«Addała amal 3500 dalaraŭ». Jak biełarusy ź Minska, Polščy i ZŠA jeździać lačyć zuby ŭ Turcyju
Biełaruś tradycyjna pryciahvaje zamiežnych turystaŭ dastupnaj i jakasnaj stamatałohijaj. Ale apošnim časam navat biełarusy z roznych pryčyn sprabujuć lačeńnie ŭ inšych krainach. Tyja ź ich, chto lačyŭ zuby ŭ Turcyi, raskazali MOST pra svoj vybar.
«Za takija hrošy ludzi ŭ adpačynak lotajuć, a ja sabie rot na ŭsio žyćcio zrabiła»
Syn Taćciany (imia źmieniena) z 2020 hoda žyvie ź siamjoj u Polščy. Taćciana vielmi chacieła pabačycca z rodnymi, ale nie zmahła atrymać vizu. Tady niaviestka prapanavała sustrecca ŭsim razam u Turcyi, a zaadno vyrašyć pytańni pa stamatałohii.
— Piarednija jašče niejak trymajucca, a žavalnych užo mnohich prosta niama. Rabić u nas [u Biełarusi] mała taho što vielmi doraha, dyk jašče paśla ŭsich hetych sankcyj nieviadoma, jakija tam materyjały. Kali niešta sapraŭdy jakasnaje, to kaštuje niepasilnych hrošaj. Jašče heta vielmi doŭha — ad niekalkich miesiacaŭ da paŭhoda. A tut ja za tydzień zrabiła ŭvieś rot, i heta z tryma prymierkami [karonak]. Ja pastaviła davoli tanny varyjant — mietałakieramiku, ale vyhladaje vielmi naturalna.
Daktary patłumačyli Taćcianie, što vyratavać niekalki zuboŭ užo nielha — ich daviałosia vydalić. Spačatku žančyna mierkavała pastavić impłanty na vierchniuju žavalnuju zonu, ale abśledavańnie pakazała, što kostka skivicy tonkaja i słabaja. Tamu na hetuju častku biełaruscy zrabili zdymnyja pratezy. A voś unizie i ŭ «zonie ŭśmieški» źvierchu ŭ jaje karonki.
— Taki kambinavany rot atrymaŭsia. Za ŭsio ja addała amal 3500 dalaraŭ, heta z ulikam taho, što klinika apłaciła mnie hatel na ŭvieś čas sa śniadankam, tranśfier i pieravozki «hatel — klinika — hatel». Za takija hrošy ludzi prosta ŭ adpačynak lotajuć, a ja sabie rot na ŭsio žyćcio zrabiła.
Patelefanavała ŭ 21 kliniku
Maša i Andrej (imiony źmienienyja) pastajanna žyvuć u Polščy. Prablemy z zubami ŭ abaich byli ŭžo niekalki hadoŭ, ale para paličyła, što lačyć ich u hetaj krainie «nieapraŭdana doraha». A pryjechać u Biełaruś na lačeńnie jany nie mohuć praz palityčny pieraśled.
— U Polščy płatna ŭsio: i kansultacyja, i zdymak, i vydaleńnie, — raskazvaje Maša. — Ja patelefanavała pa ŭsich klinikach horada i prycaniłasia: prosta kansultacyja pa karonkach — 200 złotych [46 jeŭra], zdymak — 150-200 złotych, lačeńnie troch kanałaŭ i płomba — 1500-1700 złotych [347-393 jeŭra]. Uvohule, kab mužu adrestaŭravać płomby na niekalkich zubach, vylečyć dva zuby z kanałami, pastavić adzin most i naraścić adzin złamany zub (biez harantyi), vychodziła kala 2000 jeŭra. Mnie byŭ nieabchodny tolki adzin most i abnavić płomby — jašče amal 800 jeŭra. Ceny na karonki na adnu skivicu dasiahajuć da 80 tys. złotych [18,5 tys. jeŭra]. Dva rota — roŭna kvatera!
