Biełarusy raskazali, jak abychodziać adnu z zabaronaŭ pry zapisvańni na padaču na polskuju vizu

U čym suviaź pamiž padačaj na vizu i miescam žycharstva?

Padavać dakumienty na polskuju vizu možna nie ŭ lubym vizavym centry krainy. Usie jany padzielenyja na try ŭmoŭnyja jurysdykcyi, i šukać svabodnyja daty vy možacie tolki ŭ toj, da jakoj adnosiciesia pa svajoj rehistracyi.

Tak, u vizavych centrach Minska, Mahilova i Homiela mohuć atrymać vizu tolki zarehistravanyja ŭ Minskaj, Mahiloŭskaj, Homielskaj i Viciebskaj abłaściach (tak zvanaja Minskaja akruha). Ale z takoj prapiskaj vas užo nie prymuć u Breście, Baranavičach ci Pinsku: u hetyja vizavyja centry mohuć prychodzić biełarusy, prapisanyja ŭ Bresckaj vobłaści.

Pry hetym rehistracyja pavinna być pastajannaj. Časovaja prapiska padydzie tolki razam z dadatkovymi dakumientami, jakija paćviardžajuć, što vy vučyciesia abo pracujecie ŭ hetym horadzie.

Padobnyja abmiežavańni pryviali da taho, što biełarusy pačali šukać sposaby, jak ich abyści, kab chutčej atrymać zapavietnuju vizu.

«Viadoma, mnohaje zaležyć ad typu vizy. Naprykład, u Bresckaj akruzie hetak ža składana zapisacca na turystyčny šenhien typu C, jak i ŭ Minskaj, na ich taksama vysokaja nahruzka. Ale na inšyja typy viz zapisacca lahčej. U Hrodzienskaj padobnaja situacyja. Tamu ŭ cełym «złavić» tam datu biezumoŭna praściej, čym u Minskaj akruzie.

Z hetym źviazanyja vypadki, kali prapanujuć zrabić rehistracyju płatna, kab možna było padavacca. Časam klijenty navat sami pieraprapisvajucca, kali jość takaja mahčymaść», — raskazała «Lusterku» hałoŭnaja redaktarka Visaflow.live Anastasija Łysakoŭskaja.

«Ciapier u Minsku tuha z zapisami»

Minčanka Ksienija zapisałasia na vizu ŭ Pinsku na minułym tydni. Dla hetaha daviałosia mianiać rehistracyju. Ksienii pašancavała: u hetym horadzie ŭ jaje žyvie svajačka, tamu pasłuhi «pamočnikaŭ» pa prapiscy joj nie spatrebilisia.

«Ja prosta pryjechała ŭ Pinsk, i jana mianie prapisała ŭ siabie ŭ kvatery, — raskazvaje dziaŭčyna. — Usio było chutka: u piatnicu pryjechała, my ź joj schadzili i ŭsio zrabili, a ŭžo ŭ aŭtorak ja atrymała pašpart i zapisałasia na vizu».

Na śviežuju datu prapiski, uspaminaje Ksienija, supracoŭniki vizavaha centra ŭvahi nie źviarnuli. Hałoŭnaje, kab jana adnosiłasia da akruhi, u jakoj chočaš atrymać vizu. A svaju matyvacyju surazmoŭnica tłumačyć prosta:

«Ciapier u Minsku tuha z zapisami, a ŭ mianie vučoba [u Polščy], i treba było chucieńka niešta rabić».

Pierad tym jak pajechać u inšy horad, Arciom kala miesiaca sprabavaŭ zapisacca na vizu pa miescy žycharstva (mužčynu patrebny pracoŭny šenhien). Ale paśla niaŭdałych sprobaŭ vyrašyŭ pamianiać stratehiju.

«U Hrodnie byli svabodnyja słoty, jakija visieli dastatkova doŭha, tamu ja zapisaŭsia tudy, — raskazvaje mužčyna. — Adrazu paśla zapisu patelefanavaŭ pa abjavach na «Kufry» i damoviŭsia ab prapiscy. Na nastupny dzień ja ŭžo byŭ u Hrodnie, prapisku zrabili za paŭhadziny. Heta było ŭ kancy žniŭnia. Mnie ŭsio abyšłosia ŭ 150 rubloŭ, plus kvitki tudy i nazad».

Dakumienty na vizu mužčyna padaŭ na hetym tydni. Raskazvaje, što ankietu zapaŭniaŭ sam, kab nie «zaachvočvać» pasiarednikaŭ.

«Ničoha składanaha ŭ hetym niama, — ličyć Arciom. — Pahladzim, jaki budzie vynik».

U čatach u telehramie, u jakich abmiarkoŭvajuć padaču na vizy, tema rehistracyi sustrakajecca davoli časta. Mnohija pytajucca, ci jość sens rabić prapisku ŭ Hrodnie ci Breście, kab «złavić» tam datu na padaču. Im adkazvajuć, što sens jość. Niekatoryja dzielacca svaimi paśpiachovymi prykładami. Mienavita taki byŭ u Ivana.

«Učora zrabiŭ pinskuju prapisku, siońnia zapisaŭsia, — raskazaŭ jon 11 vieraśnia. — Da hetaha na minski rehijon dva miesiacy nie moh złavić datu».

U adkaz na pytańni inšych karystalnikaŭ mužčyna ŭdakładniŭ: rehistracyju rabiŭ praz znajomych.

«A tak jość ludzi, jakija pradajuć ich. Na «Kufry» navat jość abjavy», — padzialiŭsia jon.

Pavialičyć

Aščadzić čas, ale nie hrošy. Voś za kolki možna kupić rehistracyju

Na «Kufry» «Lusterka» znajšło kala dziasiatka aktualnych abjaŭ z prapanovami zrabić rehistracyju ŭ Hrodnie ci Breście i abłaściach. U bolšaści paznačana, što cana «dahavarnaja». Sumu, jak praviła, ahučvajuć u pierapiscy.

«[Dla padačy na vizu] prapisku rablu, na praciahu dnia [padpisvajem] damovu [i potym] padača na rehistracyju, — adkazali pa adnoŭ z abjaŭ. — Pašpart zabirać praz adzin-try dni, dakładna nie pamiataju. Košt — 600 rubloŭ, potym treba prapisacca nazad [pa svaim adrasie]».

Jość prapanovy, u jakich košt užo paznačany. Naprykład, rehistracyju ŭ Hrodnie prapanujuć za 70 rubloŭ, a ŭ Breście ŭžo za 1500. U hetaj abjavie adkryta skazana, što jaje aŭtar hatovy rehistravać dla padačy na vizu. Jon navat moža zapisać vas u vizavy centr (ale ŭžo za asobnuju płatu).

Pavyšany popyt, miarkujučy pa ŭsim, upłyvaje i na košt prapanovy. Tamu paznačanaja cana nie zaŭsiody supadaje z toj, jakuju pa vyniku ahučvajuć u pierapiscy.

Naprykład, aŭtar adnoj z abjaŭ paznačyŭ, što košt rehistracyi — 99 rubloŭ. Ale potym zachacieŭ bolš.

«Pa [vašym] pryjeździe ŭ Hrodna ja staŭlu štamp mienš čym za dźvie hadziny, — napisaŭ pradaviec i papiaredziŭ, što «šmat achvotnych». — Siońnia miesca jość, a praz try dni, pakul vy navažyciesia, moža być nie aktualna. Rehistracyja — ad 250 dalaraŭ». 

• 0
• 0
• 0
• 5
• 0
• 0
• 2
• 0