Prodažy novych aŭto bjuć rekordy. Ci ŭdałosia dyleram vyjści na davajenny ŭzrovień?

Ale rabić vysnovy, abapirajučysia na vysoki rost u paraŭnańni ź minułym hodam, nie vielmi relevantna, bo letaś dylery ŭsio jašče mieli prablemy z pastaŭkami novych aŭto. Tamu dla lepšaha razumieńnia situacyi treba aryjentavacca na davajennyja pakazčyki.

I, jak pakazvaje statystyka, navat u paraŭnańni z davajennym 2021 hodam prodažy ŭ dyleraŭ iduć dobra. 

U 2021-m dylery pradali 41 217 novych lehkavych aŭto. Heta pa 3435 adzinak u siarednim za miesiac. 

U traŭni biahučaha hoda aficyjnyja dylery pradali 3 744 aŭto, a ŭ červieni — 4 044 aŭto, što bolš, čym u siarednim za miesiac ciaham 2021 hoda.

Kali dynamika zachavajecca, biełaruskija dylery mohuć nie tolki dasiahnuć davajennych abjomaŭ prodažaŭ, ale i pieravysić ich. 

Nie ŭsio tak adnaznačna

Nahadajem, što viasnoju pradstaŭniki Biełaruskaj aŭtamabilnaj asacyjacyi zajaŭlali pra toje, što pierahledziać prahnozy pa prodažy novych aŭto ŭ bok pavieličeńnia ŭ suviazi z novymi abmiežavańniami. 

Dadatkovyja abmiežavańni pa imparcie mašyn ź ES z abjomam ruchavika bolš za 1,9 litra jany nazyvali istotnym faktaram, jaki pazityŭna ŭpłyvaje na rynak dylerskich prodažaŭ. Tak i było: niejki čas novyja patrabavańni sapraŭdy hrali na ruku aficyjnym dyleram, bo ŭ adroźnieńnie ad fizičnych asob jany mahli atrymać ad vytvorcaŭ nieabchodnyja dazvoły na ekspart mašyn u Biełaruś.

Biełarusy zastanucca biez novych Porsche

Adnak novy pakiet sankcyj, pryniaty 29 červienia, niehatyŭna adabjecca na pracy dyleraŭ. 

Ciapier jany bolš nie zmohuć uvozić u Biełaruś mašyny, daražejšyja za 50 tysiač jeŭra, bo hetaje abmiežavańnie tyčycca jak fizičnych asob, tak i kampanij. Z rehłamientu ES vynikaje, što biełaruskija dylery zmohuć pastaŭlać takija aŭto ŭ Biełaruś tolki da 1 kastryčnika — u vypadku, kali kantrakt byŭ zaklučany da 1.07.2024.

Praź niekatory čas dylery BMW, Mercedes-Benz, Audi mohuć zastacca biez aŭto, pakolki mnohija madeli trapili pad zabaronu na prodaž u Biełarusi. Porsche, jaki dahetul aficyjna pracavaŭ u Biełarusi, ryzykuje całkam zastacca biez novych pastavak, pakolki ŭ madelnym šerahu Porsche nie isnuje mašyn koštam da 50 tysiač jeŭra.

• 4
• 1
• 7
• 0
• 0
• 0
• 1
• 0