«Makron kinuŭ Francyju pad aŭtobus». Što piša presa pra vybary ŭ Francyi i ich pieršyja vyniki
Francyja pieražyvaje šok paśla pieramohi pravych papulistaŭ u pieršym tury vybaraŭ u parłamient Francyi — BILD sabraŭ hałoŭnyja kamientary presy.
U pieršym tury pazačarhovych vybaraŭ u Francyi pieramohu atrymała partyja «Nacyjanalnaje abjadnańnie» pad kiraŭnictvam Maryn Lo Pen i Žardana Bardeły. Na druhim miescy apynułasia partyja «Novy narodny front», a na trecim — prezidenckaja kaalicyja «Razam za Respubliku».
Takim čynam, Emanuel Makron nie tolki raspuściŭ Nacyjanalny schod i inicyjavaŭ daterminovyja vybary z abmiežavanym terminam padrychtoŭki ŭ 20 dzion, ale i prajhraje ich ź vialikim adryvam. Prychilniki levych partyj praviali akcyju na płoščy Respubliki ŭ znak pratestu suprać vysokaha vyniku ŭltrapravych.
Le Figaro: «Francuzskaja trahiedyja»
Hazieta Le Figaro ŭ svaim kamientary nazyvaje situacyju «francuzskaj trahiedyjaj» i piša: «Kali historyki azirnucca na rospusk parłamienta, im pryjdzie na rozum tolki adno słova: katastrofa!»
Hałoŭny redaktar haziety aburajecca: «Dziakuj, Makron za kryzis režymu». Niahledziačy na heta, pamiž pravymi papulistami (RN) i levymi ekstremistami («Novy narodny front») Figaro nazyvaje pieršych mienšym złom: «Prahrama RN vyklikaje niepakoj u mnohich aśpiektach, ale ź inšaha boku — antysiemityzm, isłamski levizm, nienavisnaja kłasavaja baraćba, padatkovaja isteryja… Ideałohija, jakaja pryniasie krainie hańbu i spustašeńnie».
Libération: Zaklik da błakady pravych
Levaja hazieta Libération zaklikaje da błakady pravych: «Kiraŭnik dziaržavy kinuŭ Francyju pad aŭtobus. Ale hety aŭtobus praciahvaje ruchacca i ŭžo staić kala bramy Macińjona [rezidencyja premjer-ministra]. Adziny sposab pieraškodzić jamu — respublikanskaja błakada źleva».
Les Échos: «Kaniec epochi»
Ekanamičnaja hazieta Les Échos piša pra «kaniec epochi», ale nie zaklikaje da błakady razam ź levymi. Pavodle zajavy vydańnia, levyja ekstremisty taksama nieprymalnyja. Lidar partyi Žan-Luk Miełanšon — «pudziła», a jaho kandydaty, jakija nosiać palestynskija chustki, «prosta epatujuć», ale nie majuć palityčnych kancepcyj.
Politico: «Makron užo prajhraŭ»
Vydańnie Politico piša pra Makrona: «Pieršy tur parłamienckich vybaraŭ u niadzielu staŭ asabistym prynižeńniem». Ciapier Makron staić pierad horkim vybaram: sprabavać spynić vielmi pravych abo vyratavać reštki svajoj kaliści daminujučaj partyi, pierš čym jana źniknie, piša vydańnie. «Makron užo prajhraŭ. Ci moža chto-niebudź spynić Lo Pen?» — havorycca ŭ kamientary.
Die Zeit: «Što ruchała Makronam?»
Hazieta Die Zeit zadajecca pytańniem, što zaachvociła Makrona raspuścić parłamient paśla vybaraŭ u Jeŭraparłamient: «Redka kali adzin čałaviek u zachodniaj demakratyi prymaŭ takoje adzinočnaje rašeńnie. Z-za samaŭpeŭnienaści, abražanaha honaru abo inšych matyvaŭ — hetaje pytańnie budzie zajmać historykaŭ».
Wall Street Journal: «Nie paŭtarajcie staŭki Makrona»
Hazieta Wall Street Journal piša: «Kali vy znachodziciesia z Emanuelem Makronam u kazino, nie paŭtarajcie jaho staŭki. <…> Jaho staŭka była na toje, što vybarščyki praćvieraziejuć, kali sprava dojdzie da Nacyjanalnaha schodu. Zamiest hetaha jany vypili jašče adzin dvajny».
«Pavinien vyjści Pačobut». Polski ministr Sikorski znoŭ zahavaryŭ pra mahčymaje zakryćcio miažy dla hruzaŭ12
Kamientary
Jakoje etałonnaje vyćcio na levackich śmietnikach