«Dzieci hulali, a źmiaja płavała ŭ łužynie». U rajonie Barysava našeście hadziuk — kamunalniki nie reahujuć
Atrutnych źmiej znachodziać na dziciačych placoŭkach, kala padjezdaŭ žyłych damoŭ, u śmiećcievych bakach i prosta na tratuarach. Pry hetym haradskija słužby apieratyŭna nie reahujuć.
![](http://nashaniva.com/img/w840d4webp1/photos/z_2024_07/768d8e6fb2d43530a1f8d854ac389bd0-pkalo.jpg.webp)
Našeście hadziuk pieražyvajuć žychary rajona Ladzišča. Miascovyja žychary źviazvajuć aktyvizacyju źmiej ź niedahledžanaściu rajona.
U pryvatnaści, tut redka kosiać travu. U niekatorych miescach jana dasiahaje rostu čałavieka — u hetym asiarodździ źmiei adčuvajuć siabie kamfortna i razmnažajucca, piša Onliner.
«Ladzišča — były vajskovy haradok. I ciapier hety rajon, možna skazać, u zaniapadzie: darohi raźbityja, śmiećcievyja baki iržavyja, trava niakošanaja. Nie dziŭna, što ŭ nas zavialisia źmiei», — raskazvaje miascovaja žycharka.
![](http://nashaniva.com/img/w732d4webp1/photos/z_2024_07/0faa52daedf4e9d251d2440223612ada-ajxlc.jpg.webp)
Pieršuju źmiaju znajšli 12 lipienia. Dzieci hulali pobač z łužynaj, u jakoj płavała hadziuka.
«Naš susied złaviŭ jaje, pakłaŭ u słoik i advioz u les. Na nastupnuju ranicu chłapčuki źniali videa ź jašče adnoj źmiajoj. Potym susiedka natknułasia na vialikuju, nie mienš za mietr, asobinu prosta na piešachodnaj darožcy. U sumie nie mienš za piać źmiej za apošni tydzień», — kaža barysaŭčanka.
Šmat skarhaŭ na źmiej i ŭ pablikach rajona. Ludzi raskazvajuć, što rehularna natykajucca na hadziuk padčas špacyraŭ z sabakami. Daśviedčanyja ludzi ŭpeŭniena kažuć, što heta mienavita hadziuki — heta značyć atrutnyja źmiei.
![](http://nashaniva.com/img/w732d4webp1/photos/z_2024_07/b2b275858cd6af5573a82c63e0daaeae-91vur.jpg.webp)
Žychary rajona źviartalisia pa dapamohu va ŭsie instancyi: telefanavali ŭ 115, u MNS, ŽEU. Apieratyŭna adreahavać nichto nie zmoh, i tamu ludzi stali vyrašać pytańnie svaimi siłami.
«My sami znajšli ŭ internecie kasca i skinulisia na jaho apłatu. I tolki paśla taho, jak nam narešcie vykasili ŭvieś dvor, užo ranicaj ŽEU dasłała svajho śpiecyjalista. U ich usiaho adzin kasiec na ŭvieś rajon, i ŭ taho to času niama, to bienzinu — uvohule, sprabujem niejak spraŭlacca sami chiba što», — dzielicca barysaŭčanka.
Supracoŭnik NAN, kandydat bijałahičnych navuk Siarhiej Drabiankoŭ paćviardžaje — na fota sapraŭdy hadziuki. I heta niebiaśpiečna dla miascovych žycharoŭ.
«Tut usio zaležyć ad raźmiaščeńnia rajona i ekałahičnaj situacyi. Kali heta pieryfieryja i pobač jość les, a ŭ rajonie dla źmiej stvoranyja spryjalnyja ŭmovy (u pryvatnaści, taja ž vysokaja trava), to jany buduć praciahvać prypaŭzać», — adznačyŭ navukoviec.
Drabiankoŭ ličyć, što nieabchodna pryvodzić u paradak infrastrukturu i zakazvać adłoŭ na prylehłych terytoryjach.
Kamientary