U Polščy biełarusa abvinavačvajuć u stvareńni mafii, jakaja handlavała vizami
Biełarusy i ŭkraincy arhanizavali złačynnuju hrupu, jakaja handlavała vizami, u tym liku PBH. Adna z pasłuh kaštavała 700 dalaraŭ.
U Polščy zatrymali biełarusa Aleha M., jakoha śledstva ličyć kiraŭnikom złačynnaj hrupy. Pa viersii siłavikoŭ, biełaruska-ŭkrainskaja mafija handlavała fiktyŭnymi dakumientami dla atrymańnia polskich viz, u tym liku pa prahramie PBH.
30-hadovy biełarus žyŭ u Polščy pa dazvole na žycharstva z 2017 hoda. Hrupa pad jahonym kiraŭnictvam uvoziła zamiežnikaŭ u krainu ŭ 2022—2024 hadach, paviedamlaje Rzeczpospolita.
U Łodzi i Biełastoku pracavali šeść padstaŭnych kampanij, jakija vypisvali zaprašeńni dla haściavych i adukacyjnych viz, a taksama viz dla IT-śpiecyjalistaŭ pa prahramie PBH. Tolki adzin z padazravanych vypisaŭ jak minimum 843 zaprašeńni i zarabiŭ na hetym 84 tysiačy złotych (20 tysiač jeŭra).
Adukacyjnyja vizy paćviardžalisia dakumientami ab navučańni ŭ niesapraŭdnych VNU, jakija navučali zamiežnikaŭ u takich absurdnych halinach, jak, naprykład, historyja japonskaj kuchni. Klijentami byli biełarusy i ŭkraincy, a taksama hramadzianie Małdovy, Hruzii i krain Azii.
Kampanii taksama prapanoŭvali klijentam vizy PBH jak samyja dastupnyja, bo zajaŭniki nie prachodzili nieabchodnuju pravierku. Hrupa vydała zaprašeńni na kala 30 takich viz, u asnoŭnym biełarusam, jakija nie mieli adnosin da IT. Košt pasłuhi dla siamji z troch čałaviek składaŭ 700 dołaraŭ. Pradstaŭniki złačynnaj hrupy instruktavali zajaŭnikaŭ, što treba kazać konsułu.
Hrupu raskryli vypadkova, kali adzin ź jaje klijentaŭ u Biełarusi padaŭ zajavu na rabočuju vizu. Konsuł pravieryŭ kampaniju, jakaja vypisała jamu zaprašeńnie. Vyśvietliłasia, što firma ŭžo daŭno nie viadzie kamiercyjnuju dziejnaść i nie moža najmać na pracu. Pa łancužku śledčyja raskryli ŭsiu sietku takich padstaŭnych kampanij.
Abvinavačańni pa spravie pradjaŭleny sotni čałaviek, siem čałaviek zatrymanyja — heta, u asnoŭnym, hramadzianie Biełarusi i Ukrainy. Z hrupaj supracoŭničaŭ navat polski advakat.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary