U Hruzii prachodziać parłamienckija vybary, ad jakich zaležyć jeŭrapiejskaja budučynia krainy

U subotu ŭ Hruzii pačałosia hałasavańnie na parłamienckich vybarach, jakoje nazyvajuć najvažniejšym u historyi krainy, bo jano vyznačyć nie tolki skład nastupnaha parłamienta, ale i budučy kirunak raźvićcia Hruzii. Hruzinskija hramadzianie ŭpieršyniu abirajuć parłamient, majučy status krainy — kandydata na ŭstupleńnie ŭ ES, adnak vybary prachodziać na fonie biesprecedentnaha kryzisu ŭ adnosinach Tbilisi z zachodnimi partniorami i pahrozy jeŭraintehracyi, piša Bi-bi-si.

Hruziny hałasujuć pa praparcyjnaj sistemie, dzie partyjam nieabchodna pieraadoleć piacipracentny barjer, kab patrapić u parłamient. Taksama na 90% vybarčych učastkaŭ užyvajecca elektronnaje hałasavańnie ź identyfikacyjaj vybarščykaŭ i pieradačaj papiarednich vynikaŭ.

Pa ŭsioj krainie, za vyklučeńniem adkołatych rehijonaŭ Abchazii i Paŭdniovaj Asiecii, adkryjecca bolš za try tysiačy učastkaŭ, a jašče bolš za šeśćdziesiat učastkaŭ buduć pracavać za miažoj, dzie zarehistravana kala 96 tysiač vybarščykaŭ.

Pierad hałasavańniem mnohija hruziny nakiravalisia ŭ rehijony, dzie jany zarehistravanyja, kab prahałasavać, pry hetym častka ź ich skardziłasia na adsutnaść kvitkoŭ. U vyniku ludzi arhanizavalisia praz sacyjalnyja sietki, kab skinucca na transpart ci prapanavać miesca paputčykam, a časam navat finansavuju dapamohu na darohu.

«Idzicie na vybary, nie bojciesia ničoha, kožny vaš hołas pavinien vyrašać budučyniu hetaj krainy. Niachaj nichto nie zastajecca doma, bo vam vyrašać, jakoj budzie zaŭtrašniaja Hruzija!» — źviarnułasia da vybarščykaŭ prezident Hruzii Sałame Zurabišvili napiaredadni hałasavańnia.

Vybary prachodziać na fonie mocnaj palaryzacyi palityčnych sił, praź piać miesiacaŭ paśla maštabnych prazachodnich pratestaŭ suprać pryniaćcia zakona «Ab prazrystaści zamiežnaha ŭpłyvu», tak zvanaha «zakona ab inšahientach». Pastanova ES paśla pryniaćcia hetaha zakona faktyčna prypyniła praces ustupleńnia Hruzii ŭ Jeŭrasajuz.

U vybarach udzielničajuć 18 partyj. Kirujučaja partyja «Hruzinskaja mara» idzie na čaćviorty termin, što źjaŭlajecca biesprecedentnym vypadkam u historyi niezaležnaj Hruzii.

Miarkujecca, što jana atrymaje najbolšuju kolkaść hałasoŭ, ale apazicyja spadziajecca na sumarnaje pieravažańnie hałasoŭ prajeŭrapiejskich sił i bolšaść miescaŭ u budučym parłamiencie.

Klučavyja apanienty «Hruzinskaj mary» — apazicyjnyja abjadnańni «Adzinstva — Nacyjanalny ruch», «Mocnaja Hruzija», «Kaalicyja za źmieny», a taksama partyja byłoha premjera Hieorhija Hacharyja «Za Hruziju». Apazicyja raźličvaje na aktyŭnaść moładzi, jakaja viasnoj vystupała suprać zakona ab inšahientach.

U Hruzii vybary paraŭnoŭvajuć z refierendumam, na jakim vybarščyki abirajuć pamiž jeŭrapiejskim šlacham Tbilisi i rasijskim upłyvam.

Asnoŭnyja prajeŭrapiejskija siły padpisali «Hruzinskuju chartyju» ad Sałame Zurabišvili i abiacajuć u vypadku pieramohi pravieści reformy dla viartańnia na šlach jeŭraintehracyi i admianić zakony, jakija pieraškadžajuć hetamu pracesu.

Kiraŭničaja partyja taksama nazyvaje vybary refierendumam, ale nie pamiž jeŭrapiejskim šlacham i izalacyjaj, a pamiž miram i vajnoj, abvinavačvajučy apazicyju ŭ sprobach uciahnuć krainu ŭ vajnu, pry hetym taksama abiacajučy budučaje členstva ŭ ES.

Zaviaršajučy pieradvybarny pieryjad, vykanalnicki dyrektar arhanizacyi «Spraviadlivyja vybary» (ISFED) Nina Dalidze adznačyła, što kiraŭničaja partyja vykarystała trahiedyju ŭkrainskaha naroda ŭ svaich metach, i taksama ŭ jaje kampanii hučali antyzachodnija pasyły. Naziralniki ad hetaj arhanizacyi buduć sačyć za pracesam jak u krainie, tak i za miažoj.

Usiaho, pavodle CVK, za vybarami buduć sačyć naziralniki z 76 mižnarodnych i 111 miascovych arhanizacyj. Vybary buduć aśviatlać bolš za 280 žurnalistaŭ z amal 200 ŚMI.

• 0
• 0
• 0
• 1
• 1
• 0
• 0
• 1