Rekłamu stamatałahičnych pasłuh u Turcyi Maša ŭbačyła ŭ Instagram i zacikaviłasia. Kab daviedacca padrabiaznaści, dziaŭčyna źviazałasia z 21 klinikaj u roznych haradach krainy.
— Umovy i ceny va ŭsich roznyja, zaležać ad taho, jakija karonki ty chočaš, brenda materyjałaŭ i terminu harantyi. Z taho, što ŭvachodzić u pakiet u kožnaha, — heta tranśfier, hatel i supravadžeńnie pierakładčyka.
«Rabili adrazu ŭvieś rot abaim»
Muž i žonka spynilisia na klinicy ŭ Iźmiry.
— Jany sami vyrablajuć karonki sa šviejcarskaha cyrkonija, praz što kolkaść prymierak nie abmiežavanaja, buduć padhaniać, pakul nie zrobiać idealna, — tłumačyć žančyna. — Jašče bonusam atrymali kampiensacyju palotu, tamu što rabili adrazu ŭvieś rot abaim: 28 karonak u mianie, 26 karonak i dva impłanty ŭ muža. Tak mužu jašče i prykus vypravili: u jaho ź dziacinstva nie zmykalisia piarednija zuby, i ŭvieś zubny šerah tancavaŭ. A ciapier prosta inšy čałaviek, navat avał tvaru źmianiŭsia. U Polščy za takoje navat nie bralisia, kazali, što tolki skivična-tvarnaja chirurhija dapamoža.
Ciapier Andreju treba budzie prylacieć u Turcyju jašče raz praz 3-4 miesiacy, kali impłanty pryžyvucca — tady pastaviać karonki.
Maša pryznajecca, što heta ich z mužam samaja darahaja pakupka ŭ žyćci — za dvaich jany addali kala 9500 jeŭra.
— Adpačynak, viadoma, atrymaŭsia nie vielmi. Da mora 100 kiłamietraŭ, i ŭžo mocny viecier — nie papłavaješ. U pieršy ž dzień paśla apracoŭki zuby balać, značyć možna tolki sup. Zatoje na histaryčnym rynku ja adarvałasia: usio tannaje, jakasnaje, možna handlavacca. U vyniku tudy jechali z ručnoj pakłažaj, a nazad — z dvuma vialikimi valizkami, jakija tam ža i kupili.
«U Biełaruś ciapier pryjazdžać niama sensu»
Anatol rodam ź vioski ŭ Homielskaj vobłaści. Spačatku jon pierajechaŭ va Ukrainu, a ciapier žyvie ŭ ZŠA, u štacie Masačusets. U Turcyju jon prylacieŭ ź dźviuma dočkami-padletkami.
— My navat nie razhladali varyjant stamatałohii ŭ ZŠA — heta varjacka doraha. U Biełaruś ciapier pryjazdžać niama sensu: niezrazumiełyja jakaść i harantyi. Dy i niebiaśpiečna, choć ja ni ŭ čym takim nie ŭdzielničaŭ, daŭno pierajechaŭ. U mianie znajomy ŭ Turcyi zuby rabiŭ, nu i my vyrašyli padnazapasić i ŭsie razam pryjechać — ja dočkam abiacaŭ.
Anatolu ŭ Turcyi vykonvali lačeńnie i čystku zuboŭ. A dočki «maryli pra halivudskuju ŭśmiešku» — im pastavili viniry. Za pajezdku, jakaja doŭžyłasia 1,5 tydnia, siamja addała 12 tys. dalaraŭ. Akramia miedycynskich pasłuh, u hetuju sumu ŭvajšli apłata hatela, tranśfier, pajezdki ŭ kliniku, a taksama supravadžeńnie ruskamoŭnaha mieniedžara.
— Adpačyć nie adpačyli: užo nadvorje nie toje, ale zakupilisia juvielirnymi vyrabami, skuranymi — u nas heta taksama vielmi doraha, — raskazvaje Anatol.
Kamientary
Nu čto pros ali stranu tiepieŕ po turcijam ošivajutsia zuby lečat.