia.
Abstalavańnie, stvoranaje kampanijaj, vykarystoŭvajecca na kurorcie «Siličy», u Nacyjanalnaj biblijatecy i inšych bujnych abjektach.
«Naša Niva» paviedamlała pra zatrymańni ŭ kampanii Siamiona Dobkina ŭ śniežni 2023-ha.
Sud pačniecca 9 lipienia 2024 hoda ŭ sudzie Leninskaha rajona Bresta. Sudzić ich budzie Dźmitryj Šuryn, jaki zamazaŭsia i ŭ palityčnych spravach.
Abodvuch mužčynaŭ vinavaciać pa treciaj, samaj surjoznaj častcy artykuła 430 KK, «atrymańnie chabaru». Heta moža być jak atrymańnie chabaru ŭ asabliva bujnym pamiery, hetak i arhanizavanaj hrupaj abo asobaj, jakaja zajmaje adkaznaje stanovišča. Sutnaść abvinavačańnia i akaličnaści spravy nieviadomyja.
Im pahražaje ad 5 da 15 hadoŭ kałonii sa štrafam.
Brat Siamiona, zasnavalnik EPAM Arkadź, žyvie ŭ ZŠA. Jon nie viartaŭsia ŭ Biełaruś z taho času, jak Łukašenka nazvaŭ jaho «drobkinym» i abvinavaciŭ u finansavańni pratestaŭ.
«Naša Niva» — bastyjon biełaruščyny
PADTRYMAĆŠto zapisana aficyjnaj pryčynaj śmierci adzinaha syna Jarmošynaj?9
Kamientary