Rasija i Iran dziejničajuć u ZŠA suprać adzin adnaho. Pra heta śviedčać sakretnyja dakumienty

Niahledziačy na aktyŭnaje palityčnaje i vajennaje supracoŭnictva Rasii i Irana ŭ praviadzieńni vajny va Ukrainie, supraciŭleńni zachodnim sankcyjam i žadańni zrujnavać upłyŭ ZŠA ŭ śviecie, hetyja dźvie krainy sutykajucca łbami jak minimum u adnym klučavym i navat losavyznačalnym dla ich pytańni — budučyja prezidenckija vybary ŭ ZŠA.

Čamu ŭ dvuch sajuźnikaŭ uźnik tut raskoł, lepš za ŭsio pakažuć vyjaŭlenyja fakty ź niadaŭnich rasśledavańniaŭ Ministerstva justycyi ZŠA i FBR datyčna dziejnaści rasijskich i iranskich ahientaŭ na amierykanskaj terytoryi.

Rasijski intares

Pavodle amierykanskaj kontrraźviedki, jakaja pierachapiła sakretnyja dakumienty Kramla i ŭnutranyja pratakoły sustreč pamiž pradstaŭnikami administracyi Uładzimira Pucina, rasijskija ŭłady adkryta zajaŭlajuć svaim śpiecsłužbam, prapahandystam i chakieram pra nieabchodnaść damahčysia pieramohi Donalda Trampa na prezidenckich vybarach u ZŠA.

Pucinu pry hetym dakładvajuć pra chod vykanańnia hetaj zadačy, ale publična jon vykazvaŭ patrymku Džo Bajdenu, a potym Kamale Charys. Na dumku ekśpiertaŭ, heta metanakiravany krok, kab pasprabavać zrabić lidaraŭ demakrataŭ u vačach elektaratu «prarasijskimi» i tym samym advieści padazreńni ad Trampa.

Zhodna z atrymanymi rasijskimi šmatstaronkavymi dakumientami, niekatoryja frahmienty ź jakich byli niadaŭna raskrytyja publicy, jašče z 2023 hoda, kab zabiaśpiečyć pieramohu Trampa, Rasija raspačała maštabnuju tajemnuju dezynfarmacyjnuju kampaniju, jakaja maje na mecie akazańnie ŭpłyvu na amierykanskich palitykaŭ, biznesmienaŭ, žurnalistaŭ, sielebryci, relihijnych dziejačaŭ, lidaraŭ hramadskaj dumki, a taksama stvareńnie kantentu dla antyŭradavych jutub-kanałaŭ, fiktyŭnych hrup prychilnikaŭ respublikancaŭ u sacsietkach, psieŭdapartałaŭ rehijanalnych navin štataŭ z pratrampaŭskim uchiłam, kłonaŭ suśvietnych miedyja, tarhietavanaj rekłamy i vielizarnaha mnostva prarasijskich kamientaroŭ z pryciahnieńniem botafiermaŭ i inšaje.

Prykład: Maskva z dapamohaj ahienta-amierykanca stvaryła ŭ ZŠA sietku rehijanalnych psieŭdaSMI

Kampanija dezynfarmacyi, pavodle dakumientaŭ, składajecca jak minimum z troch adnačasovych apieracyj pad nazvami «Staryja dobryja ZŠA», «Sietka ahientaŭ upłyvu ŭ amierykanskich sacsietkach» i «Partyzanskaja miedyjakampanija».

U apisańni da pieršaj apieracyi analityki Kramla padkreślivajuć, što Rasii varta prykłaści maksimum namahańniaŭ, kab zabiaśpiečyć pieramohu Donalda Trampa.

Zaŭvaha: imiony kandydataŭ ad dvuch asnoŭnych amierykanskich palityčnych partyj (na momant 2023 hoda: Džo Bajden i Donald Tramp), jak i nazvy samich hetych partyj (Demakratyčnaja i Respublikanskaja) u atrymanych rasijskich dakumientach byli zacenzuravanyja pa inicyjatyvie Miniusta ZŠA, adnak viedamstva ŭ anhlijskim pierakładzie na miescy čornych linij paznačyła vyšejzhadanyja asoby i partyi, jak Candidate A (Tramp), Candidate B (Bajden), U.S. Political Party A (Respublikanskaja partyja), U.S. Political Party B (Demakratyčnaja partyja).

