Hieralt z Ryvii taksama źjavicca ŭ doŭhačakanaj hulni, ale ŭžo nie budzie hałoŭnym hierojem.
CD Projekt rychtujecca pačynać etap paŭnavartasnaj raspracoŭki čaćviortaj hulni ź sieryi pra Viedźmara (The Witcher). U kampanii zajavili, što pieradpradakšn hulni, jakaja maje kodavuju nazvu Project Polaris, užo praktyčna skončany.
Sieryja hulniaŭ «Viadźmar» zasnavana na litaraturnaj pieršaasnovie — adnajmiennaj sieryi ramanaŭ polskaha piśmieńnika Andžeja Sapkoŭskaha, jakaja skaryła čytačoŭ jašče ŭ 1990-ja hady. Praŭda, pośpiech ramanaŭ zbolšaha byŭ abmiežavany słavianskim śvietam. Sapraŭdny šalonuju papularnaść pa ŭsim śviecie historyja pra viedźmara atrymała paśla vychadu hulniaŭ.
Apošniaja hulnia sieryi «Viadźmar 3: Dzikaje Palavańnie», jakaja vyjšła ŭ 2015 hodzie, stała sapraŭdy kultavaj i zadała vysokuju płanku dla ŭsich hulniaŭ u žanry RPG. Hłyboki siužet z pakutliva składanymi maralnymi dylemami vydatna dapaŭniaŭ praŭdapadobny hłyboki śviet, splecieny z masavaj kultury, słavianskaj mifałohii, estetyki i historyi Centralnaj i Uschodniaj Jeŭropy.
Tak, naprykład, u dadatku «Kamiennyja sercy» pradstaŭniki adnaho rodu nasili imiony Vitold (Vitaŭt), Alhierd i Kiejstut, jakija jaŭna adsyłajuć da imionaŭ vialikich kniazioŭ litoŭskich z dynastyi Hiedziminavičaŭ.
Novuju hulniu ŭ śviecie Viedźmara raniej apisvali jak pačatak druhoj tryłohii, tamu ŭ naźvie nie budzie paradkavaha numara. Miarkujučy pa kodavaj naźvie i postary, na jakim viadźmarski miedaljon zaniesieny śnieham, hulnia moža dalej raźvivać historyju praroctva elfijki Itliny, jakaja pradkazvała strašnyja biedstvy i hibiel śvietu ad Biełaha Choładu.
Pa słovach Daha Kokła, jaki ahučvaŭ pa-anhlijsku hetaha piersanaža ŭ papiarednich častkach franšyzy, Hieralt sapraŭdy źjavicca ŭ novaj hulni CD Projekt Red. Ale ciapier jon budzie druharadnym piersanažam:
«Tak, čaćviortaha «Viedźmara» ŭžo anansavali. Ničoha pra jaho raskazać ja nie mahu. Ale my viedajem, što ŭ hulni budzie Hieralt, choć i nie viedajem, ci šmat jaho tam budzie. I ŭ centry siužetu budzie nie Hieralt, hetaja historyja nie pra jaho. Pra kaho jana — nam nieviadoma. Mnie i samomu chaciełasia b daviedacca!»
Pa słovach Kokła, scenaryjaŭ jon nie bačyŭ, ale i nie zmoh by raskazać pra heta, navat kali b raspracoŭščyki ŭžo pakazali jamu niešta.
Sami stvaralniki hulni pakul nie davali adnaznačnaha adkazu na pytańnie ci źjavicca Hieralt u praciahu sieryi. Ale i nie admaŭlali, što ŭ jaho moža być niejkaja rola ŭ joj navat paśla finału tryłohii.
Ciapier fanaty ŭ sacsietkach spračajucca, chto ž zmoža zamianić abajalnaha zabojcu pačvaraŭ. Mnohija ličać, što heta budzie albo Cyry, jakaja była adnym z centralnych piersanažaŭ treciaj častki, abo nieviadomy viadźmar.
Miarkujučy pa spravazdačach, novaja častka «Viedźmara» moža vyjści ŭžo ŭ kancy 2025 hoda. Siońnia CD Projekt taksama pracuje nad remejkam pieršaj častki tryłohii, jaki pabačyŭ śviet u dalokim 2007 hodzie, i šmatkarystalnickaj hulnioj pa suśviecie Viedźmara.
Hetym letam fanataŭ aščaśliviŭ i Andžej Sapkoŭski, jaki paviedamiŭ što pracuje nad novaj knihaj u suśviecie «Viedźmara». Pavodle słoŭ piśmieńnika, jana budzie skončana na praciahu hoda, to-bok maje ŭsie šancy vyjści ŭ adzin čas z novaj hulnioj.
«Naša Niva» — bastyjon biełaruščyny
PADTRYMAĆNa sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary