U Rasii terminova šukajuć ludziej dla kapańnia akopaŭ u Kurskaj vobłaści
Pracavać prapanujuć vachtami, režym — kruhłasutačny.
U zachodnich i paŭdniova-zachodnich rehijonach Rasii šukajuć rabočych dla kapańnia akopaŭ i ŭźviadzieńnia fartyfikacyj u Kurskaj vobłaści, dzie ŭkrainskaja armija viadzie nastup.
Bolš za 30 takich vakansij apublikavana na rasijskich sajtach za apošnija dni, piša BBC.
U bolšaści abjaŭ šukajuć rabočych-vachtavikoŭ dla ŭźviadzieńnia fartyfikacyjnych zbudavańniaŭ (akopy, doty, supraćtankavyja zbudavańni) i za źmienu im prapanujuć ad 5 da 7 tysiač rasijskich rubloŭ (55-75 dalaraŭ).
«Dla ŭźviadzieńnia druhoj (reziervovaj) linii abarony terytoryi, u Kurskuju vobłaść na budaŭnictva fartyfikacyjnych zbudavańniaŭ (akopy, doty, supraćtankavyja zbudavańni) patrabujucca padsobniki, roznarabočyja, biez dośviedu», — havorycca ŭ adnoj z abjaŭ, raźmieščanych Pieciarburhskaj budaŭničaj kampanijaj.
Vakansii raźmiaščajuć u asnoŭnym budaŭničyja kampanii i firmy, jakija śpiecyjalizujucca na padbory vachtavikoŭ. Adna i taja ž abjava dublujecca na roznyja rehijony, uklučajučy Maskvu, Pieciarburh i Arłoŭskuju vobłaść. Vakansii taksama abiacajuć dalejšaje pracaŭładkavańnie ŭ budaŭničaj kampanii.
Pry hetym ukazany zarobak składaje ŭ siarednim ad 150 da 210 tysiač rasijskich rubloŭ u miesiac (1650-2300 dalaraŭ), i da 371 tysiačy (4000 dalaraŭ) za 60 dzion pracy ŭ niekatorych abjavach. Tym, chto vyrašyć zastacca na druhi miesiac, prapanujuć bolš ščodryja vypłaty.
Taksama šukajuć mašynistaŭ husieničnaha ekskavatara z prapanavanym zarobkam da tysiačy rubloŭ (11 dalaraŭ) za hadzinu. U abjavie taksama pakazana što abjekt znachodzicca ŭ horadzie Kursk, na «druhoj linii abarony» i što praca zaklučajecca ŭ «kapańni akopaŭ». Režym pracy pry hetym zajaŭleny jak «kruhłasutačny».
U niekatorych abjavach ukazana abaviazkovaja adpracoŭka na miascovych placoŭkach dva tydni (Maskva, Pieciarburh, Ufa) da adpraŭki ŭ Kursk, jakaja adbudziecca «tolki pa žadańni kandydata».
U bolšaści vakansij kolkaść patrebnych rabotnikaŭ nie paznačana, akramia adnaho abjavy ad pryvatnaj asoby ŭ Krymie ad 11 žniŭnia, jaki kaža, što patrabujecca «50-100 čałaviek» na kapańni akopaŭ u Kursku.
U abjavie padkreślivajecca, što pracavać treba budzie «pa-za zonaj bajavych dziejańniaŭ» i «niebiaśpieka na pracy adsutničaje».
Ciapier čytajuć
Kaho ź biznesmienaŭ Łukašenka paklikaŭ da siabie na naradu? Była i zasnavalnica Wildberries11
Kamientary