Jak źmianić biełaruskija numary na litoŭskija. Što treba i kolki kaštuje pracedura?
Raskazvajem, jak pastavić na ŭlik u Litvie mašynu ź Biełarusi.
Chto moža zarehistravać aŭto ŭ Litvie?
Biełarusy, jakija žyvuć u Litvie pa časovym abo pastajannym DNŽ, majuć prava pastavić svaje biełaruskija aŭtamabili na litoŭski ŭlik. Kali DNŽ jašče niama, to atrymać litoŭskija numary nie atrymajecca.
Pieršy važny momant, na jaki varta źviarnuć uvahu, heta data rehistracyi vašaha aŭtamabila ŭ Biełarusi. Aŭtamabil pavinien być kupleny vami minimum za 6 miesiacaŭ da daty pierajezdu ŭ Litvu, kali być dakładniej, daty atrymańnia DNŽ.
Pieršyja kroki
Rehistracyjaj transpartnych srodkaŭ u Litvie zajmajecca Regitra (anałah našaha rehistracyjnaha adździaleńnia DAI).
Ale pakolki vaš aŭtamabil ličycca tavaram z trecich krain, pierad rehistracyjaj nieabchodna prajści ekśpiertyzu na adpaviednaść aŭtamabila jeŭrapiejskim standartam.
Ekśpiertyzu pravodzić arhanizacyja pad nazvaj Tuvlita. Za lehkavy aŭtamabil treba zapłacić 90 jeŭra. Kali vaš aŭtamabil ad pačatku byŭ pryznačany dla jeŭrapiejskaha rynku, to praceduru možna nazvać farmalnaj.
Kali vy ŭłaśnik aŭto z ZŠA, mašynu treba budzie daabstalavać supraćtumannaj faraj na tylnaj častcy aŭto.
Paśla ekśpiertyzy treba prajści techahlad, košt pasłuhi — 23 jeŭra. Jon trochi adroźnivajecca ad biełaruskaha techahladu, ale nieistotna.
Nastupny etap — kupla litoŭskaj strachoŭki. Jana musić być vypisanaja da taho, jak vy budziecie padavać dakumienty ŭ Regitra.
U zaležnaści ad strachavoj kampanii jana moža kaštavać ad 150 da 300 jeŭra na hod.
Što dalej
Majučy na rukach siertyfikat adpaviednaści aŭto jeŭrapiejskim standartam (ekśpiertyzu), techahlad i strachoŭku, možna adpraŭlaccca na źvierku VIN-numaru i padaču dakumientaŭ na vydaču techpašpartu.
Vydatki na rehistracyju (techpašpart i numary) składajuć kala 35 jeŭra.
U zaležnaści ad uzroŭniu ekałahičnaści aŭto, z vas mohuć uziać ekałahičny padatak. Jaho suma zaležyć ad abjomaŭ škodnych vykidaŭ i moža składaje ad 13,5 da 540 jeŭra. Za novyja i bolš-mienš sučasnyja aŭtamabili padatak nulavy.
Padatak na škodnyja vykidy treba płacić tolki adzin raz pry pastanoŭcy na ŭlik. Štohadovaha padatku na aŭto ŭ Litvie niama.
Niahledziačy na toje, što pracedura pastanoŭki na ŭlik biełaruskaha aŭtamabili moža zdavacca składanaj, źmianić krainu prapiski možna za adzin dzień.
Biełarusy, jakija niadaŭna prachodzili hetuju praceduru kažuć, što na ŭsio sychodzić 4-5 hadzin.
Što ź biełaruskim techpašpartam i numarami?
Biełaruski techpašpart zabiraje Regitra. Z numarami, jak pakazvaje praktyka, moža być pa-roznamu. U adnych ich zabirajuć na zachoŭvańnie razam z techpašpartam, a inšym pakidajuć na rukach.
Kali biełarus raptam zachoča viarnuć aŭtamabilu biełaruskuju prapisku, to z hetym niama prablem. Ułaśniku treba budzie znoŭ źviarnucca Regitra, źniać aŭtamabil ź litoŭskaha ŭliku, paśla čaho jamu viernuć biełaruskija dakumienty i numarnyja znaki.
Pakolki atrymańnie litoŭskich numaroŭ nie aznačaje aŭtamatyčnaje źniaćcie aŭtamabila z uliku ŭ Biełarusi, vam daviadziecca štohod płacić za jaho transpartny padatak na radzimie.
Ci isnujuć niejkija abmiežavańni?
Pakolki pry takoj rehistracyi aŭto biełarusy vyzvalajucca ad apłaty mytnych płaciažoŭ, biełaruskija aŭtamabili na litoŭskaj rehistracyi nielha pradavać ciaham 12 miesiacaŭ ad daty pieršaj rehistracyi ŭ Litvie.
Kali vy zachočacie pradać aŭtamabil raniej, to heta zrabić mahčyma, ale daviadziecca zapłacić 10% myta i 21% PDV.
Kamientary