Były premjer-ministr Vialikabrytanii i aktyŭny prychilnik vajskovaj dapamohi Ukrainie Borys Džonsan napisaŭ kałonku dla brytanskaha vydańnia Daily Mail, u jakoj śćviardžaje, što ŭ vypadku pieravybrańnia Donald Tramp zdolny vyratavać Ukrainu, piša BBC.
Na hetym tydni Džonsan sustreŭsia z Trampam na zjeździe Respublikanskaj partyi ZŠA, zajaviŭšy paśla zakančeńnia hutarki, što, pa jaho pierakanańni, Tramp u vypadku abrańnia prezidentam budzie padtrymlivać Ukrainu.
Svoj artykuł Džonsan pačynaje sa sceny zamachu na Trampa, kali paśla strełu jon nie dazvoliŭ prosta advieści siabie sa sceny, ale ŭziaŭ situacyju pad kantrol i źviarnuŭ sabie na karyść: «Heta Tramp kaža Amierycy i ŭsiamu śvietu: «Ja nie schilusia, ja nie zdamsia».
«U kancy pieršaj čverci XXI stahodździa śviet znachodzicca na rostaniach: na Blizkim Uschodzie razhortvajucca žachlivyja patencyjnyja kanflikty pamiž Izrailem i iranskimi proksi, u Paŭdniova-Kitajskim mory — za Tajvań, a na našym kantyniencie — u Jeŭropie — idzie samaja krovapralitnaja i žudasnaja vajna za apošnija 80 hadoŭ, — napisaŭ Džonsan. — Pahavaryŭšy z Donaldam Trampam na hetym tydni, ja bolš čym kali-niebudź pierakanaŭsia ŭ tym, što ŭ jaho chopić sił i śmiełaści ŭsio vypravić, vyratavać Ukrainu, prynieści mir i spynić pahibielnaje raspaŭsiudžvańnie kanfliktu».
«Što b ni kazali inšyja respublikancy pra Ukrainu ŭ minułym, ja vieru, što Tramp razumieje realnaść: paraza Ukrainy budzie vielizarnaj parazaj Amieryki», — śćviardžaje Džonsan.
«Ja vieru, što Tramp moža pakłaści hetamu kaniec — na pravilnych dla Ukrainy i Zachadu ŭmovach. Padkreślivaju, što nie mahu być upeŭnieny, što mienavita jon zrobić, kali jaho vybieruć. Ale heta toje, što jon moh by zrabić», — miarkuje były premjer.
«U ciapierašni momant rasiejcy vykarystoŭvajuć płanujučyja avijabomby, kab nanieści značnyja straty ukrainskim pazicyjam. Ale ŭkraincy nie mohuć adkazać, tamu što ZŠA nie dazvalajuć im vykarystoŭvać ATACMS dla parazy rasijskich aeradromaŭ, a Vialikabrytanija, na žal, nie dazvalaje im vykarystoŭvać rakiety Storm Shadow, — piša Džonsan. — Tramp moh by prosta zrabić toje, što dla jaho naturalna: skončyć ź biurakratyčnymi pravałokami i zatrymkami; dać ukraincam nieabchodnyja dazvoły; a zatym, kali Pucin čarhovym razam budzie adkinuty nazad, prapanavać uhodu».
«U Trampa ŭžo jość vopyt rašučaha vajennaha ŭmiašańnia ŭ intaresach ukrainskaj demakratyi. Kali jon vierniecca da ŭłady ŭ kancy hetaha hoda, u Trampa jość vialiki šaniec nie tolki vypravić spadčynu svajho papiarednika, ale i pavieści śviet napierad», — śćviardžaje były premjer.
Ciapier čytajuć
U Sudanie paŭstancy źbili samalot ź biełaruskim vajskovym lotčykam. Voś što pra jaho viadoma8
Kamientary