Raźlacieŭsia fejk, byccam Tejłar Śvift straciła 17 miljonaŭ padpisčykaŭ, bo nie padtrymała Trampa
Fejk raspaŭsiudziła adna z najbujniejšych i prestyžnych asacyjacyj holfa ZŠA, jakaja padtrymlivaje Donalda Trampa. Dla pierakanaŭčaści ŭkidu aficyjny akaŭnt asacyjacyi navat padrabiŭ skrynšot staronki Tejłar Śvift u instahramie. Adnak u realnaści papularnaść śpiavački tolki ŭzrasła.
Aficyjny tvitar-akaŭnt prestyžnaj asacyjacyi holfa ZŠA PGA Tour (Professional Golfers' Association Tour), jaki ładzić bujnyja spabornictvy pamiž prafiesijnymi hulcami ŭ holf pa ŭsim śviecie, apublikavaŭ fejk ab nibyta vielizarnych stratach padpisčykaŭ u Tejłar Śvift paśla taho, jak jana padtrymała prezidenckuju kandydaturu Kamały Charys.
Jak zapeŭnivaje akaŭnt PGA Tour, na minułym tydni ŭ Tejłar Śvift byŭ 301 miljon padpisčykaŭ u instahram. A paśla taho, jak śpiavačka padtrymała Kamału Charys, a nie Donalda Trampa, to za piać dzion nibyta straciła 17 miljonaŭ padpisčykaŭ. Potym akaŭnt asacyjacyi ŭ kamientarach pad dopisam dadaŭ, što kali b śpiavačka padtrymała mienavita Trampa, to imhnienna b pryciahnuła jašče bolš za sotniu miljonaŭ padpisčykaŭ.
Sam PGA Tour publična padtrymlivaje Donalda Trampa, ab čym adkryta piša ŭ tvitary.
Taylor Swift had 301 Million Instagram followers last week.
She endorsed Kamala Harris 5 days ago.
She now only has 284 Million followers.
She lost 17 Million followers by endorsing Kamala pic.twitter.com/vF72OrYZsR
U kamientary pad dopis, jaki ciapier nabraŭ bolš za 2,5 miljona prahladaŭ, nabiehła vielizarnaje mnostva zachoplenych prychilnikaŭ Trampa, jakija dahetul złaradničajuć z-za straty papularnaści Śvift.
Adnak znajšlisia i tyja, chto nie pavieryŭ publikacyi i zapatrabavaŭ ad akaŭnta PGA Tour dokazy. Toj u adkaz pakazaŭ skrynšot instahram-staronki Śvift, nibyta zrobleny piać dzion tamu i dzie bačnyja ŭžo 306 miljonaŭ padpisčykaŭ śpiavački (a nie 301, jak śćviardžaŭ akaŭnt raniej). Karystalniki prynialisia praviarać infarmacyju ŭ śpiecyjalnych servisach pa adsočvańni interniet-trafiku ŭ sacsietkach i vyličyli, što PGA Tour nie tolki schłusiŭ, ale i padrabiŭ skrynšot.
Adzin z karystalnikaŭ, jaki znajšoŭ dokazy chłuśni, pradjaviŭ heta asacyjacyi holfa ŭ kamientarach, ale adrazu ž byŭ zabłakavany. Błakavalisia i inšyja karystalniki, jakija padviarhali sumnievu chłuślivyja śćviardžeńni akaŭnta PGA Tour.
Pravieryli dopis PGA Tour na praŭdzivaść i my. Papularny servis pa adsočvańni trafiku ŭ instahramie InsTrack pakazvaje, što 300 miljonaŭ padpisčykaŭ na staroncy Śvift nikoli nie było, a piać dzion tamu na śpiavačku byli padpisanyja 283,9 miljona čałaviek.
Servis pakazaŭ, što paśla publikacyi ŭ padtrymku Kamały Charys Śvift naadvarot stała jašče bolš papularnaj i atrymała kala 136 tysiač padpisčykaŭ.
Tydzień tamu, paśla debataŭ Charys i Tramp, śpiavačka publična abviaściła, što padtrymlivaje kandydatku ad Demakratyčnaj partyi.
Pavodle słoŭ Śvift, jana vybiraje Charys, tamu što ZŠA patrebny spakoj, a nie chaos, i demakraty zmahajucca za pravy ŁHBTK+ i žančyn. Svoj dopis jana supravadziła fatahrafijaj z katom i padpisała jaho «biaździetnaja kašatnica», jaki adsyłaje da słoŭ sienatara Džej Dzi Vensa, vice-prezidenta ŭ kamandzie Trampa. Vens try hady tamu nazvaŭ pradstaŭnikoŭ dempartyi, u tym Charys, «biaździetnymi kašatnikami, jakija chočuć zrabić astatniuju častku krainy niaščasnaj».
Za hety čas dopis Śvift sabraŭ bolš za 11 miljonaŭ łajkaŭ, a pa jaje refieralnaj spasyłcy na dziaržaŭny sajt ź infarmacyjaj ab vybarach pierajšli bolš za 300 tysiač čałaviek. Navat Kamała Charys pačała krytykavać Trampa, spasyłajučysia na pieśni Śvift.
Sam Tramp u adkaz na publičnuju pazicyju Śvift napisaŭ va ŭłasnaj sacyjalnaj sietcy Truth Social kapsłokam, što nienavidzić śpiavačku.
Uzrovień upłyvu pop-zorak na vybary ŭ ZŠA — ciapier adna z tem, jakuju najbolš abmiarkoŭvajucca ŭ krainie. Muzykanty i cełyja hurty sabatujuć kampaniju Trampa, jaki vykarystoŭvaje ich muzyku, padajuć pazovy i vystupajuć z publičnymi zajavami suprać miljardera. Naprykład, šviedskaja ABBA zapatrabavała spynić vykarystańnie jaje muzyki na mierapryjemstvach respublikancaŭ, a The White Stripes padała ŭ sud na Trampa, nazvaŭšy jaho «fašystam» za «aburalnaje prysvajeńnie» pieśni.
Tramp na debatach z Charys zajaviŭ, što mihranty jaduć katoŭ i sabak amierykancaŭ. Adkul uziaŭsia hety miem?
«Jakaści, jakija ŭ Łukašenki ŭsprymajucca ź niehatyvam, u Trampie vyklikajuć simpatyi». Biełaruski ZŠA raspaviali, za kaho buduć hałasavać
Fanaty Tejłar Śvift pieratvaryli jaje biezymiennuju knihu ŭ miehapapularny biestsieler. Jak potym vyśvietliłasia, knihu śpiavačka ŭvohule nie pisała
Kolki nasamreč ciahnucca pracoŭnyja pajezdki Łukašenki? Cikavyja ličby14
Kamientary