Francyja hałasuje na parłamienckich vybarach: ci pryjduć da ŭłady ultrapravyja?

U minułuju niadzielu, u pieršym tury parłamienckich vybaraŭ, kožny treci francuzski vybarščyk padtrymaŭ RN — krajnie pravuju partyju na čale z Maryn Lo Pen i Žardanam Bardełaj, jakaja ŭ minułym nazyvałasia «Nacyjanalny front». Suprać hetaj palityčnaj siły nie raz vysoŭvalisia abvinavačańni ŭ rasiźmie i isłamafobii, adnak jaje pradstaŭniki heta admaŭlajuć. 

Prezident Francyi Emanuel Makron niečakana abviaściŭ u krainie pazačarhovyja parłamienckija vybary ŭ pačatku červienia, adrazu paśla hałasavańnia za deputataŭ Jeŭraparłamienta, dzie ŭ Francyi pieramahło mienavita «Nacyjanalnaje abjadnańnie». 

Praz tydzień paśla pieršaha turu francuzy zmušanyja vybirać pamiž pieršym ultrapravym uradam sučasnaści i palityčnym tupikom, kali ni ŭ adnoj z palityčnych sił nie budzie sił dla samastojnaha stvareńnia kabinieta. 

Akramia taho, vybarščyki bajacca, što krainu čakajuć biesparadki, chto b ni pieramoh. 

Što havorać apytańni i jakim moža być vynik

Sudziačy pa vynikovych apytańniach hramadskaj dumki, «Nacyjanalnaje abjadnańnie» moža raźličvać na 200 miescaŭ u parłamiencie Francyi, u toj čas jak dla bolšaści patrabujecca 289 deputataŭ. 

Šancy vielmi pravych na pieramohu značna źnizilisia paśla taho, jak ad udziełu ŭ vybarach admovilisia 217 kandydataŭ, jakija pradstaŭlajuć levy «Novy narodny front» i centrysckah aljansu Makrona. Zadača takoha chodu — kansalidavać hałasy supiernikaŭ RN i pieraškodzić pośpiechu hetaj siły. 

Aljans «Novy narodny front» składajecca z sacyjalistaŭ, zialonych i kamunistaŭ, ale jaho najbujniejšaja partyja — heta «Niepakornaja Francyja», jakuju ŭznačalvaje prychilnik krajnie levych pohladaŭ i praciŭnik akazańnia vajennaj dapamohi Ukrainie Žan-Luk Miełanšon. 

Jaho supierniki asudžajuć jaho jak ekstremista, i jon, viadoma, nie zjaŭlajecca sajuźnikam Makrona. 

Dźvie palityčnyja siły vyrašyli razam dužacca suprać RN, ale pamiž imi niama nijakaj simpatyi. 

«Niemahčyma pieramahčy krajnie pravych z dapamohaj krajnie levych», — skazaŭ ministr unutranych spraŭ krainy Žerald Darmanien, choć kandydat ad partyi «Niepakornaja Francyja» admoviŭsia ad udziełu, kab dapamahčy jamu pieramahčy. 

Centrysty Makrona zajmajuć treciaje miesca ŭ apytańniach, značna sastupajučy «Narodnamu frontu» i «Nacyjanalnamu abjadnańniu». 

«My možam stać śviedkami stvareńnia adzinaj partyi Miełanšona-Makrona, — zajaviŭ Bardeła. — I hety haniebny sajuz byŭ stvorany z adzinaj metaj — nie dać nam pieramahčy». 

Apytańniam hramadskaj dumki nie zaŭsiody možna daviarać, tamu vynik vybaraŭ pradkazać niemahčyma: u kožnaj z 500 akruh iduć bitvy pamiž kankretnymi kandydatami, i vybarščyki nie zaŭsiody vykonvajuć pažadańni palityčnych lidaraŭ. 

Ekśpierty havorać ab troch mahčymych scenarach: 

Kali RN atrymaje kala 250 hałasoŭ u parłamiencie, hetaja partyja moža pasprabavać stvaryć razam z sajuźnikami ŭrad mienšaści. Z padobnaj kolkaściu deputataŭ pryjšłosia farmavać kabiniet partyi Makrona, adnak mienavita niestabilnaść takoj kaalicyi vymusiła prezidenta abjavić ab vybarach. Hety scenar ekśpierty, zrešty, ličać małavierahodnym.

Akramia taho, supierniki RN mohuć stvaryć šyrokuju kaalicyju, u jakuju ŭvojduć usie palityčnyja siły, akramia «Niepakornaj Francyi». Hetaja ideja nabiraje padtrymku, chacia niadaŭna lidar «zialonych» zajaviŭ, što ni pry jakich umovach nie padtrymaje «makranoŭskaha premjer-ministra».

Jość taksama razmovy ab mahčymaści farmavańnia ŭrada technakrataŭ, padobnaha da taho, jaki zjaviŭsia ŭ Italii padčas ekanamičnaha kryzisu.

Da Alimpijskich hulniaŭ u Paryžy zastałosia ŭsiaho 20 dzion, i jość aściarohi, što ŭ Francyi moža nie być urada ci premjer-ministra, kali kraina budzie prymać takuju ​​važnuju padzieju. 

Francuzy bajacca hvałtu

Pakul palityki spračajucca ab mahčymych vynikach vybaraŭ, žychary krainy apasajucca biesparadkaŭ i źviazanaha z palitykaj hvałtu. 

Situacyja napiaredadni hałasavańnia nastolki napružanaja, što ŭ krainie dadatkova zadziejničana 30 tys. palicejskich. 

Ministr unutranych spraŭ Žerald Darmanien zajaviŭ, što padčas pieradvybarnaj kampanii adbyŭsia 51 napad na kandydataŭ u parłamient, ich namieśnikaŭ ci partyjnych aktyvistaŭ. Vinavatymi takich napadaŭ jon nazvaŭ ludziej, jakija pradstaŭlajuć samyja roznyja płasty hramadstva, a nie niejkuju adnu palityčnuju siłu. 

Niezadoŭha da vybaraŭ adna z ekstremisckich hrup apublikavała ŭ internecie śpis z amal 100 advakataŭ, jakich jana prapanoŭvała «likvidavać» paśla taho, jak jany padpisali adkryty list suprać «Nacyjanalnaha abjadnańnia». 

U pieradvybarnaj prahramie RN havorycca ab źnižeńni koštu žyćcia i padtrymańni pravaparadku, adnak mnohija zakłapočanyja ich zajavami suprać mihracyi i mihrantaŭ. 

RN maje namier addać pieravahu hramadzianam Francyi pierad mihrantami ŭ adnosinach da pracy i žylla. Hetaja partyja taksama žadaje admianić prava na aŭtamatyčnaje atrymańnie francuzskaha hramadzianstva dla dziaciej, jakija naradzilisia ŭ siemjach zamiežnikaŭ. 

Pa ich płanach, žychary krainy z padvojnym hramadzianstvam taksama straciać prava zajmać mnostva pasad, źviazanych ź biaśpiekaj. 

Hałasavańnie ŭ Francyi pačałosia ŭ 08:00 pa miascovym časie, a pieršyja ekzit-poły čakajucca ŭžo praz 12 hadzin.

• 0
• 0
• 0
• 0
• 2
• 0
• 0
• 0