Pavialičyć

«Na siońniašni dzień mižnarodnaja abstanoŭka charaktaryzujecca pierš za ŭsio rezkaj varožaściu ZŠA ŭ adnosinach da Rasii. ZŠA imknucca zachavać «hłabalnaje lidarstva», naniosšy Rasii stratehičnaje paražeńnie. U toj ža čas pytańnie ab apraŭdanaści hetych namahańniaŭ ZŠA zastajecca centralnym pytańniem ich unutranaj palityki i stanie asnoŭnaj temaj na vybarach prezidenta ZŠA ŭ 2024 hodzie.

Dla Rasii metazhodna prykłaści maksimum namahańniaŭ, kab zabiaśpiečyć pieramohu ŭ hramadskaj dumcy Amieryki punktu hledžańnia Donalda Trampa (u pieršuju čarhu — jaho prychilnikaŭ), uklučajučy pałažeńni ab miry va Ukrainie ŭ abmien na ziamlu, nieabchodnaści zasiarodzicca na prablemach amierykanskaj ekanomiki, viartańni vojskaŭ z usiaho śvietu dadomu i h.d.

U ciapierašni čas isnujuć realnyja mahčymaści dla taho, kab padšturchnuć hramadskuju dumku ZŠA ŭ pravilnym dla nas kirunku, vykarystoŭvajučy instrumienty infarmacyjnaj pracy ź internet-karystalnikami», — napisana ŭ tekście sakretnaha dakumienta Kramla.

U jakaści internet-instrumientaŭ rasijskija ŭłady pieraličvajuć takija sacsietki, jak YouTube, Facebook, Instagram, Reddit, 4chan i inšyja, asabliva źviartajučy ŭvahu na tvitar, jaki Kreml nazyvaje «adzinaj masavaj placoŭkaj u ZŠA, dzie možna vieści pracu biez «demakratyčnaj cenzury» i ŭzmocnienaha kantrolu z boku amierykanskich śpiecsłužbaŭ» (nahadajem, tvitar (X) z kanca 2022 hoda naležyć miljarderu Iłanu Masku, jaki adkryta padtrymlivaje Donalda Trampa i, pavodle bujnych amierykanskich ŚMI, viadzie sakretnyja razmovy z Pucinym).

Voś jak śpiecyjalistami Kramla apisvajecca taktyka pa stvareńni sietki ŭpłyvu ŭ amierykanskim siehmiencie tvitara śpiecyjalna da prezidenckich vybaraŭ.

«Meta — stvaryć i raźvić sietku z 200 akaŭntaŭ, pa 4 na kožny amierykanski štat, abaraniać sietku pad VPN i fizičnymi siervierami ŭ samich ZŠA ad vyjaŭleńnia miascovymi śpiecsłužbami «ruskaha śledu» i da vybaraŭ dasiahnuć pakazčykaŭ aŭdytoryi zvyš adnaho miljona čałaviek», — pišuć kramloŭskija analityki.

Pry hetym jany bieź ironii adznačajuć, što padčas pracy ŭ sacsietkach «varta vykarystoŭvać minimum fejkaŭ i bolš realistyčnaj infarmacyi».

Pavialičyć

Pavialičyć

Aproč hetaha, u apisańni da treciaj apieracyi «Partyzanskaja miedyjakampanija» napisana, što Kreml ličyć prychilnikaŭ Bajdena «krajnie levymi hłabalistami, jakija vystupajuć za skažeńnie tradycyjnych maralnych i relihijnych kaštoŭnaściaŭ», u toj čas jak prychilniki Trampa dla Kramla «źjaŭlajucca narmalnymi ludźmi, jakija vystupajuć, pierš za ŭsio, za zachavańnie tradycyj amierykanskaha ładu žyćcia».

Adnak pry hetym rasijski ŭrad zajaŭlaje, što nivodnaha z amierykanskich palitykaŭ, u tym liku rezka apazicyjnych da prezidenta Bajdena, «nielha ličyć prarasijskim abo prapucinskim».

«Padkreślim jašče raz: nijakich prarasijskich abo prapucinskich palitykaŭ, ŁHD (lidary hramadskaj dumki, u ruskaj viersii paznačany jak «ŁOM») i vybarščykaŭ u ZŠA niama. Dakazvać racyju Rasii biessensoŭna i niama kamu. Usie amierykanskija palityki i ŁHD — patryjoty i prychilniki amierykanskaj pieravahi.

