Resursy Minabarony RB raspaŭsiudzili novy brudny fejk pra Ukrainu

Vyjava, jakaja vyhladaje jak skrynšot z karotkaha videa ŭ styli YouTube Shorts z łahatypam brytanskaj słužby VVS, źjaviłasia ŭ kancy žniŭnia ŭ internecie. «RWB («Reparciory biez hranic») zafiksavali bolš za tysiaču vypadkaŭ vykarystańnia nacysckaj simvoliki ŭkrainskimi vajskoŭcami, jakija pranikli ŭ Kurskuju vobłaść», — havorycca ŭ anhłamoŭnym nadpisie na vidarysie. 

Videa nieŭzabavie pierakazali roznyja rasijskija i łukašenkaŭskija pabliki. U tym liku stvoranyja strukturami Minabarony i MUS Biełarusi, naprykład, telehram-kanał Zachodniaha apieratyŭnaha kamandavańnia Uzbrojenych siłaŭ Biełarusi.

Lohka pravieryć, što videa adsutničaje na sajcie «aŭtara» — VVS. Nijakich zhadak pra «rasśledavańnie» niama i na sajcie «Reparcioraŭ biez hranic».

Žurnalisty RSF (mienavita takuju abrevijaturu ad svajoj nazvy na francuzskaj movie vykarystoŭvaje heta arhanizacyja, a nie RWB, jak paznačana na fejkavym videa) znajšli pieršakrynicu hetaj falšyŭki i raskryli šlach jaje raspaŭsiudžańnia.

Adpaviedna rasśledavańniu, videa ŭpieršyniu źjaviłasia ŭ sacyjalnaj sietcy Ch (Twitter) u 13 hadzin 24 žniŭnia ŭ akaŭncie niejkaj «Patrycyi» (Patricia), jakaja pradstaŭlajecca tam «pierakładčycaj» i maje francuzskuju hieałakacyju.

Akaŭnt stvorany ŭ lutym 2024 hoda i źjaŭlajecca instrumientam rasijskaha trolinhu. Štodnia tam publikujecca niekalki dziasiatkaŭ paviedamleńniaŭ na anhlijskaj, niamieckaj, francuzskaj i ruskaj movach. Usie jany vyznačajucca krytykaj Ukrainy i krain Zachadu i padtrymkaj Rasii.

Žurnalisty vyśvietlili, što zdymak profilu «Patrycyi» ŭziaty z rasijskaha sajta stokavych zdymkaŭ.

Viečaram paviedamleńnie ab «rasśledavańni» pierapościŭ irłandski pradprymalnik Čej Bouz (Chay Bowes), jaki źjaŭlajecca viadomym raspaŭsiudžvalnikam prarasijskich pohladaŭ.

Na nastupny dzień rolik apublikavaŭ u svaim telehram-kanale «aŭstralijski kazak» (Aussie Cossack) Siamion Bajkoŭ.

U minułym hodzie jon schavaŭsia na terytoryi rasijskaha konsulstva ŭ Sidnei ad pieraśledu ŭładaŭ Aŭstralii pa abvinavačvańni ab napadzie na praŭkrainskich demanstrantaŭ. Praź niekatory čas jon nie tolki atrymaŭ palityčny prytułak, ale i hramadzianstva Rasii.

Publikacyju padchapiła i aficyjnaja rasijskaja prapahanda. Spačatku pra «rasśledavańnie» raskazała aficyjnaja pradstaŭnica MZS Rasii Maryja Zacharava na bryfinhu 28 žniŭnia.

Pavialičyć

4 vieraśnia rolik raźmiaściŭ u svaim kanale viadučy Pieršaha kanała rasijskaha telebačańnia Rusłan Astaško. U toj ža dzień fejk prahladzieła bolš za 156 tysiač čałaviek. Jaho stali aktyŭna pierapoščvać.

«Reparciory biez hranic» adznačajuć, što Čej Bouz, jaki adnym ź pieršych raspaŭsiudziŭ falšyŭku, paśla zvarotu da jaho jaje vydaliŭ.

Maryja Zacharava, da jakoj arhanizacyja źviarnułasia pa elektronnaj pošcie i praz Telegram, nie ŭdakładniła, ci płanuje jana zrabić paviedamleńnie ab pamyłcy na svaim nastupnym bryfinhu dla presy i ci budzie hetaja łžyvaja infarmacyja vypraŭlena na sajcie Ministerstva zamiežnych spraŭ Rasii.

Pakazalna, što kanały siłavych struktur Biełarusi jak pa kamandzie taksama pierapościli fejk, jaki maje na mecie raspalvańnie varožaści da ŭkraincaŭ i stvareńnie vyhladu, što ŭ ZSU masava raspaŭsiudžanyja nacysckija pohlady. Z ulikam taho, što raspaŭsiudžvajecca zaviedamy fejk, takija dziejańni mohuć padpadać pad artykuł KK Biełarusi ab raspalvańni varožaści.

• 1
• 1
• 3
• 6
• 2
• 0
• 18
• 0