Padraździaleńnie rasijskaha śpiecnaza šukaje krymskaha tataryna dla achviaraprynašeńnia
U telehram-kanale dyviersijna-šturmavoj raźviedvalnaj hrupy «Rusič» 19 žniŭnia źjaviŭsia post, jaki sabraŭ 18 tysiač repostaŭ i 20 tysiač łajkaŭ.
![Nieonacisty triebovali krymskoho tatarina Neo-Nazis demanded a Crimean Tatar Nieanacysty patrabavali krymskaha tataryna](http://nashaniva.com/img/w840d4webp1/photos/z_2024_08/-8uy47.jpg.webp)
U paście ŭtrymlivałasia prośba da sumiežnaha padraździaleńnia pieradać im adnaho pałonnaha, «nie zusim słavianina» a «padvendžanaha, krymskaha tataryna ci niešta padobnaje» dla praviadzieńnia rytualnaha achviaraprynašeńnia Słavianskim Baham na śviata vosieńskaha raŭnadzienstva».
Aŭtary pasta śćviardžali, što heta im nieabchodna dla «padbadziorvańnia i ŭmacavańnia duchu novaha asabovaha składu padraździaleńnia».
Post vyklikaŭ niehatyŭnuju reakcyju navat u tych mejnstrymavych rasijskich telehram-kanałach i ŚMI, dzie raspalvańnie nianaviści da «chachłoŭ» pastaŭlenaje na kanviejer. Adnak pry hetym post nabraŭ dziasiatki tysiač łajkaŭ.
Deputat Dziarždumy ad akupavanaha Kryma Michaił Šeremiet pryhraziŭ «Rusiču» zvarotam u pravaachoŭnyja orhany i pravierkaj na ekstremizm, kali jany nie prybiaruć publikacyi i publična nie paprosiać prabačańnia.
U vyniku skandalny post byŭ vydaleny. Ale zamiest prabačeńniaŭ u telehram-kanale «Rusiča» byŭ apublikavany post, u jakim deputata nazvali «stukačom».
![Nieonacisty triebovali krymskoho tatarina Neo-Nazis demanded a Crimean Tatar Nieanacysty patrabavali krymskaha tataryna](http://nashaniva.com/img/w732d4webp1/photos/z_2024_08/2-ua20i.jpg.webp)
Jak adznačajuć ekśpierty, takoha kštałtu čałaviekanienaviśnickija zajavy stali instrumientam pijaru dla sučasnych ultrapravych. Jany sadziejničajuć rostu ŭvahi da pravakataraŭ i dapamahajuć im pradavać rekłamu i źbirać danaty.
Siarod tych, chto vajuje ŭ DŠRH «Rusič», — pieciarburhski nieanacyst Alaksiej Milčakoŭ.
![](http://nashaniva.com/img/w732d4webp1/photos/z_2024_08/rusich-kt2s1.jpg.webp)
Dyviersijna-šturmavaja hrupa śpiecyjalnaha naznačeńnia «Rusič» adkryta vykarystoŭvaje nieanacysckuju simvoliku. Adna ź jaje emblem — kałaŭrat. Jaho vy možacie bačyć na rukavie ŭ Alaksieja Milčakova na fota vyšej. Da 2022 hoda za jaho vykarystańnie ŭ Rasii sparadyčna karali, ale paśla jaho prychilniki spatrebilisia na vajnie.
Pry hetym, pa aficyjnaj viersii, Rasija raspačała vajnu va Ukrainie, bo ŭ toj da ŭłady pryjšli nieanacysty. Taksama rasijskaja i łukašenkaŭskaja prapahanda śćviardžajuć, što vajujuć suprać «satanistaŭ» za «tradycyjnyja chryścijanskija kaštoŭnaści».
U realnaści, navat krajnija nacyjanalisty va Ukrainie nie adoleli pracentavy barjer i nie trapili ŭ parłamient apošniaha sklikańnia, a napad na Ukrainu mieŭ na mecie likvidacyju jaje dziaržaŭnaści, rasčlanieńnie terytoryi i dałučeńnie bolšaj častki ziamiel da Rasii na ŭzor Daniecka i Kryma.
Luboha, chto publična vystupaje z antyvajennaj pazicyjaj, u Rasii i Biełarusi čakaje pieraśled, u toj ža čas možna być peŭnym, što nichto z tych bolš čym 18 tysiač čałaviek, jakija pierapościli zaklik da čałaviečaha achviaraprynašeńnia, pakarany nie budzie.
Kamientary