Ale prychilniki Trampa adčuvajuć, što jany abmiežavanyja palitykaj prezidenta, cenzuraj u sacyjalnych sietkach i ŭradavymi mierami. Jość niezadavolenaść rezkim źnižeńniem uzroŭniu žyćcia i vialikimi vydatkami na palityku Štataŭ u Jeŭropie i va Ukrainie. Jość strach stracić amierykanski ład žyćcia i «amierykanskuju maru». Mienavita hetyja nastroi varta vykarystoŭvać u chodzie infarmacyjnaj kampanii ŭ ZŠA», — padkreślivajecca ŭ dakumientach Kramla.

Pavialičyć

Pavialičyć

Iranski intares

Kali Rasija sprabuje damahčysia pieramohi Donalda Trampa, to Iran, naadvarot, imkniecca zabiaśpiečyć pieravahu Kamały Charys. I heta robicca nie tamu, što iranskija ŭłady nibyta stali padtrymlivać i pavažać Charys, a tolki dziela taho, kab nie puścić Trampa na prezidenckaje kresła.

Dla Irana heta žyćciova važny intares, bo Donald Tramp za svoj pieršy prezidencki termin zdoleŭ istotna naškodzić stratehičnym płanam Irana i biaśpiecy jaho elit. U 2018 hodzie jon vyvieŭ ZŠA z zaklučanaj tryma hadami raniej «jadziernaj uhody» z Tehieranam i adnaviŭ žorstkija siektaralnyja sankcyi suprać Irana, a ŭ 2020-m pa zahadzie Trampa byŭ likvidavany iranski top-hienierał Kasem Sulejmani, jaki ŭznačalvaŭ SSA Korpusa vartavych isłamskaj revalucyi (elitnyja siły Irana).

Za hałavu Trampa ŭ Iranie dahetul pryznačanaja ŭznaharoda ŭ try miljony dalaraŭ, a iranskija ahienty, pavodle raźviedki ZŠA, usio jašče sprabujuć zabić Trampa, asabliva ŭ pieradvybarčy pieryjad.

U svaich namahańniach pieraškodzić Trampu stać prezidentam Iran dajšoŭ i da taho, što praz ułasnyja chakierskija hrupy ŭzłomvaje sierviery pieradvybarčaha štabu i inšych struktur respublikancaŭ, a zatym z ułasnaj inicyjatyvy pierasyłaje adtul sakretnyja dakumienty ludziam Kamały Charys i redakcyjam bujnych amierykanskich ŚMI, daviedałasia ahienctva Reuters.

Tak, praŭradavaja iranskaja hrupoŭka APT42 zdoleła atrymać nastupnyja dakumienty (ich sapraŭdnaść pakul nichto aficyjna nie paćvierdziŭ).

1. Nibyta poŭnaja schiema finansavańnia pieradvybarčaj kampanii Donalda Trampa, pavodle jakoj respublikanskamu kandydatu na pieramohu patrebna nie mienš za 740 miljonaŭ dalaraŭ.
2. infarmacyja, mierkavana, pra ŭsich niepubličnych fundataraŭ Trampa ź liku palitykaŭ i bujnych biznesmienaŭ ZŠA.
3. Častka imaviernaj unutranaj pierapiski i paroli supracoŭnikaŭ štaba Trampa.
4. Nibyta padrabiaznaje kanfidencyjnaje daśje na abranaha Trampam kandydata na pasadu vice-prezidenta ZŠA Džej Dzi Vensa, dzie napisana, što ŭ pieryjad z 2016 pa 2020 hod palityk «byŭ adnym z hałoŭnych łabistaŭ hrašovaj padtrymki Ukrainy» i, niahledziačy na antykitajskuju rytoryku Trampa, «padazravaŭ taho ŭ metanakiravanaj słužbie intaresam Kitaja».
5. Taksama ŭ skradzienych irancami fajłach fihuravali danyja ab tym, što pratrampaŭskaja antyimihranckaja arhanizacyja NumbersUSA nibyta źbirajecca vykarystać častku nielehalnych mihrantaŭ biez amierykanskaha hramadzianstva dla hasavańnia na vybarach za Trampa. Sam Tramp nie raz publična prypisvaŭ takuju taktyku štabu Bajdena i krytykavaŭ jaho za heta.

