Uvarvańnie Ukrainy na rasijskuju terytoryju zakranuła słaboje miesca Maskvy — płanavańnie na vypadak niepradbačanych abstavin.
![](http://nashaniva.com/img/w840d4webp1/photos/z_2024_08/ace2670d-2284-40d0-bc99-1559a3b366e9_cx0_cy52_cw0_w1023_r1_sjpg-2-tk2k4.jpg.webp)
Jak piša The Wall Street Journal, viasnoj hetaha hoda hienierał Alaksandr Łapin, jaki kuryravaŭ biaśpieku ŭ Kurskaj vobłaści, pryniaŭ rašeńnie raspuścić mižviedamasnuju radu pa pytańniach abarony hetaha pamiežnaha rehijona.
Pa słovach pradstaŭnika rasijskich słužbaŭ biaśpieki, Łapin skazaŭ, što tolki ŭ vajennych jość siły i resursy dla abarony miažy Rasii.
Nieviadoma, ci mahła b dapamahčy raspuščanaja Łapinym mižviedamasnaja rada, jakaja abjadnoŭvała vajskoŭcaŭ ź miascovymi i rehijanalnymi siłavikami, arhanizavać uzhodnieny adkaz na ataku. Ale biez centralizavanaha orhana, zaŭvažaje vydańnie, namahańni Maskvy pa vyciaśnieńni vojsk Kijeva da hetaha času byli chaatyčnymi i nieefiektyŭnymi.
![hienierał Aleksandr Łapin General Alexander Lapin hienierał Alaksandr Łapin](http://nashaniva.com/img/w732d4webp1/photos/z_2024_08/-vvyn6.jpg.webp)
U vyniku rasijskija siłavyja viedamstvy, takija, jak MUS i FSB, jakija adkazvajuć za ŭnutranuju biaśpieku, i Ministerstva abarony, jakoje adkazvaje za bajavyja dziejańni na terytoryi Ukrainy, vymušanyja zmahacca za lidarstva ŭ dziejańniach adkazu na ŭkrainskuju ataku.
Zrazumieła, piša vydańnie, što nie adzin Łapin vinavaty ŭ słabym stanie pamiežnaj abarony Rasii, jakaja dazvoliła ŭkrainskim vojskam chutka prasunucca ŭ Kurskaj vobłaści. Ale jaho pamyłka charakterna dla vyšejšaha kiraŭnictva, jakoje časta adarvanaje ad realij, što adbyvajucca na poli boju.
Z samaha pačatku kanfliktu centralizavanaje myśleńnie «źvierchu ŭniz» — adna z vyznačalnych rys Rasii pry prezidencie Uładzimiru Pucinie — dało advarotny efiekt na poli boju. Jano pieraškadžała ćviarozamu płanavańniu ŭ Kramli, a kali płany pravalvalisia, nie dazvalała rasijskim vojskam impravizavać, kab reahavać na chutkaje raźvićcio padziej.
Jak zaŭvažaje vydańnie, u dni, jakija papiaredničali ŭvarvańniu ŭkrainskich vojsk, kamandavańnie Łapina adpraŭlała ŭ Maskvu paviedamleńni z papiaredžańniem, što USU naroščvajuć svaju kolkaść. Ale hety truk, jak raskazali ludzi, znajomyja z pahraničnymi manieŭrami, užo prymianiaŭsia abodvuma bakami ŭ jakaści taktyki psichałahičnaj vajny, i Maskva praihnaravała papiaredžańni.
Niahledziačy na raźvieddanyja ab vajennych pieramiaščeńniach, vojski pad kamandavańniem Łapina nie raspačali dziejańniaŭ pa ŭmacavańni abarončych linij abo ŭstanoŭcy min, jak heta zrabili rasijskija sałdaty ŭ minułym hodzie, kab pieraškodzić bujnomu i šyroka anansavanamu ŭkrainskamu kontrnastupleńniu.
Kali ŭkrainskija sałdaty ŭvajšli ŭ niejtralnuju pałasu pamiž Ukrainaj i Rasijaj, jany nie sustreli supraciŭleńnia, a ŭnutry Rasii nie było nijakich sił terytaryjalnaj abarony, jakija mahli b ich zatrymać.
USU vykarystoŭvali elektronnyja pieraškody dla adklučeńnia suviazi, u vyniku čaho rasijskija padraździaleńni nie mahli źviazacca z kamandavańniem. Lohkaŭzbrojenyja rasijskija vojski apynulisia ŭ pastcy za linijaj frontu i raśsiejalisia ŭ lesie. Niekatoryja ź ich akazali łakalnaje supraciŭleńnie, ale sotni rasijskich sałdat, mnohija ź jakich byli sałdatami terminovaj słužby, prosta zdalisia ŭ pałon.
Vydańnie adznačaje, što pravał u Kurskaj vobłaści nie pieršy vypadak, kali drennaje płanavańnie i niedachop bajcoŭ syšlisia pad kamandavańniem Łapina. U pačatku vieraśnia 2022 hoda abrynułasia linija abarony rasijskich vojskaŭ na paŭnočnym uschodzie Ukrainy. Tady USU atrymałasia advajavać tysiačy kvadratnych kiłamietraŭ.
Paśla taho fijaska Ramzan Kadyraŭ patrabavaŭ adstaŭki Łapina. Niekatoryja rasijskija vajskovyja karespandenty paličyli krytyku niespraviadlivaj, pakolki hienierał byŭ tolki niadaŭna pierakinuty ŭ hety rajon. Tym nie mienš, nieŭzabavie aficer byŭ źniaty z pasady, a praź niekatory čas iznoŭ pryznačany namieśnikam kamandujučaha rasijskimi vojskami va Ukrainie.
Ciapier, sprabujučy atrymać pieravahu na svajoj terytoryi, Rasija pierakidvaje častku sił z uschodniaj Ukrainy, navat kali heta aznačaje adciahnieńnie asabovaha składu ź linii frontu.
Niaŭdały adkaz pakazaŭ, što ŭvarvańnie Ukrainy na rasijskuju terytoryju zakranuła słaboje miesca Maskvy — płanavańnie na vypadak niepradbačanych abstavin.
Kamientary
1. Sałdaty i sieržanty.
2. Staršyny i praparščyki (staršyna moža być i siarod "sałdaty i sieržanty".
3. Aficery: ad lejtenantaŭ da pałkoŭnika.
4. Hienierały: ad hienierał-majora da hienierała armii.
5. Maršały.