Iranskija chakiery razasłali atrymanyja danyja na elektronyja skryni struktur demakratyčnaj partyi ZŠA, štaba Kamały Charys i takim bujnym ŚMI, jak Politico, The Washington Post, The New York Times, Reuters i inšym, ale ŭsie jany nie stali adkazvać na paviedamleńni chakieraŭ i nie stali publikavać atrymanyja fajły, adznačaje Reuters.

Adnak supierkamitet palityčnych dziejańniaŭ American Muckrakers PAC, źviazany z Demakratyčnaj partyjaj ZŠA, i adzin z žurnalistaŭ bujnoj piśmieńnickaj płatformy Substack vyrašyli apublikavać materyjały, choć i nie pryznali toj fakt, što jany byli atrymanyja ad irancaŭ.

U toj ža čas pradstaŭniki pieradvybarčaha štaba Trampa asudzili dziejańni chakieraŭ, abvinavaciŭšy ich u «metanakiravanym umiašańni ŭ vybary 2024 hoda i sprobie pasiejać chaos u demakratyčnym pracesie ZŠA». Štab taksama zajaviŭ, što žurnalisty, jakija publikujuć skradzienyja materyjały, «vykonvajuć daručeńni vorahaŭ Amieryki».

Varta adznačyć, što sam Tramp u 2016 hodzie zajmaŭ zusim inšuju pazicyju adnosna palityčnych uzłomaŭ, kali publična zaklikaŭ Rasiju «ŭzłamać elektronnuju poštu tahačasnaha kandydata na pasadu prezidenta ZŠA ad demakratyčnaj partyi Chiłary Klintan i pradstavić jaje presie», što vyklikała tady značny hramadski rezanans.

Pavialičyć

Pavodle amierykanskich śpiecsłužbaŭ, iranskija praŭradavyja chakiery jašče ź viasny stali aktyŭna ŭzłomvać struktury respublikancaŭ i z ułasnaj inicyjatyvy pieradavać infarmacyju demakratam.

«Usio heta pačało adbyvałasia ŭ červieni i lipieni hetaha hoda, da taho, jak Bajden źniaŭ svaju kandydaturu na vybarach, i na jaho miesca zastupiła Kamała Charys. Chakiery z ułasnaj inicyjatyvy pasłali asobam, źviazanym u toj čas z vybarčym štabam prezidenta Bajdena, imejły z vytrymkaj sa skradzienaha nie pryznačanaha dla publiki materyjału sa štaba byłoha prezidenta Trampa», — havorycca ŭ supolnaj zajavie FBR, ofisa dyrektara Nacyjanalnaj raźviedki ZŠA i ŭpraŭleńnia kibierbiaśpieki i biaśpieki infrastruktury ZŠA.

Što ŭ vyniku?

Zafiksavanaja ŭ ZŠA dziejnaść rasijskich i iranskich vyviedak dakładna śviedčyć toje, što baki, pieraśledujučy svaje asabistyja intaresy, aktyŭna zaminajuć adzin adnamu damahčysia žadanaha dla ich vyniku.

Składana skazać, ci znachodziacca dźvie krainy pa danym pytańni ŭ adkrytaj (dla ich) svarcy, abo jany prosta sprabujuć nie źviartać adzin na adnaho ŭvahi, kancentrujučysia vyklučna na ŭłasnym zadańni.

Adnak adno možna skazać dakładna — pierśpiektyva projhryšu i dla Rasii, i dla Irana, kali brać da ŭvahi ich vysiłki i dziejańni, źjaŭlajecca dla ich vielmi niepažadanaj i navat niedapuščalnaj, tamu chočuć jany taho ci nie, ale im daviadziecca varahavać adzin z adnym pa amierykanskim pytańni, i kampramis tut pamiž imi naŭrad ci pradbačycca. 

Adzinaje, što moža być u ich ahulnaha ŭ pytańni amierykanskich vybaraŭ — heta žadańnie spravakavać biesparadki ŭ ZŠA, niezaležna ad vynikaŭ hałasavańnia, kab pasprabavać pasłabić krainu i adyhracca z-za mahčymaj niaŭdačy na palityčnych staŭkach za svajho kandydata pa pryncypie: nie dastavajsia ž ty tady nikomu.

• 1
• 0
• 6
• 0
• 1
• 0
• 0
• 0